Ин навбат дар бахши «Ҳунар» дар бораи ҳунари нишоллопазӣ сухан хоҳем гуфт.
НИШОЛЛО — як навъ ширавории суннатӣ аст. Ҳунари нишоллопазӣ низ қадима буда, бобоёну бобокалонҳои мо онро омода ва ҳамчун ширинии хуштаъм дар зиндагии ҳаррӯза истеъмол мекарданд.
Дар шаҳри Хуҷанди бостонӣ махсус маҳаллаҳое вуҷуд доштанд ва имрӯз низ то ҳадде мавҷуданд, ки сокинонаш бо ҳунари нишоллопазӣ маъруфу машҳур шуда буданд. Тайёр кардани нишолло чунин сурат мегирад: дар зарфи сирдор шакару обро ҷӯшонида, қиём мепазанд ва онро хунук мекунанд. Бех (решаи як навъ гиёҳ)-ро тоза шуста, реза карда, дар об меҷӯшонанд.
Баъди ҷӯшида ба рӯи об баромадани бех, оби онро аз дока гузаронида, ба деги мис (ё зарфи сирдор) андохта, каме хунук мекунанд ва ба он сафедии тухмро андохта, бо чилчӯб лат мезананд. Ба кафки сафеди ҳосилшуда кам-кам қиём мерезанд ва бо чилчӯб лат заданро давом медиҳанд. Барои хуштаъмӣ ба қиём ҷавҳари лимӯ ва ванилин меандозанд. Агар шакари шӯшабаста об шавад ва қиём аз кафк ҷудо шуда наистад, онгоҳ нишолло тайёр аст.
Ранги нишоллои тайёршуда сафед буда, ҳангоми бо белчаи махсуси чӯбин гирифтани нишолло он ғоз медиҳад. Ба 0,5 кг шакар 0,5 литр об, як қошуқча ҷавҳари лимӯ ва ванилин, сафедии 2 дона тухм, 20 грамм бех зарур аст.
Нишолло дар тӯйю маъракаҳои мардумӣ ба дастархон гузошта мешавад. Нишоллои тайёрнамудаи ҳунармандони боистеъдод ва моҳирро то 6 моҳ нигоҳ доштан мумкин аст. Дар ин муддат таркиби он вайрон ва ё об намешавад.
Яке аз ҳунарманди бомаҳорат, бахусус нишоллопази маъруфи тоҷик, Аълочии фарҳанги Ҷумҳурии Тоҷикистон, узви Ассотсиатсияи ҳунарҳои халқии Тоҷикистон Абдуғаффор Абдусамадов мебошад.
Нет комментариев