Дар шаҳри Душанбе ҷаласаи навбатии комиҷроияи Кумитаи миллии олимпии Тоҷикистон (КМО ҶТ) баргузор шуд. Дар ин бора ба АМИТ «Ховар аз КМО ҶТ хабар доданд.
Гуфта мешавад, ки дар кори ҷаласа муовинони Президенти Кумитаи миллии олимпии Тоҷикистон Шамсулло Соҳибов, Аҳтам Абдуллозода, аъзои комиҷроияи КМО ва ҷоизадорони Бозиҳои Осиё-2018 ширкат намуданд. Дар оғози ҷаласа Шамсулло Соҳибов ҷоизадорони Бозиҳои Осиё-2018-ро, ки аз 18 август то 2 сентябр дар Индонезия баргузор шуданд, табрик намуда, иброз дошт, ки Бозиҳои Осиё баъд аз Бозиҳои олимпӣ аз бонуфузтарин чорабиниҳои варзишии ҷаҳон мебошанд. Зикр гардид, ки бо дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон КМО ҶТ дастаи мунтахаби Тоҷикистонро дар ҳайати 105 нафар ба Бозиҳои Осиё сафарбар кард. Фақат аз ҳисоби Кумитаи миллии олимпӣ барои сафарбар кардани 50 нафар варзишгарону мураббиён ва таъмини даста бо лавозимот ва сарулибоси варзишӣ беш аз як миллион сомонӣ масраф гардид. Варзишгарони мо аз рӯи 17 намуди варзиш дар Бозиҳои мазкур иштирок карда, ба гирифтани 7 медал – 4 нуқра ва 3 биринҷӣ шарафёб шуданд. Медалҳои нуқраро Дилшод Назаров дар намуди гурзандозӣ, Шаҳриёр Даминов дар намуди қайиқронӣ, Беҳрӯз Хоҷазода дар намуди кураш, Умед Ҳасанбеков дар намуди самбо, медалҳои биринҷиро Комроншоҳ Устопириён дар намудҳои дзюдо ва самбо, Шакармамад Мирмамадов дар намуди дзюдо ба даст оварданд.
Дар ҷаласа ҳамчунин изҳори нигаронӣ карда шуд, ки Федератсияи байналмилалии самбо варзишгари тоҷик Умед Ҳасанбековро барои истифодаи доруҳои мамнуъ (допинг) муттаҳам кардааст.
Сипас аз номи Президенти Кумитаи миллии олимпӣ, Пешвои миллат муҳтарам Эмомалӣ Раҳмон дар баробари Ҷоизаи Президенти Тоҷикистон, ки охири сол тақдим мешавад, ба ҷоизадорони Бозиҳои Осиё сипоснома ва мукофотпулӣ тақдим карда шуд.
Барандагони медалҳои нуқра дар ҳаҷми 5000 сомонӣ ва барандагони медалҳои биринҷӣ дар ҳаҷми 3000 сомонӣ мукофотпулӣ гирифтанд.
Ҳамчунин, барои иштироки фаъолонаи дастаи мунтахаби наврасони Тоҷикистон дар Чемпионати Осиё-2018, ки аз 20 сентябр то 7 октябр дар Малайзия доир гашт, ба даст овардани ҷои дуюм ва медалҳои нуқраи ин чемпионат Федератсияи футболи Тоҷикистон бо Ифтихорномаи Кумитаи миллии олимпӣ сарфароз гардонида шуд.
Аъзои комиҷроияи Кумитаи миллии олимпӣ аз рӯи масъалаҳои рӯзномаи ҷаласа иштироки дастаи мунтахаби Тоҷикистонро дар Бозиҳои олимпии наврасон, ки 6-18 октябр дар Буэнос Айреси Аргентина баргузор шуданд, натиҷагирӣ карда, оид ба иштироки Тоҷикистон дар аввалин Бозиҳои соҳилии ҷаҳон, ки соли оянда дар Сан Диегои ИМА ба нақша гирифта шудааст, ҳамчунин, иштироки варзишгарон дар мусобиқаҳои литсензионӣ барои дарёфти роҳхат ба Бозиҳои тобистонаи олимпии Токио-2020 муҳокимаронӣ намуданд.
Рӯйхати варзишгарон ҷиҳати дарёфти дастгирии молиявии Ҳамбастагии олимпӣ барои омодагӣ ва ба даст овардани роҳхати Бозиҳои олимпии Токио-2020 дар асоси натиҷаҳои нишондодаи як соли охири варзишгарон иваз карда шуд. Аз ҷумла, зикр гардид, ки бо сабаби танишҳо миёни Кумитаи байналмилалии олимпӣ бо Федератсияи байналмилалии бокси ҳаваскорӣ давоми як сол мо натавонистем ба се варзишгари ин намуд дастгирии молиявӣ расонем. Ҳамчунин, варзишгардухтар дар намуди каратэ Фарангис Баҳромзода бо сабаби ба шавҳар баромаданаш аз варзиш канор рафт ва маблағи ҷудошуда ба ӯ давоми як сол истифода бурда нашуд.
Ҳамин тариқ, бо дастгирии комиҷроияи Кумитаи миллии олимпӣ рӯйхати нави варзишгарон ҷиҳати дарёфти дастгирии молиявии Ҳамбастагии олимпӣ барои Бозиҳои олимпии Токио-2020 тасдиқ шуд:
1.Назаров Дилшод (варзиши сабук) – 1000 доллари ИМА;
2. Даминов Шаҳриёр (қайиқронӣ) – 800 доллари ИМА;
3. Устопириён Комроншоҳ (дзюдо) – 700 доллари ИМА;
4. Хоҷазода Беҳрӯз (дзюдо) – 600 доллари ИМА;
5. Раҳимов Темур (дзюдо) – 500 доллари ИМА;
6. Боқиев Суҳроб (дзюдо) – 300 доллари ИМА;
7. Маҳмадбеков Сомон (дзюдо) – 300 доллари ИМА;
8. Қаландарова Шоҳида (дзюдо) – 300 доллари ИМА;
9. Ҳалимова Моҳру (таеквондо) – 300 доллари ИМА;
10. Климик Карина (шиноварӣ) – 200 доллари ИМА;
11. Гулсунбӣ Шарифова (варзиши сабук) – 200 доллари ИМА;
12. Мунира Бобоҷонова (қайиқронӣ) – 200 доллари ИМА;
13. Саидҷон Гулов (гуштини озод) – 200 доллари ИМА;
14. Мадина Мадкаримова (таеквондо) – 200 доллари ИМА;
15. Абдулҳаев Суҳроб (гуштини юнонӣ-римӣ) – 200 доллари ИМА.
Варзишгарони номбаршуда баъд аз мувофиқа бо Кумитаи байналмилалии олимпӣ аз моҳи январи соли 2019 то сентябри соли 2020 ба гирифтани дастгирии молиявии Ҳамбастагии олимпӣ мушарраф мешаванд.
Нет комментариев