Рӯзи 13 феврали соли 2018 дар Муассисаи давлатии Кохи фарҳанги ба номи Абӯабдуллоҳ Рӯдакии маркази вилоят маросими қадршиносии варзишгарони беҳтарини вилоят доир шуд. Дар ҷамъомад, ки таҳти раёсати иҷрокунандаи вазифаи Раиси вилоят Раҷаббой Аҳмадзода ва бо иштироки роҳбарони воҳидҳои сохтории мақомоти иҷроияи ҳокимияти давлатии вилоят, ректорон ва директорони муассисаҳои таҳсилоти олӣ ва миёнаи махсуси маркази вилоят, муовини раисони шаҳру ноҳияҳо, директорони мактабҳои варзишии вилоят, варзишгарону мураббиён, собиқадорон, кормандони соҳаи варзиши вилояти Суғд ва намояндагони воситаҳои ахбори омма доир гардид, аз фаъолияти варзишгарони вилоят дар соли 2017 натиҷагирӣ шуд. Соли гузашта беш аз 3100 нафар варзишгарони вилоят, аз ҷумла 480 нафар духтарон дар 100 мусобиқаи ҷумҳуриявӣ, инчунин 404 нафар варзишгарон, аз ҷумла 13 нафар бонувон дар 44 мусобиқаи байналмилалӣ иштирок намуда, ба гирифтани ҷойҳои намоён сазовор гардиданд. Аз ҷумла, варзишгарони вилоят Комроншоҳи Устопириён дар Чемпионати Осиё оид ба гӯштини дзюдо дар Ҷумҳурии мардумии Чин ба гирифтани ҷойи якум, Ҷаҳон Қурбонов дар Чемпионати Осиё оид ба бокс дар Ҷумҳурии Ӯзбекистон ҷойи сеюм, Беҳрўз Гулмаҳмадзода дар бозиҳои Осиё оид ба гӯштини камарбандӣ дар иншоотҳои варзишии болопӯшида дар Ҷумҳурии Туркманистон ҷойи дуюм, инчунин Асрор Воҳидов дар чемпионатҳои Ҷумҳурии Тоҷикистон оид ба бокс, Кристина Пронженко оид ба варзиши сабук ва Сухроҷ Азизов оид ба гӯштини юнонӣ-румӣ ҷойи якум мушарраф шуданд. Раҷаббой Аҳмадзода бо истифода аз фурсати муносиб ҳамаи ғолибони мусобиқаҳои варзиширо барои пирўзиву дастовардҳояшон дар соли 2017 –ум табрику таҳният гуфта, ба фаъолияти ояндаашон муваффақият ва дастовардҳои тоза таманно намуд. Дар баробари зикри дастовардҳо роҳбари вилоят аз камбудиҳои мавҷуда низ ёдовар шуд ва ҷиҳати онҳо ба масъулин супоришҳои мушаххас дод. Сипас дар вазъияти тантанавӣ ба 55 нафар варзишгарон ва собиқадорони соҳаи варзиш Сипоснома ва туҳфаҳои пулии мақомоти иҷроияи ҳокимияти давлатии вилоят дар ҳаҷми аз 500 сомонӣ то 2000 сомонӣ супорида шуд.
Манбаъ:сомонаи расмии МИҲД-и вилояти Суғд
Нет комментариев