Моҳи августи соли 2013-ум рамзшиканон эҳтимол маълумоти шахсии наздики 1 миллиард истифодабарандаи ширкати бузурги электронӣ ва шабакаи иҷтимоии «Yahoo» дастрасӣ пайдо кардаанд. Хакерон ба саҳифаҳои истифодабарандагони сомонаи электронӣ ворид шуда, шарҳи ҳол, рамз ва телефонҳои мобилии онҳоро дастрас намудаанд.
Ба иттилои ширкати «Yahoo » маълумот оид ба кортҳои қарздиҳанда ва суратҳисобҳои бонкӣ, ки дар системаи махсус маҳфуз мебошанд, мавриди ҳамлаи рамзшиканон қарор нагирифтааст. Моҳи сентябри соли равон ширкат дар бораи ифшои бузурги маълумоти истифодабарандагони соли 2014-ум хабарро интишор дода буд. Он замон маълумоти 500 миллион истифодабаранда аз ҷониби хакерон рабуда шуда буд.
Ба андешаи намояндагони ширкати «Yahoo» дар ҳамлаи бузурги соли 2014-ум ҳукумати як кишвар даст дорад. Ин ширкати бузурги электронӣ соли 1995-ум дар Амрико ташкил гардида, аз ҷиҳати нуфуз дар ҷаҳон дуюмин системаи ҷустуҷӯкунанда ба ҳисоб меравад. Аммо солҳои ахир «Yahoo» ба хисорот рӯ ба рӯ шудааст. Ҳаҷми зарари ширкат дар соли 2015-ум ба 4,4 миллиард доллар баробар гардид.
Моҳи июли соли равон маълум шуд, ки ширкати телекоммуникатсионии «Verizon Communications» онро бо арзиши 1 миллиарду 830 миллион доллар харидорӣ менамояд. Ширкати «Microsoft»-и Амрико соли 2008-ум барои харидории «Yahoo» 44,6 миллиард доллар пешниҳод намуда буд, ки ин нишондод нисбат ба дархости «Verizon Communications» 10 маротиба зиёд мебошад.
Нет комментариев