Ноҳияи Зафаробод — яке аз ноҳияҳои вилояти Суғд аст. Маркази ноҳия шаҳраки Зафаробод. Ноҳия20 декабри соли 1965 ташкил шудааст. Аҳолӣ: 67,4 ҳазор нафар. Масоҳат: 441,0 км². Масофа: аз маркази ноҳия то Хуҷанд 106 км.
Ноҳия солҳои 1960-1965 ташкил шудааст. Оғози солҳои 1970 аз водии Яғноб мардум ба ин ноҳия муҳоҷир шудаанд. Ба ноҳия аз дигар шаҳру навоҳии гирду атроф аз ҷумла, аз ноҳияҳои Айнӣ , Шаҳристон , Хуҷанд, Ғончӣ ва аз Ҷумҳурии Узбекистон омада, муқимӣ гаштаанд. Дар даврони шӯравӣ дар ноҳия намояндагони дигар халқу миллат (аз ҷумла, русзабону кореягиҳо, тотору чувашҳо ва ғайра) низ истиқомат мекарданд. Алҳол асоси ноҳияро мардуми тоҷикзабон ва ӯзбекзабон ташкил медиҳад. Дар солҳои аввали азхудкунии биёбони Мирзочӯл дар ин мавзеъ ҳамагӣ ду деҳа бо 60 хоҷагӣ вуҷуд дошт. Алҳол, баъди гузашти зиёда аз ним аср ноҳия дорои 18 деҳа, се шаҳрак ва даҳҳо маҳалҳои аҳолинишин мебошад.
Зафаробод ноҳияи аграрӣ буда, кишоварзӣ шуғли асосии сокинони он ба ҳисоб меравад. Парвариши пахта, яке аз соҳаи сердаромад ва содиротӣ ноҳия мебошад. Зеро зиёда аз 90 фоизи маҳсулоти саноатии ноҳия аз истеҳсоли пахта вобаста аст. Ғайр аз ин, пахтакорӣ сарчашмаи муҳайё кардани ҷойи корӣ ва манбаи хуби даромади аҳолӣ мебошад. Қисми бештари заминҳои ноҳияи Зафаробод бо усули обёрии мошинӣ бо об таъмин карда мешавад.
Солҳои аввали соҳибистиқлолӣ дар ноҳияи Зафаробод ягон корхонаи саноатӣ вуҷуд надошт. Дар зарфи 25 сол дар ноҳия 15 корхонаи нави саноатӣ таъсис дода шуд, ки дар онҳо садҳо нафар сокинони ноҳия бо ҷойи кор таъмин гардидаанд. Аксари корхонаҳо фаъолияти мавсимӣ дошта, дар давоми сол ҳамагӣ чор-панҷ моҳ кор мекунанд.
