14 феврали соли 2020, соати 9:00, дар Китобхонаи миллии Тоҷикистон дар мавзӯи «Роҳ ва усулҳои муосири муқовимат ба таҳдиду хатарҳои замони муосир, бахусус ифротгароии хушунатомез дар байни ҷавонон» Форуми ҷумҳуриявӣ доир мегардад.
Форуми мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо вазорату идораҳо, ташкилоту муассиса ва шарикони рушд роҳандозӣ шуда, мақсад аз он омӯзиши роҳҳои паст кардани шиддати ифротгароӣ миёни наврасону ҷавонон, мубориза бар зидди гурӯҳҳои ҷудоиандоз, махсусан гурӯҳҳои дорои хусусияти террористӣ ва экстремистӣ мебошад. Инчунин дар форум пешгирии бемориҳои сироятӣ, рушди тарзи ҳаёти солим ва дигар масъалаҳои муҳими ҳаёти ҷавонон мавриди баррасӣ қарор дода мешаванд.
Тавре аз Кумитаи кор бо ҷавонон ва варзиш ба АМИТ «Ховар» хабар доданд, дар Форуми ҷумҳуриявӣ кормандони сохторҳои ҳифзи ҳуқуқ, аз ҷумла Прокуратураи генералӣ ва сохторҳои он дар шаҳру ноҳияҳои мамлакат, судяҳо, кормандони ҷавони вазорату идораҳо, олимон ва муҳаққиқон иштирок намуда, доир ба масъалаҳои дахлдор маърӯза менамоянд.
Форум дар ду бахш доир шуда, дар анҷоми он қатънома қабул карда мешавад.
Манбаъ: АМИТ «Ховар»
Нет комментариев