Бо мақсади иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба аъзои Ҳукумати Ҷумҳурии Тоҷикистон ва дигар хизматчиёни давлатӣ дар самти саҳмгузорӣ дар корҳои ободониву бунёдкорӣ бо ташаббуси Раиси вилояти Суғд Раҷаббой Аҳмадзода муассисаи таълимии рақами 5-уми шаҳри Хуҷанд ва иншооти ёрирасони он таъмир карда шуд.
Раиси вилоят Раҷаббой Аҳмадзода ба ин муассисаи таълимӣ ташриф оварда, бо хонандагону устодони боргоҳи маърифат суҳбат намуд. Дар рафти суҳбат қайд карда шуд, ки бо дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи маорифи кишвар сол аз сол рушд намуда, барои таълиму тарбияи насли наврас тамоми шароитҳои зарурӣ фароҳам оварда шудааст. Бо шарофати сиёсати маорифпарваронаи Сарвари давлат давоми чанд соли охир хатмкунадагони муассисаҳои таҳсилоти миёнаи умумии кишвар тавассути Маркази милли тестии назди Президенти Ҷумҳурии Тоҷикистон ба донишгоҳу донишкадаҳо бе ягон монеа дохил шуда истодаанд.
Ба ифтихори эълон шудани “Соли рушди сайёҳӣ ва ҳунарҳои мардумӣ” дар саҳни мактаб намунаи маҳсули ҳунарҳои миллӣ ва дастовардҳои хонандагон ба маърази тамошо гузошта шуд. Зимни муаррифии дастовардҳо ба Раиси вилоят иттилоъ доданд, ки дар муассисаи таҳсилоти миёнаи умумии рақами 5 беш аз 1400 нафар ба таҳсил фаро гирифта шудаанд. Толибилмон бо истифода аз имкониятҳои мавҷудаи таълим дар озмуну олимпиадаҳо ва мусобиқаҳои гуногун иштирок намуда, сазовори ҷойҳои ифтихорӣ гардидаанд.
Ба муносибати анҷомёбии соли таҳсили 2017-2018 Раиси вилоят бо кормандони соҳаи маорифи шаҳри Хуҷанд ва ҷомеаи меҳнатии муассисаи таҳсилоти миёнаи умумии рақами 5 мулоқот намуд.
Пас аз суханронии Раиси вилоят роҳбарияти шаҳри Хуҷанд доир ба корҳои ободониву созандагие, ки дар ҳудуди шаҳр ҷараён дорад, маълумот дод.
Сипас, Мирзобахтиёр Мирзобаҳодуров, соҳибкори муваффақ, дастпарвари МТМУ №5 баромад намуда, ин иқдоми Раиси вилоятро арҷгузорӣ ба хидмати омӯзгорону устодон унвон намуда, ваъда дод, ки аз ҳисоби маблағҳои захиравии хеш МТМУ №11-и шаҳри Хуҷандро азнавсозӣ хоҳад намуд.
Дар охир аз тарафи Раиси вилоят Раҷаббой Аҳмадзода ба маъмурияти мактаб 2 адад тахтаи электронӣ, 10 адад компутер ва принтерҳо тақдим гардид.
Манбаъ: Хадамоти матбуоти Раиси вилояти Суғд
Нет комментариев