Тоҷикон дар Чемпионати Осиё 2 медал ба даст оварданд

0
632 просмотров

Варзишгарони шинохтаи тоҷик дар Чемпионати Осиё оид ба гӯштини юнонӣ-римӣ миёни ҷавонон ду медали биринҷӣ ба даст оварданд. Ёдовар мешавем, ки аз шурӯъ аз 17 июл дар шаҳри Деҳлии Ҳиндустон Чемпионати Осиё оид ба гӯштини озод ва юнонӣ-римӣ миёни ҷавонон  ҷараён дорад.

Тавре аз Кумитаи миллии олимпии Ҷумҳурии Тоҷикистон ба хабарнигори АМИТ «Ховар» иттилоъ доданд, дар рӯзи аввали рақобатҳо варзишгари шинохтаи  тоҷик Азмуддин Ваҳҳобов дар вазни 130 кг сазовори медали биринҷӣ гардид. Ӯ дар даври чорякфинал бар варзишгари Амороти Муттаҳидаи Араб Бадер Алӣ Аҳмаднур Ҳасан Алалӣ бо ҳисоби 9:0 ғалаба карда, дар нимфинал аз варзишгари мизбон Арйан Панвар бо ҳисоби 4:5 мағлуб гардид. Азмуддин сипас дар рақобат барои ҷои сеюм бар варзишгари Япония Акимишӣ Сакаӣ бо ҳисоби 8:0 пирӯз шуд.

Паҳлавони  дигари тоҷик Далер Розиқов низ дар вазни 77 кг рақобатро аз даври чорякфинал оғоз карда, аз варзишгари кишвари мизбон Саҷан Саҷан ва дар қувваозмоӣ барои ҷои сеюм аз варзишгари Кореяи Ҷанубӣ Сингван Лӣ шикаст хӯрд.


Дар рӯзи дуюми мусобиқа паҳлавони ҷавони  тоҷик  Бахтовар Ҳасанов дар вазни 72 кг вориди рақобат шуд. Ӯ дар рақобати аввал варзишгари Чин Чуан Жангро бо ҳисоби 8:0 мағлуб кард, вале дар нимфинал аз варзишгари Қирғизистон Бексултон Назарбоев бо ҳисоби 0:5 шикаст хӯрд. Сипас, ӯ дар рақобат барои ҷои сеюм ҳарифаш Ҷиун Ҷонг аз Кореяи Ҷанубиро бо ҳисоби 9:0 мағлуб кард.

Имрӯз  дар гӯштини  байни бонувон  Шоира Раҷабова  дар вазни 50 кг  ва 21-22 июл дар намуди гӯштини озод варзишгар Саидҷон  Гулов дар вазни 57 кг ва Муборакшо  Қурбонбеков дар вазни 65 кг Ҷумҳурии Тоҷикистонро намояндагӣ мекунанд.

Ёдовар мешавем, ки Чемпионати Осиё оид ба гӯштини озод ва юнонӣ-римӣ миёни ҷавонон дар шаҳри Деҳлии Ҳиндустон то 22 июл идома карда, варзишгарони тоҷикро дар чемпионат мураббиён Абдурозиқ Олимов ва Мурод Ҳомидов ҳамроҳӣ доранд.

Манбаъ: АМИТ «Ховар»

Нет комментариев

Также рекомендуем