Имрӯза маслиҳатҳои манфиатбахши мо оиди интихоб ва истифодабарии дарзмол бо таги металлии гармшаванда мебошад.
Мехоҳам дар оғоз Шуморо андаке бо таърихи пайдоиши дарзмол шиносоӣ намоям. Дар гузашта дарзмол ба монанди як таначӯби дарози дандонадор намуд дошт. Онро «рубел» меномиданд. Кадбону матоъро ба таначӯби оддӣ печонида, бо таначӯби дандонадор онро такон медод. Аз ҳисоби расидани дандонаҳо матоъ мулоим гашта, то қадри имкон дарзмол мешуд. Дар мобайни асри ХYIII дарзмолҳое пайдо шуданд, ки дар дохилаш ангишти сӯхтаистода ҷойгир буд. Пораҳои ангишти гарм ба рӯи матоъ фаромада, онро сӯрох мекард. Дертар дарзмолҳои спиртӣ баромаданд. Ба чалакчаи дарзмол спиртро андохта, онро месӯзонданд. Дар асри XIX чунин дарзмолро бо рамаи гӯсфанд иваз кардан мумкин буд. Дар соли 1903 дарзмоли барқии ихтирокори амрикоӣ Эрл Ричард меҳнати кадбонуҳоро осон гардонид. Соли 1905 дарзмоли ихтирокори мазкур беҳтаргардонида шуда, 100 соли охир инсоният онро истифода мебарад.
Дарзмоли муосир ба ширкатҳои маълуми ҷаҳонӣ «Сименс, Скарлетт, Витек, Ровента, Кенвуд, Бош» мансубият доранд. Дарзмоли ширкатҳои мазкур тез гарм шуда, ҳарорати он ба меъёр мутобиқ аст. Таги дарзмолҳо аз маводҳои гуногун тайёр карда мешаванд. Дарзмолҳои бот аги алюминӣ сабуквазн буда, ботезӣ гарму хунук мешаванд, либосро босифат дарзмол мекунанд. Дарзмолҳо бо таги пӯлодини зангназананда устувор ва боэътимоданд, лек вазни калон доранд. Дарзмолҳо бо таги керамикӣ лағжиши хуб доранд. Дарзмолҳои бо таги муқобили сӯхт матоъро намесӯзонанд. Интихоби дарзмол ин ё он намуди дарзмол ба табъи шумо вобаста аст. Дарзмолҳои муосир бо буғдиҳии дастӣ ва автоматикӣ таҷҳизонида шудааст. Агар буғдиҳии автоматикӣ нокифоя бошад, шумо метавонед буғдиҳии дастиро истифода баред. Кисмҳои либосро, ки дарзмолашон душвор аст метавонед бо воситаи буғ коркард намоед. Агар сӯрохиҳои таги дарзмол дар тамоми масоҳати он якхела ҷойгир шуда бошад, пас намидиҳии мунтазам ба амал меояд. Истифодабарии дарзмоли бесим қулай аст, лек тез хунук мешавад. Барои ҳамин дарзмоли симдорро интихоб намоед. Дар хотир доред, ки сим бояд ба танаи дарзмол бо шарнирҳо пайваст карда шуда бошад.
Азизон, Портали «Тироз» якчанд маслиҳатҳоро оиди тарзи дарзмолкунӣ ба диққати шумо мерасонад. Либосҳоро дар тахтаи дармолкунӣ дарзмол кунед. Матоҳои пахтагӣ ва зағириро ба намуди намонам бо дарзмоли гарм, матои пашмиро аз тарафи чаппааш бо воситаи докаи нам, либосҳои идонаро эҳтиёткорона дарзмол намуда, либосҳои синтетикиро беҳтараш буғ диҳед. Дар вақти дарзмолкунӣ агар ҷилоҳои рахдор намудор гардад, онро бо матопораи нам пок карда, бо буғ коркард намоед, ё ин ки либосро аз тарафи чаппа дарзмол кунед. Чойпӯшҳои хобро албатта дарзмол кунед, то ки ҳамаи микробҳои зараррасон нест гарданд.
Агар таги дарзмолатон чиркин гардад, онро бо ёрии қалами махсус, ки дар мағозаҳо фурӯхта мешавад, тоза кардан мумкин аст. Агар дастраскунии чунин қалам душвор бошад, шумо метавонед ба рӯи коғаз намак пошида, онро дарзмоли гарм пахш кунед. Агар дарзмолатон филтр надошта бошад, дар ҳолати истифодабарии буғ карахш пайдо гаштанаш мумкин аст. Ба дарзмол маҳлули оби 9 фоиза уксусдорро андохта, пас аз 1 соат дарзмолро даргиронда ба реҷаи буғдиҳии иқтидор гузаронед. Ба дарзмол доимо ё оби ҷӯшонидашуда, ё оби тозаи дистилизасия карда шударо андозед. Риоя ба қоидаҳои мазкур мӯҳлати истифодабарии дарзмолатонро бо таги металлии гармшаванда дароз мегардонад.
Ин буд чанд маслиҳатҳои мо оиди интихоб ва истифодабарии дурусти дарзмол бо таги металлии гармшаванда.
Нет комментариев