Дар ҳошияи мулоқоти Раиси вилояти Суғд Раҷаббой Аҳмадзода бо ҷавонони фаъоли вилоят дирӯз дар Донишгоҳи давлатии ҳуқуқ, бизнес ва сиёсати Тоҷикистон бо донишҷӯён вохӯрии судманд доир шуд.
Дар чорабинии мазкур раиси Кумитаи иттифоқи касабаи кормандони маориф ва илми вилоят Мусобек Мироватов, мудири кафедраи ҳуқуқи ҷиноятӣ, криминалистика ва пешгирии коруппсия Нарзулло Ахмедов, раиси Кумитаи муттаҳидаи иттифоқи касабаи донишгоҳ Аминҷон Амонов баромад намуданд.
Дар вохӯрӣ таъкид гардид, ки дар шароити кунунии ҷаҳонишавӣ тамоми ҷомеаи башариро зуҳуроти номатлуби терроризм, экстремизм, гардиши ғайриқонунии маводи мухаддир ва афзоиши ҷиноятҳои фаромарзӣ ба ташвиш оварда, ба амнияти миллӣ ва давлатии кишварҳои олам хатари ҷиддӣ эҷод мекунад. Бо назардошти ин Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо таъкид кардаанд, ки ҳар як фарди ҷомеа бояд нисбати ин зуҳуроти манфии аср бетараф набошанд.
Қайд гардид, ки дар пешгирии ҳодисаҳои номатлуб, шомилшавии ҷавонон ба ҳизбу ҳаракатҳои иртиҷоӣ ҳар як узви комилҳуқуқи ҷомеа саҳмгузор бошад. Дар интиҳои мулоқот аз ҳозирин даъват ба амал оварда шуд, ки дар роҳи мубориза бар зидди ҷинояту ҷинояткорӣ, шомилшавии ҷавонону наврасон ба ҳизбу ҳаракатҳои ифротӣ ва нашъамандиву оворагардӣ ҳамроҳи мақомотҳои масъул муборизаи муштаракро ба роҳ монда, рисолати шаҳрвандии худро иҷро намоянд.
Ҳамзамон, аз ҷониби роҳбарияти Кумитаи иттифоқи касабаи кормандони маориф ва илми вилоят ва раёсати донишгоҳ ба устодону донишҷӯёни донишгоҳ баҳри дар амал татбиқ намудани дастуру супоришҳои давлату Ҳукумат дар самти мубориза бо падидаҳои номатлуб сипосномаву мукофотҳои пулӣ ва ба донишҷӯёни фаъол идрорпулӣ тақдим гардид.
Манбаъ: Хадамоти матбуоти Раиси вилояти Суғд
Нет комментариев