Субҳи имрӯз Президенти кишвар Эмомалӣ Раҳмон зимни маҷлиси васеи Ҳукумати Ҷуҳурии Тоҷикистон оид ба ҷараёни бартараф намудани оқибатҳои офатҳои табиӣ дар Вилояти Мухтори Кӯҳистони Бадахшон ва дигар ноҳияҳои ҷумҳурӣ ба масъулин супоришҳои мушаххас дод.
Сарвари давлат Эмомалӣ Раҳмон аз офатҳои харобиовари чанд соли пеш, ки дар дигар шаҳру ноҳияҳо рух дода, боиси хисороти зиёди моддию ҷонӣ шуда буданд ва ҳам аз муташаккилона бартараф карда шудани оқибатҳои он ёдовар шуда, изҳори бовар намуд, ки пайомадҳои офати табиии рӯзҳои 16 – 20-уми июли соли равон рухдода ҳам дар муддати кӯтоҳ бартараф гардида, тибқи нақша то 6-уми ноябри ҳамин сол осебдидагон бо манзили зист, ашёву асбоби рӯзгор ва маводи ғизоӣ таъмин карда шуда, ҳамзамон бо ин, иншооти иҷтимоӣ, роҳу пулҳо, хатҳои интиқоли барқ ва дигар иншооти зарардида аз нав барқарор карда мешаванд.
Дар баробари ин, ҳамчунин таъкид гардид, ки ҳар як шахси зарардида, аз кӯдак то калонсол, бо сару либоси тобистонаву зимистона ва ҳар як оила бо тамоми номгӯи асбоби рӯзгор, ҷиҳози хона, яхдону телевизор, гилему курпача, асбоби ошхона то риштаву сӯзан бояд таъмин карда шавад.
Зарур дониста шуд, ки ҳар як оилаи зарардида ба муҳлати то шаш моҳ бо маводи ғизоӣ ва дар фасли зимистони дарпешистода бо ангишт ва асбобу таҷҳизоти гармидиҳанда таъмин карда шавад.
Бо назардошти наздик омадани соли нави таҳсил ба масъулин дастур дода шуд, ки фарзандони оилаҳои осебдида дар мактаб фаро гирифта шуда, бо ҷиҳози хониш, сару либоси мактабӣ ва дигар шароити мусоиди таҳсил саривақт таъмин карда шаванд.
Хотиррасон бояд намуд, ки моҳи июли соли равон бар асари гармшавии иқлими сайёра сатҳи оби дарёҳо хеле баланд шуда, бисёр шаҳру ноҳияҳои кишвар, аз ҷумла ноҳияҳои Шуғнон, Ванҷ, Дарвоз, Рӯшон ва Рашту Тоҷикобод хисороти зиёди моддӣ ва ҷонӣ диданд. Хисороти оқибатҳои ин офати табиӣ беш аз 600 миллион сомониро ташкил медиҳад.
Бо мақсади шиносоии бевосита бо ҳолати баамаломада рӯзҳои 28-31 июли соли равон сафари кории Президенти кишвар Эмомалӣ Раҳмон ба шаҳру ноҳияҳои Вилояти Мухтори Кӯҳистони Бадахшон сурат гирифта, барои ба эътидол овардани шароити зиндагии мардум ва иншооти аз офати табиӣ зарардида як қатор тадбирҳои фаврӣ амалӣ карда шуд.
Аз ҷумла, дар Вилояти Мухтори Кӯҳистони Бадахшон ва ноҳияҳои Рашту Тоҷикобод комиссияи давлатии барқарорсозии оқибатҳои офати табиӣ таъсис дода шуда, сокинони зарардида бо бошишгоҳҳои муваққатӣ таъмин гардиданд ва барои бунёди манзилҳои истиқоматӣ аз мавзеъҳои бехатар қитъаҳои замин ҷудо карда шуд ва имрӯзҳо сохтмони хонаҳо босуръат идома дорад.
Инчунин барои таъмин бо нерӯи барқ, оби нӯшокӣ, барқарорсозии хатҳои интиқоли барқ, роҳу пулҳо ва расонидани кумак ба аҳолии зарардида ҳамаи ташкилоту идораҳои дахлдор сафарбар гардида, дар самти барқарорсозии инфрасохтори зарурӣ тамоми имкониятҳо мавриди истифода қарор доранд.
Тибқи маълумоти раиси комиссияи давлатии рафъи оқибатҳои офати табиӣ ҳоло ҷараёни иҷрои қарорҳои маҷлиси ғайринавбатии Ҳукумати кишвар ва дастуру супоришҳои Роҳбари давлат таҳти назорат қарор дошта, дар мавзеъҳои интихобшуда тадбирҳои саривақтӣ амалӣ шуда истодаанд.
Ҳоло аҳолии шаҳру ноҳияҳои вилоят бо нерӯи барқ, маводи озуқа ва дигар шароити зарурӣ таъмин буда, ба ҳамаи оилаҳои зарардида кумаки яквақтаи Роҳбари давлат ва дигар кумакҳои хайриявӣ расонида шуд.
Маҷлиси васеи Ҳукумати кишвар бо иштироки аъзои Ҳукумат, роҳбарони кумитаву агентиҳои назди Президент ва Ҳукумат, муассисаву идораҳои ҷумҳуриявӣ, Бонки миллӣ, Бонки давлатии амонатгузории “Амонатбонк”, бонкҳои тиҷоратӣ, ташкилоту корхонаҳо ва дигар шахсони масъул ҷараён дорад.
Дар маҷлис масъалаҳои зерин баррасӣ мешаванд:
— Вазъи корҳо оид ба бартараф намудани оқибатҳои офати табиии дар Вилояти Мухтори Кӯҳистони Бадахшон, ноҳияҳои Рашту Тоҷикобод ва дигар мавзеъҳои кишвар рухдода;
— Сарфакоронаву мақсаднок истифода бурдани маблағҳои буҷетӣ ва кам кардани хароҷоти дуюмдараҷа вобаста ба шиддати бӯҳрони ҷаҳонии молиявию иқтисодӣ;
— Омодагии ҳамаҷониба ба соли нави таҳсил;
— Ҳаматарафа омода намудани иншооти иҷтимоӣ ва аҳолӣ ба мавсими тирамоҳу зимистони солҳои 2015 – 2016.
Дар ин бора khovar.tj хабар медиҳад.
Нет комментариев