Раиси вилояти Суғд Абдураҳмон Қодирӣ бо мақсади шиносоӣ бо ҷараёни корҳои тозакунии соҳили дарёи Сир аз ин мавзеъ дидан намуд.
Бояд гуфт, ки айни замон бо дастуру супориш ва дастгириҳои Раиси вилоят корҳои тозакунии соҳили дарё аз қамиш ва алафҳои бегона ҷараён дошта, барои анҷоми корҳо зиёда аз 15 техникаи лозима ва 17 нафар мутахассисон ҷалб гардидаанд. Ин минтақаи соҳили дарё давоми 14 соли охир аз лойобаҳо тоза нагардида буд. Илова бар ин дар маркази шаҳр вуҷуд доштани растаниҳои худруйи обӣ ҳусни соҳили Сирдарёро коста гардонида, манбаи асосии паҳн шудани ҳашароти зараррасон шуда буд, ки онҳо маъмулан барангезандаҳои бемориҳои инфексионӣ мебошад.
Раиси вилоят зимни шиносоӣ бо ҷараёни корҳо таъкид дошт, ки шаҳри Хучанд бо дарёи Сири паҳновараш дар гузаштаву имрӯз ҳамчун шаҳри ободу зебо ва тозаву озода шинохта шудааст. Аз инрӯ бояд корҳои ободониву созандагӣ идома дода шудаву соҳили дарёи Сир ба як макони хуби истироҳату фароғат ва дилкашу зебо табдил дода шавад.
Абдураҳмон Қодирӣ илова намуд, ки пас аз анҷоми корҳои тозасозии соҳил дар ин мавзеъ бояд 2 ҷойи махсуси оббозӣ бо фароҳам овардани шароити хуби истироҳату фароғат ташкил карда шавад. Зеро табиат ва ҳавои форами соҳили дарёи Сир барои ташкили чунин корҳо хело мувофиқ мебошад. Илова бар ин шинонидани дарахтони ороишӣ дар ин мавзеъ мувофиқи матлаб арзёбӣ шуд.
Раёсати ҳифзи муҳити зисти вилоят ва шаҳри Хуҷанд ният доранд соҳили чапи дарёро аз кӯпруки асосии шаҳр то кӯпруки «Ҷашнӣ» ободу зебо намоянд.
Раиси вилоят ба масъулини Раёсати ҳифзи муҳити зисти вилоят ва дигар шахсони масъул дастур дод, ки бояд ба таври ҳамешагӣ соҳили дарёи Сир аз ҳар гуна партовҳо тоза карда шавад.
Дар ин бора http://sugd.tj/index.php/tj/navid/5321-khujand хабар медиҳад.
Нет комментариев