Дар Маҷмааи давлатии «Кохи Борбад» таҳти сарпарастӣ ва бо иштироки Президенти Ҷумҳурии Тоҷикистон Эмомалӣ Раҳмон Форуми байналмилалии соҳибкории Душанбе-2015 таҳти унвони «Саҳми соҳибкорӣ ва сармоягузорӣ дар рушди устувор» дар доираи таҷлили «Рӯзи соҳибкор» баргузор гардид.
Дар Форум намояндагони Ҳукумат ва вазорату идораҳои Ҷумҳурии Тоҷикистон, вакилони парлумони кишвар, намояндагони воломақоми ҳукуматҳои кишварҳои ҳамшарик, соҳибкорону сармоягузорони ватанию хориҷӣ, ширкатҳои бонуфузи хориҷӣ ва ҷумҳуриявӣ, бонкҳои тиҷоратӣ ва роҳбарони созмонҳои байналмилалии молиявӣ, ассотсиатсияҳои соҳибкорӣ, намояндагиҳои дипломатӣ, олимону коршиносони варзида, 350 ширкати сармоягузор аз 35 мамолики олам, дар маҷмуъ зиёда аз ду ҳазор нафар иштирок намуданд.
Президенти Ҷумҳурии Тоҷикистон Эмомалӣ Раҳмон дар ифтитоҳи Форуми байналмилалӣ дар назди иштирокчиёни сершумор суханронӣ карда, нахуст ба ҳамаи соҳибкорони ватанию хориҷӣ комёбӣ ва ба кори форум муваффақият орзу намуд.
Сарвари давлат Эмомалӣ Раҳмон ҳадаф аз баргузории форумро муаррифӣ намудани имкониятҳои сармоягузории Тоҷикистон, шароити мувофиқ барои муколама, баррасию дарёфти роҳҳои ҳалли муҳимтарин масоил ва мушкилоти иқтисодӣ, навгониҳои фазои сармоягузории мамлакат, ба роҳ мондани ҳамкориҳои мустақими тиҷоратию иқтисодӣ байни соҳибкорону сармоягузорони ватанию хориҷӣ, таҳкими ҳамкории дарозмуддат ва банақшагирии фаъолияти муштараки онҳо маънидод кард. Президенти мамлакат инчунин таъкид намуд, ки чунин чорабиниҳо барои густариши ҳамкориҳои иқтисодиву тиҷоратӣ байни кишварҳо ва бахусус байни соҳибкорону сармоягузорон мусоидат менамояд.
Зимни баромади хеш Президенти Ҷумҳурии Тоҷикистон Эмомалӣ Раҳмон бо таҳлилҳои амиқ дар бораи дастгирии соҳибкории хурду миёна, имтиёзҳои Ҳукумати ҷумҳурӣ, таъсиси фонди дастгирии соҳибкорӣ, натиҷаҳои мулоқоти қаблии Сарвари давлат бо соҳибкорон, иштироки тоҷирон ва сармоягузорони дохилию хориҷӣ дар рушди иқтисодиёти мамлакат, воридоти технологияҳои муосир, ифтитоҳи корхонаҳои муштараки саноатӣ, таъсиси ҷойҳои нави корӣ, афзоиши ҳаҷми истеҳсолу содироти молу маҳсулот ва дар маҷмуъ оид ба натиҷаи фаъолияти соҳибкорӣ дар ҷумҳурӣ андешаронӣ кард.
Сарвари давлат Эмомалӣ Раҳмон аз таъсири манфии вазъи мураккаби геосиёсии ҷаҳонӣ, коҳишёбии суръати рушди иқтисодӣ ва қурби асъори миллии шарикони асосии тиҷоратии кишварҳои мо ва тағйирёбии нархи молу маҳсулоти асосии содиротиву воридотӣ дар бозорҳои ҷаҳонӣ ба соҳаҳои иқтисодиву иҷтимоии мамлакатҳо изҳори нигаронӣ карда, иброз дошт, ки рушд ва таҳкими робитаҳои иқтисодии берунӣ бо ҳамаи мамлакатҳои дӯст ва шарик ҷиҳати ба таври пурра истифода бурдани имкониятҳои мутақобилан судманд вазифаи муҳимтарини сиёсати иқтисодии мо мебошад.
Дар ин давра суръати рушди миёнасолонаи маҷмӯи маҳсулоти дохилӣ то ба 7 фоиз расида, сатҳи камбизоатии аҳолӣ аз 53 фоизи соли 2007 то ба 32 фоиз дар соли 2014 коҳиш дода шуд ва сатҳу сифати зиндагии мардум бамаротиб беҳтар гардид.
Дар давоми солҳои 2000-2014 ҳаҷми маблағгузориҳо ба сармояи асосӣ аз 109 миллион сомонӣ то 7,4 миллиард сомонӣ ё 68 баробар ва шумораи корхонаҳои саноатӣ 1116 адад зиёд гардид.
Президенти мамлакат Эмомалӣ Раҳмон доир ба дастгирии бахши соҳибкорӣ андешаронӣ карда, изҳор дошт, ки бо мақсади рушди соҳибкории хурду миёна ва дастрасӣ ба захираҳои қарзии имтиёзнок Фонди дастгирии соҳибкорӣ таъсис дода шуд.
Фонди мазкур аз оғози фаъолияти худ то имрӯз ба 117 субъекти соҳибкорӣ бо фоизи паст дар ҳаҷми беш аз 95 миллион сомонӣ қарзҳои имтиёзноки дарозмуддат ҷудо намудааст, ки 47 шаҳру ноҳияи кишварро фаро мегирад.
Илова бар ин, барои дастгирӣ ва рушди соҳибкорӣ аз ҳисоби захираҳои қарзии низоми бонкӣ дар соли 2014 ба соҳибкорон ба маблағи қариб 9 миллиард сомонӣ ва дар 8 моҳи соли 2015 дар ҳаҷми 7 миллиард сомонӣ маблағҳо ҷудо карда шудаанд.
Зимни суханронии хеш Сарвари давлат Эмомалӣ Раҳмон дар бораи имкону захираҳои мусоиди сармоягузории Тоҷикистон, ҷалби сармояи хориҷӣ ба иқтисодиёти мамлакат, таҳкими ҳамкории бахши хусусӣ бо давлат, муаррифии мавзеъҳои таърихию фарҳангӣ ва захираҳои гуногуни табиӣ, таҳияи лоиҳаи як қатор санадҳои меъёрии ҳуқуқӣ андешаронӣ карда, ба иштирокчиёни сершумори форум муваффақият таманно кард.
Эмомалӣ Раҳмон расидан ба яке аз ҳадафҳои асосии ҳукумат — татбиқи лоиҳаи ҳукумати электрониро ба хотири таъмини шаффофи фаъолияти андозсупорандагон зарур шумурд.
Сарвари давлат инчунин ба иқдоми соҳибкорон дар самти ҷонибдории сиёсати иҷтимоии Ҳукумати мамлакат оид ба дастгирии табақаҳои ниёзманд диққати махсус дода, онро амри хеле муҳим ва зарурӣ арзёбӣ кард.
Президенти мамлакат Эмомалӣ Раҳмон ҳамаи иштирокчиёни форумро ба муносибати нахустин солгарди “Рӯзи соҳибкор” самимона муборакбод гуфта, ба соҳибкорону сармоягузорон фаъолияти пурсамар ва барору комёбӣ орзу намуд.
Дар охир Сарвари давлат Эмомалӣ Раҳмон бо итминон иброз дошт, ки натиҷаҳои ин форум, лоиҳаҳои нави кабулшаванда барои таъмини рушди иқтисодӣ ва баланд бардоштани сатҳи некӯаҳволии мардуми Тоҷикистон ва минтақа мусоидат хоҳанд намуд.
Инчунин Президенти мамлакат Эмомалӣ Раҳмон аз ташкилотҳои бонуфузи молиявии ҷаҳонӣ даъват ба амал овард, ки ба кишварҳои аз буҳрони ҷаҳонии молиявӣ зарардида ҳамаҷониба кумак расонанд.
Сарвари давлат изҳор дошт, ки дар навбати худ Ҳукумати Ҷумҳурии Тоҷикистон минбаъд низ ҳамкориро бо кишварҳои ҳамшарик ва институтҳои молиявӣ дар сатҳи матлуб идома медиҳад.
Дар Форум намояндагони кишварҳои хориҷӣ, созмонҳои байналмилалии молиявӣ ва сармоягузорони хориҷӣ, аз ҷумла директори минтақавии Корпоратсияи байналмилалии молиявӣ оид кишварҳои Осиёи Марказӣ Муаззам Мекан, директори минтақавии Бонки аврупоии таҷдид ва рушд оид ба кишварҳои Осиёи Марказӣ Масару Хонма, муовини Роҳбари Корпоратсияи байналмилалии тиҷоратию молиявии исломии Гуруҳи Бонки Исломии Рушд Ҳани Салем Сонбол, Роҳбари Ҷамъияти саҳҳомии кушодаи “Неругоҳи барқи обии Сангтуда — 1” Павел Лавров, Роҳбари минтақавии ширкати “Кока Кола” дар кишварҳои Иттиҳоди Давлатҳои Мустақил Осман Каздал ва Роҳбари ҶДММ «Корхонаи саноати куҳии Тоҷикистону Хитой» Ян Чжи Сай суханронӣ карда, ба Президенти Ҷумҳурии Тоҷикистон Эмомалӣ Раҳмон барои фароҳам овардани шароити мусоид дар фазои сармоягузории кишвар, дастгирии соҳибкории хурду миёна ва сиёсати дарҳои боз изҳори сипосу миннатдорӣ карданд. Баромадкунандагон уҳдадор шуданд, ки ҳамаи вазифаҳои дар пешгузоштаи худро оид ба мусоидат ба рушди иқтисодиёти Тоҷикистон ба таври самаранок иҷро менамоянд.
Дар анҷоми мулоқот Президенти кишвар аз иштироки фаъолонаи соҳибкорон дар форуми имрӯза ва саҳми онҳо дар пешрафти бахши соҳибкорӣ изҳори сипос намуд.
Вобаста ба иҷрои ҳадафҳои роҳбарияти давлат дар самти рушди иқтисодиёт ва дастгирии ҳамаҷонибаи бахши соҳибкорӣ Президенти мамлакат Эмомалӣ Раҳмон ба Ҳукумати ҷумҳурӣ ва сохторҳои дахлдор дастуру супоришҳои мушаххас дод.
Манбаъ: http://president.tj/
Нет комментариев