Зулфия Тӯйчиева, номе ҳаст барои ҳама ошно ва шояд нафаре нест, ӯро нашиносаду надонад. Ӯ як ҳунарманди шинохтаву касби асту ҳаводорони зиёдро дар саҳнаҳои театр пайдо кардааст. Зулфия Тӯйчиева ҳунарманди хушсалиқа асту хушгуфтор, вақте кас бо ин нафар ҳамсӯҳбат мегардад, аз сӯҳбати гарму самимиаш ҳаловати тоза мегирад. Ӯ актрисаи шинохта дар қаламрави вилоят ва ҷумҳурӣ мебошад, ки дар бисёр намоишномаҳо нақш бозидааст. Ин ҳунарманди оромтабиат оғози фасли баҳор, ки табиат бедор мегардад ва ҳамаҷо ба шукуфтанҳову рустанҳо табдил меёбад, 15-уми марти соли 1953 дар деҳаи Ҷуйи Бодоми ноҳияи Рӯдакӣ дар оилаи коргар ба дунё омадаст. Сарчашмаи комёбиву муваффақияти ҳунарпеша ҳангоми офариниши ҳар нақш, албатта диди хосаи ӯ ба мавқеи шаҳрвандиву маърифати ҳунариаш мебошад. Ӯ тӯли 40 сол мешавад, ки нақшофарини мекунад дар саҳнаи театру кино ва дили ҳазорон нафаро ба даст овардааст.
Зулфия Тӯйчиева, имрӯз дар театри мазҳака ва мусиқии ба номи Камоли Хуҷандӣ кор мекунаду инҷоро барои худ як даргоҳи муқаддас ва ҷойи азизу мӯътабар медонад.
Мавсуф чанде қабл дар меҳмонии барномаи «Ҳамроз»-и радиои мо буданду мо бо ин зани хоксору ҳалим ҳамсӯҳбат шудем.
Салом муаллима, сараввал Шуморо ба кошонаи радио хайрамақдам мегӯем.
Зулфия Тӯйчиева: Салом ба Шумо ва мухлисону ҳаводорони ин радио баландпарвози «Тироз».
Зулфия Туйчиева: меҳмони барномаи «Ҳамроз»
Чанд нукта дар бораи фаъолияти ҳунариатон қайд мекардед.
Зулфия Тӯйчиева: Оғози фаъолияти ман баъд аз хатми донишгоҳ соли 1976, дар театри А.С. Пушкин, ҳозира театри К. Хуҷандӣ сар шуда буд ва то ба имрӯз давом дорад. 40 сол инҷониб ман дар ҳаминҷо кор мекунам ва фаъолияти эҷодии худро мебарам.
Чун Шумо дар театр кор мекунед, аслан кор кардан дар театр мушкилиҳои зиёд дорад ё ба гуфти баъзе нафарон фикр мекунанд, инҷо кор кардан осон асту хеле содда, дар ин маврид чӣ гуфта метавонед?
Зулфия Тӯйчиева: Фикри шахсии ман ҳамин аст, ки басо касби мушкил аст. Мушкилии кори мо дар он аст, ки меҳнатро талаб мекунад. Вақте ки меҳнат накунӣ дар ҷодаи актиёрӣ, бояд бо касби худу саҳнаву театр хайрбод гӯӣ.
Қайд кардед, ки 40 сол мешавад дар театр кору фаъолият мебаред, мехостем инҷо бифаҳмем, ҳаминро худатон мехостед ва ё ногаҳон ин касбро интихоб кардед?
Зулфия Тӯйчиева: Меҳру муҳаббат нисбати санъат дар дили ман овони кӯчак буданам пайдо шуд ва мактаб мехондаму духтари хеле зиёд чаққон, ҳушёру зирак будам ва дар ҳама чорабиниҳои мактабӣ иштирок намуда, ягон нақшро иҷро мекардам.
Аслан, вақте ки Шумо ҳамин касбро барои худатон муносиб дидед ва хостед ҳунарманд бошед, волидайнатон зидди касби интихоб кардаатон набуданд?
Зулфия Тӯйчиева: Дар асл модарам зид буданд ва аслан он нафар намехостанд, ки ман ҳунарпеша шавам. Вақте ба он кас муроҷиат карда гуфтам, ки ман ҳамин касбро интихоб мекунам, гуфтанд: «Не духтарам, ту ин касбро интихоб карда наметавонӣ ва ман розигии худро дода наметавонам». Ман ба дили он кас роҳ ёфтаму модарамро розӣ кардам.
Ҳини сӯҳбат мо барои муаллима таронае, ки солҳои ҷавониашон зам-зама карда буданд гузоштем. Муаллима аз ин дар ҳайрат монданду хеле хушнуд гашта, дар бораи таърихи ин суруд чанд ҳарф заданд.
Зулфия Тӯйчиева: Ин якумин сурудест, ки ман дар театр хонда будам ва ин суруд ба оҳанги Одилҷон Назаров тааллуқ дорад. Вақте пас аз хатми донишгоҳ ман ба театр барои кор омада будам, Одилҷон Назаров дар он замон директори театр буданд. Акаи Одилҷон фаҳмиданд, ки ман суруд мехонам, ду сурудро барои зам-зама кардан ба ман пешниҳод сохтанд, ки яке аз онҳо ҳамин суруд буд.
Саволи шунаванда: Муаллима Зулфия Туйчиева, ман Тилло ҳастам аз ноҳияи Хуросони вилояти Хатлон ва ҳарчанд, ки равшанзамир ҳастам, аммо дар бораи Шумо маълумоти зиёд дорам. Мехостам ба ҳамин савол посух бигуед: Шумо метавонед бо шахсони маъюб алалхусус бо нафарони равшандил дӯстӣ дошта бошед?
Зулфия Тӯйчиева: Бале, ман хеле зиёд мехоҳам бо ҳама дӯст бошам. Ман омода ҳастам, ки бо Шумо шунавандаи азиз, ки дар ноҳияи Хуросон ҳастед, дӯстӣ дошта бошам.
Муаллима инҷо мегуфтед, ҳамин касбе, ки Шумо интихоб кардед, фарзандонатон интихоб карданд ва ё на?
Зулфия Тӯйчиева: Ба ростӣ ҳарду фарзандони ман дар театр кор намекунад, писарам дар радиои Шумо «Тироз» кор мекунад, яъне ин ҳам як санъат аст. Духтарам бошад дӯзанда аст.
Инҷо мехостам бифаҳмам, ки давоми 40 соле, ки дар театр кору фаъолият мебаред дар чанд намоишномаҳо нақш офаридаед?
Зулфия Тӯйчиева: Дар тӯли 40- сол, дар театр қариб, ки 100 образи занро дар саҳна офаридам. Якумин нақше, ки ман офаридам, баъд аз хатми донишгоҳ ин аз рӯи намоишномаи А.С. Пушкин «Лӯлиён» буд, ки ман дар он нақши Земфираро бозидам.
Ҳамон лаҳзае, ки барои Шумо нақш доданд, чӣ гуна лаҳза буд?
Зулфия Тӯйчиева: Медонед, як лаҳзае буд, ки ман худ ба худ мегуфтам: Ин ҳам як имтиҳони ҷиддии дигар аст барои ман. Ин образи марказӣ буд ва коркардони он Ислом Саломов буданд.
Он кас қайд карданд: «Бинам канӣ, аз ӯҳдаи ҳамин нақш баромада метавонӣ ё не» Ман тавонистам бо сари баланд аз ӯҳдаи ин нақш бароям.
Фарқият байни театр ва кино дар чист?
Зулфия Тӯйчиева: Фарқият байни театр ва кино хело калон аст, ростӣ ман дар ду филм иштирок кардаам. Бояд бигӯям, ки дар кино нақш бозидан албатта мушкил аст, вале дар театр боз ҳам мушкилтар аст.
Театр аҷоибиаш дар он аст, ки агар имрӯз нақш офаридӣ ва онҷо камбудӣ шуд, онро ислоҳ карда наметавонӣ. Дар кино бошад, онро сабт мекунанд ва онро мебиниву камбудиатро мефаҳмӣ ва худ ба худ мегӯи, ки инҷо агар ин хел нақш меофаридам, хубтар мешуд. Мушкил, ҳар ду ҳам мушкил аст.
Муаллима инҷо мегуфтед, ки имрӯз барои чӣ таваҷҷӯҳи мардум ба театр коста шудааст?
Зулфия Тӯйчиева: Ба фикри ман, мегӯянд драмматургия нест ё актиёру актриса намерасад. Шояд зиндагӣ 
ҳамин чизро талаб мекунад, ки бисёртар тамошобини мо назар ба театр рӯй овардан, дар назди телевизион ёмбош зада тамошо карданро авлотар медонанд. Лекин ин чиз аз коргардон ва ҳам аз дармматургия вобастааст. Шояд мо дар ин худамон ҳам гунаҳкор бошем, ки имрӯз тамошобин ба театр намеояд.
Таманниёти Шумо барои мухлисону ҳаводоронатон ва шунавандагони мо?
Ба мухлисон ҳаминро гуфтанӣ ҳастам, ки ба театр биёянд ва аз он дур нашаванд. Мехоҳам, ки толори театр пур аз тамошобин бошад ва мо санъаткорон дар хизматашон бошем. Умри дароз бинанд ва тани сиҳат дошта бошанду аз театр дур нараванд, зеро театр оинаи зиндагӣ аст.
Дар фарҷом, мо низ аҳли гурӯҳи эҷодии радиои «Тироз» ба Шумо хушҳолиҳои зиёдро таманно дорем. Бигузор, ки ҳамеша дар лабонатон ханда бошаду ҳеҷ вақт аз мухлисону ҳаводорони худ дур нашавед.
Зулфия Туйчиева дар меҳмонии Радиои «Тироз»
Сӯҳбатнигор: Эшқул Файзуллоев
Нет комментариев