Чун дар замони Иттиҳоди Шӯравӣ таваллуд шудаву ба воя расидаам, ҳар сол таҷлили Соли нави мелодӣ ба ҳукми анъана даромада, дар хотирам нақш бастааст. Ҳарчанд, ки мусалмонтабор мебошаму дини Исломро парастиш менамоям, лек ҷашнгирии Соли навро муҳим мешуморам. Зеро, давлати мо Тоҷикистон ном дораду бо вуҷуди он, ки 90 дарсади шаҳрвандон мусалмонон мебошанд, солшуморӣ ва тақвими мо дар асоси солшумории григорианӣ сурат мегирад. Агар мо — шаҳрвандони Тоҷикистон ба монанди чанде аз давлатҳои исломӣ аз рӯи солшумории ҳиҷрии қамарӣ ё ҳиҷрии шамсӣ зиндагӣ кардаву фаъолият мебурдем, шояд таҷлили Соли нави мелодӣ он қадар зарур намебуд!
Вале, бори дигар мегӯям, ки алҳол мо аз рӯи солшумории григорианӣ умр ба сар мебарем ва пас аз чанд рӯз насиб бошад, Соли нави мелодии 2016-умро пешвоз мегирем.
Чизи дигар, шояд аз давраи қадим бошад, солшуморӣ ё худ мучали моро низ дар асоси тақвими шарқ, яъне, ҳар сол ба номи ягон ҳайвон номбар менамоянд. Масалан, соли рафтаистодаи 2015-ум чун соли “гӯсфанд” ба ҳисоб мерафту Соли нави 2016-ум аз рӯи тақвими шарқ соли “маймун” мебошад. Дар 12 сол як маротиба ин номгӯй такрор мешавад. Дар хотир дорам, ки ҳатто бобову бобокалон ва модаркалону бибиҳоям низ маҳз дар асоси ҳамин солшуморӣ зиндагӣ кардаву аз рӯи мучал (тақвими шарқ) ба соли кадом ҳайвонот рост омадани соли таваллудашонро барои мо набераву абераҳояшон нақл мекарданд. Яке мегуфтанд, ки ман дар соли асп, дигаре мегуфтанд, ки дар соли муш, сеюмӣ дар соли маймун ба дунё омадаам.
Аз ин бармеояд, ки чанд насли гузаштаи мо низ маҳз аз рӯи солшуморӣ ё тақвими григорианӣ зиндагӣ кардаанд. Исботи ин гуфтаҳо шиноснома (паспорт)-и онҳо буд, ки шахсан камина онро бо чашми худ дидаам.
Модоме, ки чанд насли гузаштаи мо дар асоси солшумории григорианӣ умр ба сар бурдаанд ва соли нави мелодиро парастидаанд, чаро мо имрӯз аз ҷашнгирии Соли нави мелодӣ даст кашем!
Чаро имрӯз бархе аз роҳбарони вазорату идораҳо супориш медиҳанд, ки Соли нави мелодиро таҷлил нанамоем ва ҳатто, арчаи солинавиро рост накунем. Барои исбот ва мисол, санаи 21-уми декабр Вазорати маориф ва илми Тоҷикистон бори навбатӣ ба муассисаҳои таълимии ҷумҳурӣ дастур дод, ки дар ҷашни Соли нави мелодӣ нишони асосии ин ид — арчаро дар муассисаҳо нагузоранд. Дар супориши вазири маориф ва илми ҷумҳурӣ гуфта мешавад, гузоштани ҳама гуна навъи арчаи зиндаву сунъӣ манъ аст.
«Буридани арча ва гузоштани ягон намуди арча, истифодаи ҳама гуна маводи пиротехникӣ, зиёфатороиву тӯҳфаситонӣ, ҷамъоварии маблағ, сайру гашт ва дар тарабхонаҳо ташкил намудани чорабиниҳои солинавӣ дар муассисаҳои таълимӣ қатъиян манъ аст», — қайд мешавад дар супориш.
Албатта, мо дар масъалаи зиёфатороиву тӯҳфасупорӣ, ҷамъоварии маблағ ва ташкил кардани чорабиниҳои солинавӣ дар тарабхонаҳо зид ҳастем, вале тамоман манъи ҷашнгирии Соли нави мелодӣ дар хона ё корхонаву муассисаҳо, фикр мекунам кори нодуруст аст.
Модоме, ки гузаштагони мо Соли нави мелодиро таҷлил менамуданд ва мақсад аз он дар ҳалқаи оила ва наздикону пайвандон шодиву хурсандӣ кардан барои пешвозгирии солшумории нав буд, чаро мо имрӯз ин корро давом надиҳем? Фикр менамоям аз ин ба ҳеҷ кас зараре нахоҳад расид.
Зеро, бино ба гуфти бостоншиносон таърихи таҷлили ҷашни Соли нав ҳадди ақал панҷ ҳазор солро дарбар мегирад ва яке аз қадимтарин идҳост.
Хулоса, Соли нав яке аз ҷашнҳои бошукӯҳу маъмултарин дар ҷаҳон ба шумор меравад. Чун дар аксари давлатҳои ҷаҳон, аз ҷумла, Ҷумҳурии Тоҷикистон, тақвими григорианӣ мавриди истифода қарор дорад, мутобиқи он 1 январ оғози соли нав маҳсуб мегардад.
Пас Соли нави мелодиатон фархундаву хуҷаста бод!
Нет комментариев