Омадани сел дар ноҳия Айнӣ (Видео)

Дар натиҷаи борони шадиди пайдарпай дар як чанд деҳаҳои ноҳияи Айнӣ сел омада, ба хоҷагии халқи ноҳия таъсири зиёд расонд. ҳатто аз омадани сел дар ин ноҳия талафоти ҷонӣ низ ба қайд гирифта шудааст. Сели санаи 9 май дар ноҳияи Айнӣ бар замми харобкориҳояш ду кушта барҷой гузоштааст.

Масъулони ситоди ҳолатҳои фавқулодаи Суғд санаи 10 май гуфтанд, ки дар пайи омадани сел дар рустои Ревади ноҳияи Айнӣ модару писар – Лола Туйғуноваи 41-сола ва Исмат Рустамови 18-сола ба ҳалокат расиданд. Сӯҳроб Маҳмудов, як мақоми ситоди ҳолатҳои фавқулодаи Суғд, гуфт, ин сел соатҳои панҷи баъд аз зуҳри 9 май омадааст. «Ҷасади Исмат Рустамовро сокинони деҳа баъд аз тахминан ду соати ҷустуҷӯ пайдо карданд. Ҷисми беҷони Лола Туйғунова баъд аз кофтукови тӯлонӣ субҳи 10 май аз ҷониби дастаи наҷотдиҳии ситоди ҳолатҳои фавқулода пайдо шуда, ба наздиконаш супурда шуд,» – гуфт ӯ. Ба қавли Сӯҳроб Маҳмудов, зоҳиран Лола Туйғунова ва писараш аз чарои ҳайвоноти хонагӣ бармегаштаанд, ки сел онҳо ва ҳудуди 40 сар гову буз ва гӯсфандашонро низ бо худ бурдааст. Ситоди ҳолатҳои фавқулода дар вилояти Суғд мегӯяд, ки бегоҳии санаи 9 май боришоти шадид ва шамолҳои сахт қисмати умдаи шимоли Тоҷикистонро фаро гирифта, вале сел асосан дар ноҳияҳои Айниву Панҷакент омадааст. Садриқул Шербутаев, раиси идораи роҳсозии ноҳияи Айнӣ, низ санаи 10 май гуфт, сел роҳи мошингардро хароб карда, рафтуомад ба маркази ноҳияи Айнӣ қатъ шудааст. «Феълан кормандони Идораи роҳсозӣ барои боз кардани роҳи мошингарди деҳа ба маркази ноҳия машғуланд,» — гуфт ӯ. Ҳамзамон санаи 10 май дар ноҳияи Айнӣ ба деҳаи дигар низ сел таъсири худро расонидааст, ки чанд хонаву оғилхонаҳои мардум зарари ҷиддӣ дида, ҳатто валангор ҳам гаштаанд. Шоҳидони воқеа ин селфароиро дар қишлоқи Вешканди ноҳия мушоҳида карданд. Мегӯянд қариб сокиноне, ки хонаҳояшон ба макони омадани сел наздик буд, хоб накарда, аз он пешгирӣ мекарданд, то хисороти зиёд нарасонад. Ҳарчанд аз он пешгирӣ карда бошанд ҳам, аммо сели шадид чанд хонаву оғилхонаҳоро ба замин яксон намуд. Ҷаҳонгир Камолов, ки бо телефони ҳамроҳаш омадани ин селро наворбардорӣ кардааст, гуфт, ки масъулини ситоди ҳолатҳои фавқулода чанд маротиба аз макони ин ҳодиса дидан карда, барои муайян намудани хисороти расида, корбарӣ карда истодаанд. Дар зер Шумо метавонед омадани селро дар деҳаи Вешканд тамошо кунед.