Дар асоси нақшаи чорабиниҳои марбут ба Иди байналмилалии Наврӯз — 2021 дар варзишгоҳи «Хуррамшаҳр» — и Донишгоҳи давлатии Хуҷанд ба номи академик Бобоҷон Ғафуров Фестивал — озмуни вилоятии «Бозиҳои миллӣ» гузаронида шуд.
Дар фестивали мазкур беш аз 3 ҳазор кӯдакон ва наврасон аз тамоми шаҳру ноҳияҳои вилоят иштирок намуда, аз рӯи 8 намуд бозиҳои миллӣ, аз ҷумла лалакпаронӣ, бодбарак, ҳаппак, лакпар, арғунчинбозӣ, ланка, чиллак ва ошуқ бо ҳам рақобат намуданд.
Дар натиҷаи ҷамъбасти озмун 50 нафар бозингарони беҳтарин муайян гардида, бо тӯҳфаҳои хотиравии Мақомоти иҷроияи ҳокимияти давлатии вилояти Суғд қадршиносӣ гардиданд. Ҳамзамон дар доираи фестивал — озмун ба 300 нафар кӯдакони хурдсол тӯҳфаҳои наврӯзӣ ҳадя карда шуд. Барои болидахотирии кӯдакон ва наврасон барномаи рангини фарҳангӣ намоиш дода шуда, бозиҳои шавқовар низ ташкил гардид.
Тибқи иттилои масъулини Маркази таҳсилоти иловагии вилояти Суғд дар даври аввал ва дуюми озмуни мазкур дар шаҳру ноҳияҳо дар маҷмуъ беш аз 40 ҳазор кӯдакон ва наврасон ҷалб гардиданд.
Қобили зикр аст, ки Фестивал — озмуни вилоятии «Бозиҳои миллӣ» бо иқдоми Раёсати маорифи вилояти Суғд 25 сол инҷониб баргузор карда мешавад.
Манбаъ: Хадамоти матбоути Раиси вилояти Суғд
Нет комментариев