Прокуратураи вилояти Суғд 134 ҳолати хариду фурўши ғайриқонунии қитъаҳои заминро ошкор кард.
Дар давраи соли 2015 ва 4 моҳи соли равон аз ҷониби кормандони Прокуратураи вилояти Суғд 134 ҳолати ғайриқонунии хариду фурўши қитъаҳои замин аз ҷониби шаҳрвандон бо роҳи қаллобӣ муайян ва ашхоси гунаҳкор ба ҷавобгарӣ кашида шудаанд. Ҳамчунин, дар ин давра 505 нафар шаҳрвандон, ки дар асоси қарорҳои раисони шаҳру ноҳияҳо ҳамчун эҳтиёҷманд барои гирифтани қитъаи замини наздиҳавлигӣ ба рўйхат гирифта шуда буданд, бинобар воқеан эҳтиёҷманд набуданашон дар асоси санадҳои эътиноии прокурорӣ аз рўйхати эҳтиёмандон хориҷ карда шуданд.
Ин нукта зимни ҷаласаи ҳайати мушовара оид ба натиҷаи санҷишҳо вобаста ба ҳолати иҷрои қонунгузории замин ва меъморию шаҳрсозӣ дар соли 2015-ум ва 4 моҳи соли равон бо иштироки муовини раиси вилоят Ориф Хоҷазода ва прокурори вилояти Суғд Ҳабибулло Воҳидов баён гардид.
Тибқи маълумоти сардори шуъбаи назорати умумии прокуратураи вилоят Амир Зайниддинзода дар ин давра ҳамзамон, дар вилоят дар маҷмўъ 8995 гектар замини корам аз гардиши кишоварзӣ берун мондаанд, ки аз он 5704,7 га бинобар нарасидани оби полезӣ ва 2481,5 гектар бо сабаби фаъолияти ғайриқаноатбахши хоҷагидорӣ аз ҷониби заминистифодабарандагон ба амал омадааст.
Ғайр аз ин дар давраи соли 2015 ва 4 моҳи соли равон дар ҳамаи шаҳру ноҳияҳои вилоят ҳолатҳои бархилофи талаботи қонунгузории замин, қоидаю меъёрҳои шаҳрсозӣ, бинокорӣ, нақшаи генералии маҳалҳо, қоидаҳои бехатарӣ ва зиддисўхтор, ҷудо ва вобаста намудани қитъаҳои замин аз ҷониби раисони шаҳру ноҳияҳо ҷой доштанд, ки дар натиҷа ба 253 адад чунин қарори ғайриқонунии вобаста ба замин эътироз оварда шуд.
Дар маҷмӯъ, дар ин давра аз ҷониби мақомоти прокуратураи вилояти Суғд вобаста ба қонунгузории замин бо қарорҳои прокуророн 194 нафар ба ҷавобгарии интизомӣ ва 926 нафар ба ҷавобгарии маъмурӣ кашида шуданд.
Бино ба иттилои дафтари матбуоти Прокуратураи вилояти Суғд, дар соли 2015 ин ниҳод ба 206 қарори раисони шаҳру ноҳияҳо дар бораи ҷудо кардани замин эътироз оварда, онҳоро бекор кардааст. 718,1 гектар замин ба ҳолати аввалааш баргардонида шуданд.
Соли гузашта тақсимоти нодурусти замин дар вилояти Суғд боис ба барканории масъулини сатҳи маҳаллӣ ва паси панҷара нишастани масъулин шуда буд. Аз ҷумла, моҳи марти соли 2015 раиси ҷамоате дар ноҳияи Спитамен Гулшан Фозилов, аз як зан барои ҷудо намудани қитъаи замин беш аз 17 ҳазор доллар пора гирифта буд.
Ҳамчунин, моҳи июли соли 2015 мутахассиси заминсози Корхонаи давлатии фаръии “Сектори истифодаи замини шаҳри Хуҷанд” барои сохтакорона тақсим кардани қитъаи замин дар 20 ҳолат боздошт шуда буд. Раёсати корҳои дохилӣ дар вилояти Суғд он вақт иттилоъ дода буд, ки ин мутахассиси заминсоз “бо роҳи сохтакорона тайёр намудани қарори раиси шаҳри Хуҷанд” ба одамон қитъаи замин ҷудо мекардааст: “Аз ҷумла, Қарори раиси шаҳри Хуҷанд таҳти №245, аз 07.03.2013 “Дар бораи додани қитъаи замини наздиҳавлигӣ”-ро сохтакорӣ намуда, ному насаби шаҳрванд И.Б., соли таваллудаш 1968, бошандаи шаҳри Хуҷандро ба рӯйхати замимашавандагон дароварда, парвандаи заминсозӣ омода кардааст” (хабари TojNews).
Боздошти Салим Бобохонов бо ҷурми заминфурӯшӣ
Аслан фурўши замин ҷиноят аст. Вале ин амали номатлуб дар тамоми қаламрави Ҷумҳурии Тоҷикистон реша давонидааст. Масалан, моҳи феврали соли 2015 дар минтақаи Кӯлоби вилояти Хатлон ҳодисаи фурӯши ғайриқонунии замин ба қайд гирифта шуда буд.
Оҷонсии зидди фасоди молӣ дар минтақаи Кӯлоб, собиқ раиси ҷамоати деҳоти «Кӯлоб» Салим Бобохоновро ба иттиҳоми «ришваситонӣ» ва «ваъдаи додани замин ба сокинон» боздошт карда буд.
Боздошти Салим Бобохонов дар ҳоле сурат гирифтааст, ки сокини ин ҷамоат Ҷӯрахон Кабиров дар 6 соли охир 400-умин номаи худро аз рӯи қонуншиканиҳои ӯ ба мақомот супурд.
399 аризаи шикоятии Ҷӯрахон Кабиров ба мақомоти ҳифзи тартибот аз болои собиқ раиси ҷамоати деҳоти «Кӯлоб»-и шаҳри Кӯлоб Салим Бобохонов дар шаш сол бе натиҷа анҷом ёфта буд. Ӯ дар охир «таваккул ба Худо», аризаи 400-умини худро ба сардори навтаиншудаи Оҷонсии зидди фасоди молӣ дар минтақаи Кӯлоб дод.
Ин сокини 65-соли деҳаи Лағмони ҷамоати «Кӯлоб» дар сӯҳбат ба Радиои Озодӣ гуфт, дар шаш соли ахир аз қонуншиканиҳо ва фурӯхтани заминҳои «президентӣ» аз болои Бобохон Салимов ба ҳамаи мақомотҳои интизомии минтақа ва ҷумҳур аризаҳои шикоятӣ навишт. Вале мегӯяд ӯ, иллати ба ҳадаф нарасидани шикоятҳояш шояд ин буд, ки баъзе аз кормандони ниҳодҳои интизомӣ аз раиси собиқ пуштибонӣ мекарданд.
«Ман ҳамин қадар навиштам, ягон кас эътибор надод. Вақте шунидам, раиси Оҷонсии мубориза бо коррупсия дар Кӯлоб нав шудаааст, рафта муроҷиат кардам ва гуфтам, агар чора набинед, боз ба Президенти кишвар Эмомалӣ Раҳмон мактуб навишта мегӯям. Раиси нави мубориза бо коррупсия Салим Бобохоновро боздошт кард,» — мегӯяд Ҷӯрахон Кабиров.
Салим Бобохонов соли 2009 ба курсии раиси ҷамоати деҳоти Кӯлоб нишаста, то моҳи октябри соли 2014 ифои вазифа кард. Дар замони роҳбарии ӯ шикоятҳо аз он, ки заминҳои обёришаванда ва ё “заминҳои президентӣ”-ро барои бунёди хонаҳо ба сокинон тақсим кардааст, рӯ ба афзоиш овард.
Раиси Оҷонсии зидди фасоди молӣ дар минтақаи Кӯлоб Дилшод Акобиров бо тасдиқи ин хабар ба Радиои Озодӣ гуфт: «Бобохонов бо иттиҳоми гирифтани маблағҳои пулӣ барои тақсимоти замин аз шаҳрвандон гунаҳкор дониста мешавад. Ҳоло ӯ дар боздоштгоҳ нигаҳдорӣ мешавад ва бар муқобили ӯ дар асоси моддаи 247-и Кодекси ҷиноӣ парванда боз шудааст.»
Заминфурӯшӣ дар Кӯлоб
Баъд аз обхезии пурқурбонии моҳи майи соли 2010, ки ба хоҷагии мардум низ осеби зиёд расонд, бар асоси фармони раиси ҷумҳур Эмомалӣ Раҳмон барои сокинони зарардида ва нафароне, ки дар як хона 3-4 оила зиндагӣ мекарданд, 30 гектар замин аз заминҳои обёринашудаи ҷамоат ҷудо карданд. Зани 55 солаи ҷамоати “Кӯлоб” Ҳилолбӣ Расулова дар сӯҳбат ба Радиои Озодӣ гуфт, “замини президентӣ»-и ӯро, ки барои кишту кор ҷудо шуда буд, ду сол қабл раиси ҷамоат барои хонасозӣ ба дигаре дод. Ӯ мегӯяд, нони мехӯрдааш аз пушти деҳқонӣ буд ва агар зани танҳо намебуду ҳамсар медошт, шояд ба гуфтаи ӯ “наҳангҳо” молашро ба яғмо намебурданд.
«Як гектар замин хоҷагии деҳқонӣ доштам. Ҳуҷҷат тайёр кунед гуфтам, ҳуҷҷатҳоро нимашро гирифта, нимашро дар дастамон доданду мо бехабар, заминҳоро барои хонасозӣ тақсим карданд. Ҳарчанд мо ба мақомот муроҷиат кардем, ҳатто ба телевизиону радио рафтем, аммо касе чора надид,» — илова кард ҳамсӯҳбати мо.
Ҳоло дар ин ҷамоат баъд аз боздошти собиқ раис ҳудуди 30 хона тахриб шуда, дар нақша аст, хонаҳои боқимонда низ дар рӯзҳои наздик аз сӯи мақомот ба пуррагӣ бардошта шавад. Сокини 40 солаи деҳоти Лағмон Шамсиддин Нозимов ба Радиои Озодӣ гуфт: «Салим Бобохонов 1-2 моҳ пеш ваъдаи замин карда, писари маро ба хизмати ҳарбӣ равон кард, аммо ба ваъдааш вафо нанамуд. Як чизро мушоҳида кардам, онҳое, ки пул дода буданд, замин гирифтанд. Мо мондем.»
Боздоштҳо барои заминфурӯшӣ дар Кӯлоб
Боздошти Бобохонов як бахши силсила аз боздоштҳои раисони ҷамоат аст, ки дар ҳамин авохир сурат гирифтааст. Дар баробари Бобохонов, маъмурони амният раиси ҷамоати «Меҳнатобод»-и ноҳияи Ҳамадони Баҳриддин Қурбоновро ҳам ба иттиҳоми «порагирӣ» дастгир кардаанд. Оҷонсии зидди фасоди молӣ мегӯяд, баррасии чанд парвандаи дигар алайҳи роҳбарони ҷамоатҳо дар минтақаи ҷануби Тоҷикистон базудӣ оғоз мешавад.
Раиси дафтари Оҷонсии зидди коррупсия дар минтақаи Кӯлоб Дилшод Акобиров гуфт, ки раиси ҷамоати «Истиқлол» Абдусаттор Халифаев, муовини раиси ҷамоати «Деҳқонариқ» Идимад Давлатов, раиси ҷамоати «Ватан»-и ноҳияи Фархор Акбар Қурбонов, роҳбари хоҷагии деҳқонии «Убайдулло» Холиқназар Носиров, котиби ҷамоати деҳоти «Тугараки» ноҳияи Восеъ Сафаралӣ Абдураҳмонов, мутахассиси кумитаи заминсозӣ Мирзоалӣ Назаров ва директори корхонаи кӯҳсорзамини назди Кумитаи идораи замин дар ноҳияи Ховалинг Яъқуб Мирзоев дар заминаи муомилоти ғайриқонунии замин дар мадди назари мақомот қарор гирифтаанд.
Хабари боздошт ва боз шудани
парвандаи ҷиноӣ алайҳи собиқ
раиси ҷамоати деҳоти «Кӯлоб»
Салим Бобохонов сокинони
минтақаро то ҳадде хушҳол
кардааст. Аммо бархе ҳам бо
ишора иттиҳомҳои қаблӣ алайҳи ин
мақомдори маҳаллӣ, ки бенатиҷа
анҷом шудаанд, бовар надоранд, ӯ
дурудароз дар боздошт бимонад.
Хулоса, дар вилоятҳои мухталифи Тоҷикистон ба таври ғайриқонунӣ фурӯхтани замин ба қайд гирифта шудаанд ва нисбат ба онҳое, ки ба ин амали номатлуб, яъне ҷинояткорӣ даст задаанд, парвандаи ҷиноятӣ оғоз карда шуда, онҳо дар назди қонун ҳатман ҷавоб хоҳанд гуфт.
Нет комментариев