20 сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади иштирок дар чорабиниҳои ҷашнӣ ба ифтихори 30-солагии Истиқлолияти давлатӣ, ифтитоҳи як қатор иншооти дорои таъйиноти гуногун, шиносоӣ бо вазъи соҳаи кишоварзӣ ва суҳбату мулоқоти самимӣ бо сокинону фаъолони ноҳияҳои Сангвор, Нуробод, Рашт, Тоҷикобод ва Лахш ба водии Рашт ташриф оварданд.
Сафари кории Президенти мамлакат муҳтарам Эмомалӣ Раҳмон аз ноҳияи Сангвор оғоз гардид.
Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Сангвор нахуст бинои нави маъмурии Мақомоти иҷроияи ҳокимияти давлатии ноҳияро мавриди баҳрабардорӣ қарор доданд.
Бинои нави маъмурии Мақомоти иҷроияи ҳокимияти давлатии ноҳияи Сангвор аз ду ошёна иборат буда, бо тарҳи муосир дар масоҳати 540 метри мураббаъ сохта шудааст.
Иншооти навбунёд дорои 29 ҳуҷраи корӣ мебошад.
Шуъбаҳои кор бо занон, иҷтимоӣ, умумӣ, меъморӣ ва шаҳрсозӣ, амвол, иқтисод, ҳифзи иҷтимоӣ ва ҳолатҳои фавқулоддаи Мақомоти иҷроияи ҳокимияти давлатии ноҳияи Сангвор дар ошёнаи якуми бинои хуштарҳи навсохт ҷойгир буда, бо тамоми лавозимоти корӣ муҷаҳҳаз мебошанд.
Ҳуҷраҳои кории роҳбарияти ноҳия, дастгоҳи раиси ноҳия ва муовинон дар ошёнаи дуюми иншоот ҷой дода шудааст.
Дар бинои нав ҳамзамон толори маҷлисӣ бо 120 ҷойи нишаст мавҷуд буда, барои баргузории чорабиниҳои гуногун мувофиқ мебошад.
Ҳуҷраҳои техникӣ, ошхона, бойгонӣ ва як қатор утоқҳои дигари ёрирасони бинои нави маъмурӣ дар таҳхонаи иншоот ҷойгир аст.
Дар маркази ноҳияи Сангвор Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Меҳмонхонаи «Таҳмина»-ро ба истифода доданд.
Бинои меҳмонхонаи «Таҳмина» аз 4 ошёна иборат буда, дар доираи «Солҳои рушди деҳот, сайёҳӣ ва ҳунарҳои мардумӣ», солҳои 2019 -2021 бо иқдоми соҳибкори маҳаллӣ Мустафо Абдуллоев бунёд карда шудааст.
Иншооти хуштарҳу замонавии хизматрасонӣ дорои 12 ҳуҷра, аз ҷумла 3 люкс буда, бо истифода аз унсурҳои хоси миллӣ оро дода шуда, бо тамоми шароити истироҳату фароғат таъмин мебошад.
Меҳмонхонаи навбунёд имкони қабули 25 нафар мизоҷ дар як вақтро доро аст.
Иншооти муосири хизматрасонӣ ҳамчунин дорои маҷлисгоҳ бо 50 ҷойи нишаст мебошад.
Ҳамзамон дар идомаи сафари корӣ дар ноҳияи Сангвор, Пешвои миллат ба бунёди Муассисаи томактабии замонавии «Калидчаи Заррин» оғози расмӣ бахшиданд.
Кӯдакистони замонавӣ дар маркази ноҳияи Сангвор барои 100 нафар дӯстрӯяк дар асоси ҳидоятҳои ҳамешагии Сарвари маорифпарвари мамлакат муҳтарам Эмомалӣ Раҳмон бо иқдоми Ҷамъияти дорои масъулияти маҳдуди «Зарринк» бунёд карда мешавад.
Сарвари давлат муҳтарам Эмомалӣ Раҳмон зимни шиносоӣ бо шароити муосири кору фаъолият ба сифати корҳои анҷомёфта баҳои баланд дода, иншоотҳоро туҳфаи арзишманди Ҳукумати мамлакат дар рӯзҳои таҷлил аз 30-солагии Истиқлолияти давлатии Ҷумҳурии Тоҷикистон барои тамоми кормандону сокинони ноҳия маънидод карданд.
Манбаъ: АМИТ Ховар
Нет комментариев