Дар назари аввал чунин менамояд, ки тоза намудани қолин соддаву осон аст, ҳатто қӯдак ҳам метавонад чангҳои қолинро бо чангкашак тоза намояд. Аммо дар асл чунин нест.
Пас саволе ба миён меояд, ки қолини чирк ба саломатии инсон чӣ гуна таъсир мерасонад?
Маълум мешавад, ки агар қолини хонаро муддати дуру дароз тоза накунед, дар он микроорганизмҳои зараррасон, аз қабили канаҳои чангӣ, микробҳо, замбуруғҳое, ки барангезандаи бемориҳои алергияи зиққинафасӣ, зуком, бемориҳои пӯст ва ғайра оварда мерасонанд.
Аз ин рӯ соле 2-3 маротиба ҳатман қолинҳоро шуставу тоза кардан лозим аст.
Усули аз ҳама оддии тоза намудани қолин – ба таври хушк бо чангкашак тоза кардани он мебошад. Дар баробари ин шарт нест қолинро аз хона ба берун бурд. Онро метавон дар хона бо кӯмаки чангкашак тоза намуд. Ин аз ҳама усули одии қолинтозакунӣ аст. Аммо он тозагии қолинро фароҳам оварда наметавонад. Ҳатто, вақте , ки бисёр бо чангкашак чангашро кашем ҳам дар қолин ҳамеша ба миқдори зиёд чирку чанг мемонад.
Чӣ бояд кард?
Барои хушк тоза кардани қолин мо метавонем аз турбочутка истифода барем. Беҳтараш барои тоза намудани қолин аз чангкашаке, ки ҳам турбочутка ва ҳам филтри обӣ дорад, истифода баред, ки аз он қолин тоза ва ҳавои хона бо тароват хоҳад шуд.
Маъмултарин тарзи тоза кардани қолин намшӯ кардани он аст. Қолинро бо истифодаи чангкашак ё дасти намшӯ мекунанд. Баъд аз анҷоми ин амал гӯё қолин нав мешавад, аммо муаммои дигар пеши роҳи мо пайдо мешавад. Аз ин рӯ қолинро дар офтоб ё мавзеъҳои махсус хушк бояд кард, агар чунин накунем дар муддати хело кӯтоҳ микроорганизмҳои мухталиф дар қолин рушд мекунанд. Фаромӯш насозед, ки истифодаи моддаҳои химиявӣ барои тоза кардани қолин зарари манфӣ расонида, зебоияшро гум мекунад. Аз ин рӯ таъсири маҳлули химиявиро барои тоза кардани қолин дар як пораи он санҷед. Агар он барои тоза кардани қолин безарар бошад, онро истифода баред, аммо фаромӯш накунед, ки баъди тоза намудани қолин бо маҳлули химиявӣ онро бояд бо оби тоза шуст.
Як мушкили дигар барои тоза кардани қолин дар ҳоли намӣ он аст, ки дар ин ҳол пати қолин менишинад ва намуди зоҳирияшро гум мекунад.
Баъд аз тоза кардани қолин бо тарзи дар боло гуфташуда чуткаи сахтро гирифта қолинро баръакси хоби паташ шакед. Дар ин ҳолат паташ баланд шуда, чун қолини нав мешавад.
Ҳамчунин қолинҳоро дар фишори баланди дастгоҳҳои махсуси қолиншӯӣ низ мешӯянд. Дар ҳолати мазкур қолинҳо аз чиркҳои чандвақта ба таври бисёр хуб тоза шуста мешаванд, аммо дар ин ҳолат аз мутахассисони соҳа маслиҳат бояд гирифт. Зеро бемаҳоратона бо фишори баланд шустани қолин ба вайроншавии пати он оварда мерасонад.
Нет комментариев