Баҳри иҷроиши дастуру супоришҳои Асосгузори сулҳу ваҳдати миллӣ – Пешвои миллат мӯҳтарам Эмомалӣ Раҳмон масъулини Мақомоти иҷроияи ҳокимияти давлатии шаҳри Хуҷанд сарбозони ҷузъу томҳои қисмҳои ҳарбии кишвар, фиристодагони шаҳри Хуҷандро соле як-ду маротиба аёдат менамоянд, ки он ба ҳукми анъана даромадааст.
Дирӯз гурӯҳи корӣ ва волидайни сарбозон бо супориш ва дастгирии бевоситаи Раиси шаҳри Хуҷанд мӯҳтарам Маъруф Муҳаммадзода ба қисмҳои ҳарбии шаҳрҳои Душанбе, Ваҳдат, Ҳисор, Қӯрғонтеппа, навоҳии Абдураҳмони Ҷомӣ, Бохтар, Ҳамадонӣ, Панҷ, мавзеи Тавилдара сафар намуда, аз ҳолу аҳвол, сатҳи хизмат ва шароити зисти сарбозони Ватан хабар гирифтанд.
Нахуст, волидайни аскаронро афсари Раёсати корҳои сиёсӣ-тарбиявии Шӯъбаи кор бо ҷавонон ва собиқадорони Вазорати мудофиаи Ҷумҳурии Тоҷикистон, подполковник Илҳом Саидович Мавлонов истиқбол намуд ва мухтасар аз боби хизмати сарбозон ҳарф зад. Баъдан, гурӯҳи аёдатӣ ба қисми ҳарбии 02615-и коммендатураи Гарнизони ҳарбии шаҳри Душанбе ворид гардид. Ононро муовини командир, подполковник Бошиев Мустафо Миралиевич ва гурӯҳи карнайнавозон пешвоз гирифтанд. Намояндаи Мақомоти иҷроияи ҳокимияди давлатии шаҳри Хуҷанд, мудири бахши бойгонӣ Ҷӯраева Кибриё салому паёми гарму ҷӯшони Раиси шаҳри Хуҷанд Маъруф Муҳаммадзодаро ба сарбозон ва кулли ҳозирин расонида, барояшон адои хизмати сарбаландонаро таманно намуд.
Раҳимова Савринисо модари сарбози қаторӣ Ҷамшед Раҳимов, ки чор моҳ қабл ихтиёран ба хизмати ҳарбӣ омад, аз дидори фарзандаш шодмонӣ карда, аз ҷойи зист, шароити хизмату истироҳати фарзанду ҳамхизматонаш бохабар гардид.
Сарбоз Абдумуталлиб Рауфов сокини маҳаллаи Пахтакор барои ташкили чунин як вохӯрии гарму самимӣ ба Раиси шаҳр Маъруф Муҳаммадзода изҳори сипос намуд.
Пас аз мулоқоту вохӯриҳои волидайну фарзандон дар саҳни ҳавлии ин қисми ҳарбӣ ҳунармандони Хонаи маданияти №1 бо сарварии Аълочии фарҳанги ҷумҳурӣ Азимҷон Аҳроров барномаи консертӣ намоиш дода шуд, ки ҷавонони хизматчӣ ва волидайн басо шодмонӣ намуданд.
Идомаи сафари гурӯҳи корӣ ва волидайн дар қисми ҳарбии 5453-и Қӯшунҳои дохилии ВКД дар шаҳри Душанбе сурат гирифт. Командири қисми ҳарбӣ Музаффар Ҷабборзода ташрифи волидайнро ба қисми ҳарбӣ хайрамақдам намуда, азр дошт, ки хизмат дар ҷузъу томҳои миллӣ мактаби ҷасорату мардонагӣ барои ҳар сарбоз аст.
Бо фармони сардори Ситоди қисми ҳарбӣ подполковник Садриддин Султонов, сарбозон бо тартибу низоми ҳарбӣ аз назди минбаре, ки гуруҳи корӣ ва волидайни онон саф кашида буданд, гузар намуда, бо ин амал меҳмононро хайрамақдам намуданд.
Гурӯҳи корӣ ва волидайн, ки фарзандонашон дар қисмҳои ҳарбии 0123-и Маркази таълимии Қӯшунҳои сарҳадии КДАМ ҶТ, дар ноҳияи Рӯдакӣ, қисми ҳарбии 051054 – Горди миллӣ, қисми ҳарбии 01055- Горди миллӣ, қисми ҳарбии 07033 ВМҶТ дар шаҳри Ҳисор, қисми ҳарбии 3502-и ҚДВКД ҶТ воқеъ дар деҳаи Қулпистаи назди насоси обкашии шаҳри Душанбе, қисми ҳарбии 07017, қисми ҳарбии 87740-и ноҳияи Абдураҳмони Ҷомӣ, қисми ҳарбии 0104 Қӯшунҳои сарҳадии КДАМ ҶТ дар шаҳри Турсунзода, қисми ҳарбии 0306-и Қӯшунҳои хушкигарди вилоятиХатон, қисми ҳарбии 0307-и ноҳияи Ҳамадонӣ, қисми ҳарбии 02011 «В»-и ноҳияи Тавилдара қарзи фарзандии хешро дар назди Модар-Ватан адо карда истодаанд, аёдат намуданд.
Падарону модарон Муҳаббат Мансурова, Орифа Ҳомидова, Сабоат Ҳусейнова, Бобоҷонов, Қодиров, Сафаргул Бобоева, Умрӣ Қурбонова, Сабоат Расулова, Дилбар Хоҷаева, Манзура Султонова, Мавзуна Ӯлмасова, Муҳаббат Атаева, Мунира Қаюмова, Анора Раҳматова, Саидхоҷа Ёдгоров, Роҳат Азимова, Саноат Саидова, Саёҳат Саидова, Фотима Каримова, Салима Қудратова ба дидори фарзандонашон, ки аксар ихтиёран хизмати ҳарбиро пазируфтаанд, расида, изҳори хурсандӣ намуданд, ки Раиси шаҳри Хуҷанд барояшон чунин имконияти дидорбиниро муяссар гардонид.
Намояндаи Раёсати корҳои сиёсию тарбиявии Шӯъбаи кор бо ҷавонон ва собиқадорони ВМҶТ подполковник Илҳом Саидов ба сарбозон иҷозат дод, ки муддати як шабонарӯз бо волидайн мулоқот дошта бошанд.
Бояд тазаккур дод, ки дар ҳамаи қисмҳои ҳарбие, ки волидайн бо фарзандон вохӯрданд, барномаҳои консертӣ бо иштироки ҳунармандон Фирдавс Холназаров, Далер Абдуқодирова ва Шариф Ниёзов доир гардид.
Ҳамзамон, гурӯҳи ба аёдат сафарбаршуда аз шароити хӯрду хӯрок, ҷойи хоб, ҳаммому толорҳои варзишӣ, утоқҳои маишӣ ва пӯшоки сарбозон бохабар шуда, аз сулҳу суботи кишвар, аз тинҷию оромӣ шукр намуда, фарзандонро ба он далолат намуданд, ки сарбаландонаву ифтихормандона хизмати ҳарбиро адо намоянд ва сиҳату саломат ба манзили зисти хеш баргарданд.
Манбаъ: Сомонаи Хуҷанд ТҶ
Нет комментариев