Намояндагони шаҳрдорӣ, Вазорати корҳои дохилӣ ва Раёсати ҳолатҳои фавқулодаи Туркия (AFAD) ба наҷотдиҳандагони Тоҷикистон барои кумак изҳори сипос карданд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании ҷумҳурӣ хабар медиҳад.
12 феврал раиси шаҳри Қайсарӣ- маркази бузурги саноатии Туркия ва қадимтарин шаҳри Кападокияи Туркия Гокмен Чичек бо сардори гурӯҳи наҷотдиҳии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Сулаймон Исозода, ки дар шаҳри Қаҳрамонмараш ба ҷустуҷӯ ва наҷот машғуланд, вохӯрӣ намуд.
Дар мулоқот Гокмен Чичек ба Ҳукумати Тоҷикистон, наҷотдиҳандагони тоҷик ва мардуми Тоҷикистон барои корҳои ҷустуҷӯиву наҷот, ёрии тиббӣ ва кумак дар пайдо кардани одамони зери харобаҳо дар сатҳи баланд изҳори сипос кард.
Ҳамзамон Вазири корҳои дохилии Туркия Сулаймон Сойлу зимни боздид аз шаҳри Қаҳрамонмараш, ки бар асари заминларза хароб шудааст, ба наҷотдиҳандагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон миннатдорӣ баён кард.
Сулаймон Сойлу ҳамчунин ба Ҳукумати Ҷумҳурии Тоҷикистон барои пуштибонӣ аз офатзадагони Туркия ва ирсоли кумаки фаврӣ сипосгузорӣ намуд.
Ёдовар мешавем, ки 50 нафар наҷотдиҳандагони Кумитаи ҳолатҳои фавқулода ва мудофиаи граждании ҷумҳурӣ рӯзи сеюм аст, ки дар шаҳри Қаҳрамонмараши Туркия ба корҳои ҷустуҷӯиву наҷот машғул мебошанд. То имрӯз бо фаъолияту кӯшиши онҳо 78 ҷасад ва се нафари зинда аз зери вайронаҳо берун оварда шуданд.
Манбаъ: АМИТ «Ховар»
Нет комментариев