Барои интихоби рақами давлатии автомобилӣ бо мувофиқатии ҳарф ва рақамҳо соҳибони нақлиёт маблағи зиёдеро бояд пардохт намоянд — аз ҷумла дар музояда.
Сомонаи ВКД Ҷумҳурии Тоҷикистон бо эълони худ ба таваҷҷӯҳи соҳибони воситаҳои нақлиёт расонд, ки санаи 27-уми январи соли 2018 аломати қайди давлатии силсилаҳои «НА» — 01, «ВЕ» — 07 ва «АК» — 08 ба таври музояда ба фурӯш монда мешаванд. Музояда дар толори Раёсати БДА гузаронида мешавад. Нархи як лот 630 сомониро ташкил медиҳад.
Дар арафаи музоядаи навбатӣ назар андӯхтем ба таърихи музоядаҳо на танҳо дар Тоҷикистон, балки дар кишварҳои дигари Осиёи Марказӣ.
Дар Тоҷикистон музоядаҳое, ки дар онҳо барои нақлиёти автомобилӣ рақамҳои «тиллоӣ»-ро мефурӯшанд, аз соли 2010 инҷониб гузаронида мешаванд. Дар давоми ҳафт соли чунин савдоҳо, рақами аз ҳама гаронарзиш «01-01 AP (01)» дониста шуд ва онро соли 2012 ба маблағи тақрибан 12 000 доллар хариданд.
Ҳамзамон, худи ҳамон сол ба мақомоти ҳифзи ҳуқуқи Тоҷикистон аз «боло» барои аз истифодаи мошинҳо гирифтани рақамҳои 8888 ва 7777 фармон дода шуд, ки гуё чунин рақамҳо ба хешовандони наздики мансабдорони шахсони якуми кишвар тааллуқ доранд. Чунин рақамҳо ба рақамҳои намуди оддӣ иваз карда шуданд; намояндагони Вазорати корҳои дохилӣ он вақт ба журналистон тавзеҳ доданд: вайронкунии қоидаҳои ҳаракат дар роҳ ва ба ҳама чиз роҳ додани соҳибони нақлиёти автомобилии дорои рақамҳои «тиллоӣ» боиси норозигӣ ва хашмгин шудани шаҳрвандон гардид.
Манбаи акс сомонаи расмии http://theopenasia.net/
Музоядаҳои охирини фурӯши рақамҳои «тиллоӣ» моҳи август ва санаи 25-уми ноябри соли 2017 дар шаҳри Душанбе баргузор гардида буданд. Он вақт рақамҳои давлатӣ аз силсилаҳои «ВA», «ВВ» — 07 ва «ЕМ» — 01 ба фурӯш гузошта шуданд. Арзиши як лот 630 сомонӣ (71 доллар)-ро ташкил дод ва дар онҳо ҳамагӣ 224 рақами давлатӣ ба фурӯш гузошта шуда буд. Дар бораи он, ки ниҳоят бо кадом нарх рақамҳои қимматбаҳо фурӯхта шуданд, хабар дода нашуд.
Дар кишвари ҳамсояи Ӯзбекистон бошад, интихоби рақами давлатии автомобилӣ бо мувофиқатии ҳарф ва рақамҳо аз 1-уми сентябри соли 2017 имконпазир гашт. Музоядаи онлайнии рақамҳои зебо бо дастгирии Биржаи ҷумҳуриявии мол ва ашёи хоми Ӯзбекистон дар сомонаи avtoraqam.uzex.uz сурат мегирад. Ба он ҳамаи хоҳишмандон дастрасӣ доранд ва тартиби иштирок дар музояда истифодаи ягон намуди ҳуҷҷатҳои коғазиро пешбинӣ намекунад.
Аз моҳи сентябри соли гузашта, тавассути музоядаи онлайнӣ 684 рақами нақлиётӣ, ки аз он 469 – ба шахсони воқеӣ ва 215 – ба шахсони ҳуқуқӣ фурӯхта шуданд. Аз онҳо беш аз 14,4 миллиард сӯм (1,78 миллион доллар) ба даст оварда шуд. Моҳи сентябри соли 2017 дар системаи иттилоотии Биржаи ҷумҳуриявии мол ва ашёи хоми Ӯзбекистон амалиёти аввалин гузаронида шуд: сокини вилояти Ҷиззах рақами «зебо»-и нақлиётии E 070 ЕА-ро ба маблағи 7 563 637,5 сӯм (934 доллар) харидорӣ намуд.
То ба имрӯз, лотои гаронтарине, ки дар музояда фурӯхта шуд, рақами автомобилии ба ном «тиллоӣ» бо рақами — 30 777 AAA мебошад. Онро 1-уми ноябри соли 2017 ба соҳибкор аз Самарқанд бар ивази 287 миллион сӯм (35 500 доллар) фурӯхта шуд. Бояд қайд кард, ки нархи ибтидоии ин рақам 14 977 500 сӯм (1873 доллар) буд ва дар раванди савдо 20 маротиба зиёд гардид.
Дар кишвари ҳамсояи Қирғизистон бошад, расман фурӯхтани рақами «зебо»-и нақлиёти автомобилиро як сол пеш оғоз намуданд. Пештар нишони бақайдгирифтаро бо тартиби бомуваффақияти рақамҳо метавон «тасодуфан» ба даст овард.
Нархи ибтидоии рақами давлатӣ бо мувофиқатии рақами 001 алҳол 70 ҳазор сом (1000 доллари ИМА)-ро ташкил медиҳад. Рақам бо мувофиқатии якхелаи ҳарфҳо ва рақамҳо бо мувофиқатии гуногуни ҳарфҳо (масалан, 001 AAA, 001 AAB) 60 ҳазор сом (860 доллар) арзиш дорад. Рақами 777 бо мувофиқатии якхелаи ҳарфҳоро 60 ҳазор сом (860 доллар), бо мувофиқатии гуногуни ҳарфҳоро 54 ҳазор сом (774 доллар) арзёбӣ карданд.
Лотои аз ҳама гаронарзиш дар тамоми таърихи музояда рақами давлатии автомобилии 01 KG 777 AAA ҳисобида мешавад. Он ба маблағи 1 миллиону 716 ҳазор сом (25 000 доллар) фурӯхта шуд. Барои ин маблағ метавон мошини нави хориҷӣ харид. Оғози нарх дар музояда 60 ҳазор сом (860 доллар) буд. Қисми зиёди маблағҳо (91 фоиз) ба буҷети давлатӣ фиристода шуданд. Дар давоми тамоми мавҷудияти музояда, ба маблағи 21 миллион сом (301 000 доллар) рақамҳо фурӯхта шудаанд.
Бармегардем ба Тоҷикистон. Қабули дархостҳо ва барасмиятдарории ҳуҷҷатҳо барои иштирок дар музоядае, ки санаи 27-уми январи соли 2018 баргузор мегардад, се рӯз пеш аз гузаронидани музояда ба охир мерасад. Нархи як лот 630 сомониро ташкил медиҳад.
Ҳуҷҷатҳое, ки барои иштирок дар музояда бояд пешниҳод карда шаванд:
1. НУСХАИ ШИНОСНОМАИ МИЛЛӢ.
2. РАҚАМИ МУШАХХАСИ АНДОЗСУПОРАНДА (ИНН).
3. НУСХАИ ҲУҶҶАТҲОИ ҲУҚУҚМУАЙЯНКУНАНДА БА ВОСИТАИ НАҚЛИЁТ.
Медиапортали «Тироз»
Нет комментариев