Ба иттилои Агентии обуҳавошиносии ҷумҳурӣ, шурӯъ аз бисту ҳафтуми январ то сиюми январи соли равон дар қаламравӣ ҷумҳурӣ ҳарорати ҳаво паст гардида, боридани борону барф дар назар дошта шудааст. Дар ин рӯзҳо дар водиҳо ҳарорат паст гашта, боридани барф пешбинӣ мешавад. «Шурӯъ аз моҳи феврал ҳарорати ҳаво рӯ ба баландшавӣ оварда, дар рӯзҳои хушкӣ гармӣ аз 15 то ба 17 дараҷа мерасад. Дар рӯзҳои муқаррарӣ то 2 дараҷа баландшавии ҳарорат пешгӯӣ карда мешавад». Бояд гуфт, ки зимистони имсола нисбат ба соли сипаригардида гармтар омад. Тибқи пешгӯие, ки Агентии обуҳавошиносии ҷумҳурӣ барои моҳҳои декабр ва март карда буд, сардии ҳаво дар охирҳои моҳи ноябру аввалҳои декабр ва феврал пешбинӣ шуда буд. Аввалҳои моҳи декабр ҳарорат то як андоза паст шуда, боришоти барф низ ба қайд гирифта шуд. Вале шурӯъ аз 16 декабр ҳарорати ҳаво нисбатан гарм шуда, дар бисёре аз минтақаҳои ҷумҳурӣ ҳатто дар рӯзҳои аввали моҳи январ низ гармӣ то ба 20 дараҷа расид, ки ин аз меъёри муайяншуда баландтар мебошад.
Манбаъ: сомонаи расмии АМИТ «Ховар»
Нет комментариев