Шоми дирӯз дар Муассисаи давлатии «Наврӯзгоҳи пойтахт» мусобиқаи ҷумҳуриявӣ оид ба гӯштини миллӣ барои дарёфти «Ҷоми пойтахт-2018» баргузор гардид.
Дар мусобиқаи мазкур 10 даста: «Душанбе-1», «Душанбе-2», «Хатлон-1», «Хатлон-2», «Суғд-1», «Суғд-2», дастаҳо аз Вилояти Мухтори Кӯҳистони Бадахшон, шаҳру ноҳияҳои тобеи марказ ва ноҳияи Рашт дар ҳайати калон қувваозмоӣ намуданд.
Варзишгарон дар ин мусобиқа дар шаш вазн: 60, 70, 80, 90, 100 ва +100-килограмм байни ҳам қувваозмоӣ намуданд.
Сорбон Латифов дар вазни 60 килограмм бар ҳамаи рақибонаш ғолиб омада, соҳиби «Ҷоми пойтахт-2018» гардид.
Хотиррасон менамоем, ки соли 2017 Сорбон Латифов дар мусобиқаи ҷаҳонии самбо, ки дар шаҳри Сочии Федератсияи Россия баргузор гардид, дар вазни 62 килограмм соҳиби медали биринҷӣ шуда буд.
Орифҷон Додов дар вазни 70 килограмм «Ҷоми пойтахт»-ро ба даст овард. Дар вазни 80 килограмм Акмал Муродов бар ҳамаи рақибонаш ғолиб гардида, «Ҷоми пойтахт-2018»-ро соҳиб гардид. Ҳоҷимашраб Раҳмонов дар вазни 90 килограмм ҳунари хуб нишон дода, ҳамаи рақибонашро мағлуб намуд. Ӯ сазовори медали тилло ва «Ҷоми пойтахт» гардид.
Саидҷалол Саидов дар вазни +100 килограмм Шоҳҷоизаи мусобиқаро ба даст оварда, сазовори автомобили тамғаи «Mercedes Benz» шуд ва «Ҷоми пойтахт-2018»-ро ба даст овард.
Ёдовар мешавем, ки соли гузашта низ дар Муассисаи давлатии «Наврӯзгоҳи пойтахт» мусобиқаи ҷумҳуриявӣ оид ба гӯштини миллӣ барои дарёфти «Ҷоми пойтахт-2017» ва Иди байналмилалии Наврӯз баргузор гардида буд.
Манбаъ: Сомонаи расмии АМИТ «Ховар»
Нет комментариев