Президенти Ҷумҳурии Беларус Александр Лукашенко пешниҳод намуд, ки самтҳои нави фаъолсозии ҳамкорӣ бо Тоҷикистон, бахусус дар пасманзари коҳиши ахири гардиши мол таҳия шаванд. Дар ин хусус Сарвари давлати Беларус дар мулоқот бо Сафири Фавқулода ва Мухтори Ҷумҳурии Тоҷикистон дар Беларус Бахтовар Сафарзода изҳор дошт, хабар медиҳад АМИТ «Ховар» бо истинод ба БелТА.
Александр Лукашенко тазаккур дод, ки иқтисод ва ҳамкории иқтисодию тиҷоратӣ асоси ҳама гуна муносибатҳои байнидавлатӣ мебошанд.
«Заминаҳои муносибатҳои мо, ки асоси онро ҳамкории иқтисодию тиҷоратӣ ташкил медиҳад, набояд сарфи назар карда шавад. Бинобар ин, бояд дар ин самт корбарӣ намоем, то гардиши молро ба марҳилае, ки қарор дошт, баргардонем. Ва албатта, мо барои афзоиши гардиши тиҷорати байнидавлатӣ молу маҳсулоти кифоя дорем, — изҳори итминон намуд Президенти Беларус Александр Лукашенко ва таъкид намуд, ки бо назардошти зарфияти мавҷуда 70, 80 ва ҳатто 100 миллион доллари ИМА гардиши мол барои Беларус ва Тоҷикистон ночиз аст».
Ӯ илова намуд, ки ҳарду давлат имконоти якдигарро хуб медонанд ва байни мардумони Беларусу Тоҷикистон ва раҳбарони ин давлатҳо муносибатҳои деринаи дӯстона ва эътимодбахш густариш ёфтаанд.
«Метавон гуфт, ки мо бо Президенти Тоҷикистон Эмомалӣ Раҳмон муносиботи хуби дӯстона дорем. Мо аз ҳамдигар сирри пинҳонӣ надорем. Аз ин рӯ, мо муносибатҳои мо дар сатҳи бисёр баланд қарор доранд», — таъкид намуд Президенти Беларус.
Сафири Фавқулода ва Мухтори Ҷумҳурии Тоҷикистон дар Беларус Бахтовар Сафарзода дар навбати худ паёми гарму самимӣ ва дӯстонаи Президенти Ҷумҳурии Тоҷикистон муҳтарам Эмомалӣ Раҳмонро ба Сарвари давлати Беларус расонида, барои мулоқот изҳори сипос намуд. «Мо Шуморо ҳамчун дӯсти бузурги Ҷумҳурии Тоҷикистон ва дӯсти самимии Пешвои миллати тоҷик медонем. Дӯстии шумо барои мо, дипломатҳо, намояндагони мақомоти давлатӣ ва мардуми бародари ду давлат мояи ифтихор мебошад», — таъкид намуд Бахтовар Сафарзода.
Манбаъ: АМИТ «Ховар»
Нет комментариев