Раиси вилояти Суғд Раҷаббой Аҳмадзода ба ноҳияи Айнӣ сафари корӣ анҷом дод.
Ҷоизи зикр аст, ки бо дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Айнӣ боғи фарҳангӣ-фароғатӣ ва варзишгоҳу ҳавзи шиноварӣ бунёд хоҳад шуд. Дар доираи сафари корӣ Раиси вилоят аз мавзеи иншооти сохатшаванда боздид намуда, барои омода намудани лоиҳаҳо ба шахсони масъул дастуру супоришҳои мушаххас дод.
Ноҳияи Айнӣ дар қатори дигар шаҳру навоҳии вилоят давра ба давра ободу зебо гардида, бо бунёди корхонаҳои хурду бузург вазъи иқтисодиву иҷтимоии он сол аз сол беҳтар гардида истодааст. Бо дастгирии Сарвари давлат дар ноҳия боз як корхонаи азим дар самти истихроҷ ва коркарди канданиҳои фоиданок бунёд мешавад.
Раиси вилоят дар мавзеи Саратоғ – маҳалли бунёди корхона бо роҳбарият ва масъулини ҶСП “Талко Голд”, ки бунёди корхонаро ба уҳда доранд, дидору гуфтугӯ намуд. Тавре иттилоъ дода шуд, корхона дар минтақаи 2350 метр баландтар аз сатҳи баҳр қомат афрохта, анҷоми корҳои сохтмонӣ то охири соли 2019 ба нақша гирифта шудааст ва аввали соли 2020 истеҳсоли маҳсулот ба роҳ монда мешавад. Дар назар аст, ки дар корхонаи бунёдшаванда беш аз 1000 нафар бо ҷойи кор ва маоши хуб таъмин карда шаванд. Бунёди боз як корхонаи азими саноатӣ ва истихроҷи маъданҳои кони Кончочи ноҳияи Айнӣ ҷиҳати бо ҷойи кор таъмин гардидани сокинони маҳаллӣ ва афзоиши ҳаҷми истеҳсоли маҳсулоти саноатӣ мусоидат хоҳад кард.
Дар идомаи сафари корӣ Раис вилоят бо шароити хизматрасонӣ дар мавзеи саёҳатии Искандаркӯл шинос шуд. Искандаркул яке аз кӯлҳои калонтарини Тоҷикистон буда, дар баландаии 2200 метр аз сатҳи баҳр ҷойгир мебошад. Ин минтақаи хушманзараи водии Зарафшон ба макони саёҳатии сайёҳони дохиливу хориҷӣ табдил ёфтааст.
Дар аснои боздид Раиси вилоят бо ёдоварӣ аз “Соли рушди сайёҳӣ ва ҳунарҳои мардумӣ” иброз дошт, ки зарфиятҳои сайёҳии ин минтақа бояд ба таври зарурӣ таблиғ карда шавад. Зеро бо ин роҳ метавон таваҷҷуҳи бештари гардишгаронро ба Искандаркӯл ҷалб сохт.
Дар идомаи сафари корӣ Раиси вилоят ба ноҳияи Шаҳристон ташриф оварда, бо ҷараёни корҳои ободониву созандагӣ шинос гардид. Раҷаббой Аҳмадзода рафти корҳои сохтмонии як қатор иншооти гуногунро мавриди назар қарор дода, ҷиҳати бо сифати баланд бунёд намудани иншооти иҷтимоӣ ба масъулин ва роҳбарияти ноҳия супоришҳо дод.
Манбаъ: Хадамоти матбуоти Раиси вилояти Суғд
Нет комментариев