Бахшида ба «Соли рушди сайёҳӣ ва ҳунарҳои мардумӣ» ва 27-солагии Истиқлолияти давлатии Ҷумҳурии Тоҷикистон моҳҳои июл – ноябри соли равон Фестивал-озмуни вилоятии ҳунарҳои мардумӣ гузаронида мешавад. Дар ин бора қарори Раиси вилояти Суғд аз 18 июли соли 2018, №309 ба тасвиб расид.
Фестивал-озмуни вилоятии ҳунарҳои мардумӣ бо мақсади рушду инкишофи ҳунарҳои мардумӣ, муаррифии таърихи пурғановати миллат, эҳёи суннатҳои асил, тарғиби либоси миллӣ, тараққӣ додани санъати ҳунармандӣ, муаррифии ширкатҳои сайёҳӣ, ҳавасмандгардонии моддӣ ва маънавии ҳунармандон гузаронида хоҳад шуд. Дар Фестивал-озмун шаҳру ноҳияҳои вилоят бо пешниҳоди маҳсулоти ҳунармандӣ, таомҳои миллӣ ва барномаи пурмазмуни фарҳангӣ метавонанд иштирок намоянд.
Ғолибон аз рӯи самтҳои бофандагӣ, дӯзандагӣ, армуғонсозӣ, кулолгарӣ, оҳангарӣ, чӯбкорӣ, ресандагӣ, чармгарӣ, рассомӣ муайян карда шуда, дар ҳар самт барои ҷойҳои якум, дуюм ва сеюм мутаносибан 3 000 сомонӣ, 2 000 сомонӣ ва 1 000 сомонӣ мукофотпулӣ дода мешавад. Барои барномаи беҳтарини фарҳангӣ низ тақдими ҷоизаҳои пулӣ дар назар дошта шудааст.
Манбаъ: Хадамоти матбуоти Раиси вилояти Суғд
Нет комментариев