Раиси вилояти Суғд Раҷаббой Аҳмадзода дар доираи сафари кории худ ба шаҳри Панҷакент ба бунёди як қатор иншооти муҳими иҷтимоӣ санги асос гузошт.
Дар доираи иқдоми 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон дар шаҳри бостонии Панҷакент сохтмону бунёди як қатор иншоот ба нақша гирифта шудааст. Дар ин раванд имрӯз ба бунёди бинои Маркази адлия оғози расмӣ бахшида шуд. Бинои Маркази адлия дар хиёбони ба номи Устод Рӯдакӣ ва дар паҳлуи бинои Осорхонаи ҷумҳуриявии ба номи Абӯабдуллоҳи Рӯдакӣ қомат хоҳад афрохт. Фармоишгари иншоот Вазорати адлияи Ҷумҳурии Тоҷикистон ва пудратчӣ ҶДММ «ПМК-278» мебошад.Тавре иттилоъ дода шуд, дар ошёнаи якуми бинои сохташавандаи Маркази адлия Идораи нотариалӣ, дар ошёнаи дуюм САҲШ ҷойгир карда шуда, дар ошёнаи сеюм барои маъмурияти Осорхонаи ҷумҳуриявии ба номи Абӯабдуллоҳи Рӯдакӣ ҳуҷраҳои корӣ ҷудо карда мешавад. Раҷаббой Аҳмадзода ҳангоми шиносоӣ бо лоиҳа ва суҳбат бо сокинон таъкид дошт, ки бо ифтитоҳи бинои мазкур сатҳи хизматрасонӣ ва фаъолияти идораҳои зикршуда боз ҳам беҳтар мегардад.
Дар хиёбони ба номи Устод Рӯдакӣ бо ширкати Раиси вилоят ҳамзамон ба бунёди биноҳои баландошёнаи истиқоматӣ низ санги асос гузошта шуд. Фармоишгар ва пудратчии иншоот ҶСК «Панҷакентсоз» мебошад. Иттилоъ дода шуд, ки дар ин мавзеъ як бинои истиқоматии 9 ошёна ва як бинои истиқоматии 11 ошёна сохта мешавад. Тибқи лоиҳа бинои истиқоматии 9 ошёна аз 28 хонаҳои як, ду ва се ҳуҷрагӣ ва бинои истиқоматии 11 ошёна аз 45 хонаҳои як, ду ва се ҳуҷрагӣ иборат буда, дар ошёнаи аввали ҳарду бино таъсиси марказҳои савдову хизматрасонӣ ба нақша гирифта шудааст. Илова бар ин, дар саҳни биноҳои сохташаванда майдонча барои бозии кӯдакон, майдончаи варзишӣ ва фаввораҳо бунёд карда мешавад.
Раиси вилоят зимни шиносоӣ бо лоиҳаи иншоот масъулинро ҷиҳати анҷоми босифати корҳо вазифадор намуда, иброз дошт, ки бо қомат афрохтани биноҳои истиқоматии замонавӣ ба ҳусни шаҳри бостонӣ ҳусни дигар зам хоҳад шуд.
Сипас, Раиси вилоят Раҷаббой Аҳмадзода дар ҳамин мавзеъ ба корҳои сохтмонии Чойхонаи миллӣ ва меҳмонхона ҳусни оғоз бахшид. Дар асоси лоиҳа бинои Чойхонаи миллӣ ва меҳмонхона аз ду ошёна иборат мебошад. Дар иншооти сохташаванда бо назардошти «Соли рушди сайёҳӣ ва ҳунарҳои мардумӣ» ташкили меҳмонхонаи замонавӣ ба нақша гирифта шудааст, ки он дар як вақт барои 20 нафар хизмат мерасонад. Чойхонаи миллӣ бошад бо назардошти меъмории миллӣ сохта шуда, дорои 200 ҷойи нишаст аст.
Манбаъ: Хадамоти матбуоти Раиси вилояти Суғд
Нет комментариев