Дар семоҳаи аввали соли равон номгӯи маҳсулоти истеҳсолшаванда дар шаҳри Хуҷанд зиёд шуда, аз ҷониби 10 адад корхонаи саноатӣ ба маблағи 40 миллион сомонӣ маҳсулот ба давлатҳои хориҷӣ содирот карда шудааст. Дар ин бора зимни маҷлиси фаъолони шаҳри Хуҷанд, ки доир ба натиҷаҳои рушди хоҷагии халқи шаҳр дар семоҳаи аввали соли равон доир гардид, маълумот дода шуд.
Тавре аз Хадамоти матбуотии Раиси вилояти Суғд ба АМИТ «Ховар» хабар доданд, дар маҷлиси фаъолон муовини Раиси вилоят Назира Ғаффорӣ, роҳбарияти шаҳр, роҳбарони мақомоти ҳифзи ҳуқуқ, сардорони идораву ташкилотҳои шаҳрӣ, раисони кумитаи маҳаллаҳо, мудирони шуъбаву бахшҳои Мақомоти ичроияи ҳокимияти давлати шаҳр, роҳбарони корхонаҳои саноатӣ иштирок доштанд.
Муовини раиси шаҳри Хуҷанд Ҷамшед Абдуқаюмзода оид ба натиҷаҳои рушди иҷтимоию иқтисодии шаҳр дар семоҳаи аввали соли равон иттилоъ дода, аз ҷумла афзуд, ки новобаста аз таъсири омилҳои манфии беруна, ҳаҷми умумии маҳсулоти истеҳсолгардида ба 269,6 миллион сомонӣ расидааст, ки нисбат ба ҳамин давраи соли гузашта 104,2 фоизро ташкил медиҳад. Таҳлили нишондиҳандаҳои давраи ҳисоботӣ собит намуд, ки дар тамоми соҳаҳои хоҷагии халқ шумораи корхонаю муассисаҳо ба 1735 адад расидааст. Ҳамзамон теъдоди умумии кормандон 925 адад зиёд шуда, шумораи умумии корхонаҳои калону хурди саноатӣ ба 161 адад расидааст.
Таъкид гардид, ки дар шароити ташаккули иқтисоди бозаргонӣ раванди иҷрои буҷет ва ислоҳоти андоз тақвият ёфтааст. Дар натиҷа нақшаи қисми даромади буҷети давлатии шаҳр дар семоҳаи аввали соли равон ба андозаи 104,1 фоиз иҷро гардида, ба буҷет 96,0 миллион сомонӣ ворид шуд.
Манбаъ: АМИТ «Ховар»
Нет комментариев