Ҳамлавари бошгоҳи «Ливерпул» Муҳаммад Салоҳ гузаштан ба ҳайати дастаҳои «Реал» ва «Ювентус»-ро рад кард. Дар ин бора хабаргузории Mirror иттилоъ медиҳад. Ба иттилои манбаъ «Реал» ва «Ювентус» омода буданд, ки барои ҳамлагари мисрӣ 190 миллион доллар пардохт намоянд, аммо Салоҳ қарор кард, ки дар «Ливерпул» боқӣ монад. Инчунин, қайд карда мешавад, ки ба «Ливерпул» барои фурӯхтани ҳамтои Салоҳ дар хати ҳамла Садио Мане низ пешниҳод шуд, аммо ҳамлавари сенегалӣ ҳам хоҳиши рафтан аз бошгоҳи футболи англисиро надорад. Дар мавсими имсола «Ливерпул» ҳамагӣ бо таносуби як имтиёз аз «Манчестер Сити» мақоми дуввумро ишғол намуд. Ин ҳам дар мавридест, ки дастаи Юрген Клопп дар бозии ниҳоии Лигаи чемпионҳои Аврупо бар “Тотенхем” дастболо шуда, унвони чемпиониро соҳиб гардид.

Манбаъ: Варзиш-тв