Тибқи фармоиши Вазири маориф ва илми Ҷумҳурии Тоҷикистон 1 сентябр дар ҳамаи муассисаҳои таълимии ҷумҳурӣ Рӯзи дониш таҷлил мегардад.
Тавре аз маркази матбуоти Вазорати маориф ба АМИТ «Ховар» хабар доданд, мутобиқи банди 49-и қарори Ҳукумати Ҷумҳурии Тоҷикистон, моддаи 33 Қонуни Ҷумҳурии Тоҷикистон «Дар бораи маориф» ва банди 11-и Низомномаи Вазорати маориф ва илми Ҷумҳурии Тоҷикистон фармоиши Вазири маориф ва илми Ҷумҳурии Тоҷикистон «Дар бораи тағйир додани вақти баргузории дарс» ба имзо расид.
Тибқи фармоиши мазкур, бо назардошти ба рӯзи истироҳат (якшанбе) рост омадани Рӯзи дониш 1 сентябри соли 2019 дар ҳамаи муассисаҳои таълимии ҷумҳурӣ, новобаста аз шакли ташкилию ҳуқуқӣ рӯзи дарсӣ эълон гардида, 7 сентябри соли 2019 (шанбе) рӯзи истироҳат муқаррар гардидааст.
Ҳамчунин тибқи ҳамин фармоиш ба сардори Сарраёсати маорифи шаҳри Душанбе, сардорони раёсатҳои маорифи Вилояти Мухтори Кӯҳистони Бадахшон, вилоятҳои Суғду Хатлон ва мудирони шуъбаҳои маорифи шаҳру ноҳияҳои тобеи марказ, директорони мактабҳои президентӣ, мактаб-интернатҳои ҷумҳуриявӣ, роҳбарони муассисаҳои таҳсилоти ибтидоӣ, миёна ва олии касбӣ дастур дода шудааст, ки иштироки хонандагону донишҷӯёнро 1 сентябр ба дарс таъмин намоянд.
Манбаъ: АМИТ «Ховар»
Нет комментариев