Дар толори «Маркази фарҳанг»-и шаҳри Хуҷанд маҷлиси фаъолон оид ба натиҷаҳои рушди иҷтимоию иқтисодии шаҳри Хуҷанд дар нимсолаи аввали соли 2018 баргузор гардид.
Раиси шаҳри Хуҷанд Маъруф Муҳаммадзода ҷаласаро ифтитоҳ намуд. Сипас, муовини Раиси шаҳри Хуҷанд Ҷамшед Абдуқаюмзода доир ба бурду бохти хоҷагии халқи шаҳр дар шаш моҳи соли 2018 иттилоъ дода, аз ҷумла афзуд, ки нишондиҳандаҳои давраи сипаригашта собит намуд, ки новобаста аз таъсири манфии омилҳои беруна, корхонаҳои саноатии шаҳр, мутобиқ ба шароити нави саноатикунонии кишвар дар самтҳои мухталиф пурмаҳсул фаъолияти худро ба роҳ мондаанд. Дар натиҷа ҳаҷми маҳсулоти саноатии истеҳсолшуда бо назардошти тақсимоти барқ ва об нисбат ба ҳамин давраи соли гузашта 55,8 миллион сомонӣ ё 12,4 дар сад афзоиш ёфта, ҳаҷми он ба 507,6 миллион сомонӣ расидааст.
Аз ин миқдор маҳсулот ба маблағи 93,9 миллион сомонӣ ба давлатҳои хориҷи кишвар содирот карда шудааст, ки он дар муқоиса ба ҳамин давраи соли сипаригашта 31,7 дар сад ё 22,6 миллион сомонӣ афзоиш ёфта, он барои рушди иқтидори содиротии шаҳр заминаи устувор мегузорад. Дар корхонаҳои саноатӣ 73 намуд маьсулотҳои ниёзи мардум истеҳсол карда мешавад, ки аз онҳо ҳаҷми 52 намуд маҳсулотҳо нисбат ба ҳамин давраи соли 2017 аз 100,0 фоиз то 6 маротиба зиёд истеҳсол карда шудааст.
Иттилоъ дода шуд, ки айни замон, дар натиҷаи такомули диверсификатсия дар истеҳсолот бо роҳи ворид намудани технологияҳои мосир 41 адад корхонаҳои хурду калон маҳсулотҳои ивазкунандаи воридот ба маблағи 154,1 млн. сомонӣ истеҳсол кардаанд, ки он нисбат ба ҳамин давраи соли сипаригашта 35,2 млн. сомонӣ ё 29,6 дар сад афзоиш ёфтааст.
Умуман, дар ин давра фаъолияти пурсамари 98 корхонаҳои саноатиро бояд қайд намуд, ки онҳо нисбат ба ҳамин давраи соли гузашта зиёд маҳсулот истеҳсол намуда, барои ноил шудан ба нишондиҳандаҳои назарраси соҳа саҳми босазо гузоштанд. Фаъолияти Ҷамъиятҳои дорои масъулияти маҳдуди “Кимё”, “Реал”, “Силкоат бойя”, “Қоғази тоҷик”, “Фортуна К”, “Яхмоси 33”, “Сарей”, “Тоҷпроф”, “Ҷавонӣ”, “Сатн”, “Дилписанд” ва ғайраҳо ба ин мисол шуда метавонанд.
Таъкид гардид, ки баҳри таҳкими инфрасохтори соҳаи коммуникатсияи шаҳр тавассути ҳамаи намуди воситаҳои нақлиёт 1,1 млн. тонна бор ва 21,2 млн. нафар мусофирон кашонида шуданд, ки ин дар муқоиса ба ҳамин давраи соли пешина мутаносибан 2,1 ва 2,3 дар сад афзоиш ёфтааст.Дар ин самт то ҳол сифати хизматрасонии нақлиётҳои мусофиркашон ба талабот ҷавобгў набуда, яке аз масъалаҳои ҳалталаби соҳа ба ҳисоб меравад.Дар рушди бемайлони иқтисодиёти шаҳр муомилоти гардиши молҳо саҳми арзанда дошта, ҳаҷми он дар ин давра ба 1581,0 млн. сомонӣ расида, ҳаҷми хизматрасониҳо 579,8 млн. сомониро ташкил дода, онҳо нисбат ба ҳамин давраи соли сипаригашта бо нархҳои ҷорӣ мутаносибан 46,6 ва 25,5 дар сад афзоиш ёфтаанд.
Ҷамшед Абдуқаюмзода гуфт, ки тақвияти иқтидории нишондиҳандаҳои ҳамаи самтҳои иқтисодию иҷтимоии ин давра ба мо имкон дод, ки иҷрои нақшаи буҷети давлатӣ 103,4 фоиз ва буҷети маҳаллӣ 100,1фоиз таъмин гардида, аз нақшаҳои пешбинишуда мутаносибан дар ҳаҷми 6,1 млн. сомонӣ ва 80,6 ҳазор сомонӣ зиёд маблағ ба буҷет ворид гардад.
Вобаста ба раванди ободкориву созандагӣ иттилоъ дода шуд, ки дар ин ниҳод бинокорони шаҳр саҳми назаррас гузошта, аз ҳисоби ҳамаи сарчашмаҳои молиявӣ маблағгузории асосӣ 91,9 миллион сомониро ташкил дода, ба маблағи 73,8 миллион сомонӣ корҳои сохтмонию васлкунӣ ба анҷом расонида шудааст, ки он нисбат ба ҳамин давраи соли сипаригашта мутаносибан 34,8 дар сад ва 22,8 дар сад афзоиш ёфтааст. Яке аз манбаъҳои корҳои ба сомонрасида, ин маблағгузорӣ аз ҳисоби маблағҳои мутамарказ буда, аз ин сарчашма дар ҳаҷми 33,7 миллион сомонӣ корҳои сохтмонӣ ба анҷом расонида шуданд. Илова бар ин, ба маблағи 91,2 миллион сомонӣ фондҳои асосӣ ба истифода дода шуда, он нисбат ба ҳамин давраи соли сипаригашта ба маблағи 45,7 млн. сомонӣ ё 2 маротиба афзоиш ёфтааст. Аз тарафи корхонаҳои пудратии шаҳр бошад, ба маблағи 88,4 млн. сомонӣ корҳо ба анҷом расонида шуданд, ки он нисбат ба ҳамин давраи соли 2017 ба маблағи 26,4 млн. сомонӣ ё 42,7 дар сад афзоиш ёфтааст. Ҳамагӣ дар ин давра 12 иншооти маданию маишӣ, истиқоматию коммуналӣ ва саноатӣ бо арзиши фондҳои асосии 86,5 млн. сомонӣ сохта ба истифода дода шуд.
Таъкид шуд, ки фаъолияти соҳаҳои иҷтимоӣ-фарҳангӣ дар нимсолаи аввали соли 2018 дар асоси қонунҳои амалкунанда ба роҳ монда шуда, бобати татбиқи сиёсати иҷтимоию фарҳангии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қарор ва барномаҳои давлатӣ корҳои муайян ба иҷро расиданд.Тибқи нақшаи чорабиниҳо дар давраи ҳисоботӣ ҷиҳати истиқболи сазовори ҷашни Сада, 25-солагии таъсисёбии Қувваҳои Мусаллаҳи Ҷумҳурии Тоҷикистон, Рўзи Модар, Наврўзи байналмилалӣ, соли 2018–“Соли рушди сайёҳӣ ва ҳунарҳои мардумӣ”, Даҳсолаи байналмилалии амал “Об барои рушди устувор, солҳои 2018-2028”, ҷашни дар пешистодаи 30-солагии Истиқлолияти давлатии Ҷумҳурии Тоҷикистон, ташкил ва гузаронидани 1300 рўзи ободонию созандагӣ дар шаҳри Хуҷанд, дар самти иҷтимоӣ, фарҳангию маънавӣ ва равнақи созандагию бунёдкорӣ то имрўз як қатор чораҳо амалӣ гардиданд.
Иттилоъ дода шуд, ки аҳолии шаҳри Хуҷанд 180,5 ҳазор нафарро ташкил дода, шумораи умумии занҳои шаҳр 86091 нафар, ки аз онҳо занҳои қобили таваллуд 4673 нафар, кўдакони синни то 1 сола 3958 нафар, кўдакони синни то 4 сола 17563 нафар, кўдакони синни аз 10 то 14 сола 13759 нафар, наврасони аз 14 то 18 сола 15893 нафарро дар бар мегирад.
Сипас, аз тарафи Раиси шаҳри Хуҷанд Маъруф Муҳаммадзода як қатор роҳбарони соҳавӣ, аз ҷумла, Муъминҷон Тошматов, мудири шуъбаи саноат ва энергетикаи шаҳр, Заррина Раҳмонова, муовини сардори идораи нозироти андози шаҳр, Муҳайё Акмалхӯҷаева, мудири маорифи шаҳр, Даврон Шокиров, директори генералии КВДК “Сарраёсати ободонӣ ва хоҷагию манзилӣ ва коммуналӣ”, Ҳайдар Эшонқулов, роҳбари КВДК Хизматрасонии нақлиётӣ-санитарӣ”, Носир Ғафурзода, роҳбари кулли КВДК “Хуҷандобуканал”, Сӯҳроб Самадов, сардори идораи сохтмони асосии шаҳр, Абдухалил Ёрматов, раиси кумитаи идораи замини шаҳр, Садриддин Исомаддинӣ, сардори раёсати омори шаҳр, Мӯҳсин Миркамолов, мудири бахш оид ба корҳои дин, танзими анъана ва ҷашну маросимҳои миллӣ”, Муяссар Сангинова, мудири шуъба кор бо занон ва оилаи шаҳри Хуҷанд ва дигарон вобаста ба самти фаъолият пурсиш ба амал оварда шуда, баҳри ислоҳи камбудиҳо муҳлатҳо муайян карда шуданд.
Ба шуъбаи кор бо маҳаллаҳо ва раисони кумитаи маҳаллаҳо дастур дода шуд, ки ҷиҳати обод намудани гӯшаҳои мухталифи шаҳр ва мусоидат ҷиҳати пардохти андозим амволи ғайриманқул дастуру супоришҳои мушаххас дода шуд.
Анвар Яъқубӣ, муовини Раиси вилояти Суғд натиҷаи дастовардҳои шаҳри Хуҷандро мусбат арзёбӣ намуда, аз фаъолони шаҳр даъват ба амал овард, ки баҳри анҷом додани дастуру супоришҳои Раиси вилоят Суғд Раҷаббой Аҳмадзода бахусус дар самти ободонии шаҳр саъю талош варзанд.
Раиси шаҳри Хуҷанд Маъруф Муҳаммадзода ҷаласаро натиҷагирӣ карда, масъулини дахлдори соҳаҳои мухталифи шаҳрро барои анҷом додани рисолати созандагиву бунёдкорӣ бахшида ба 30 солагии Истиқлолияти давлатии Ҷумҳурии Тоҷикистон ҳидоят намуд.
Манбаъ: Дафтари матбуоти Раиси шаҳри Хуҷанд
Нет комментариев