Афлесунро ба кишвари мо аз давлатҳои Шарқ ва Амрикои Лотинӣ ворид мекунанд. Дар бозорҳо ва магозаҳо афлесунҳои навъҳои «Валенсия», «Нэвел» ва дигарро харидорӣ кардан мумкин аст. Вале ҳангоми харидорӣ намудани афлесун ҳушёр бошед. На ҳамаи афлесунҳои дар бозорҳо фурўхташаванда ба талаботи стандартӣ ҷавобгу ҳастанд. Баъзе истеҳсолкунандагон афлесунҳоро ранг медиҳанд, то ки он ранги норанҷии баландро гирад.
Азизон, медонед, чӣ тарз ин хел ҳилларо ошкор намоед. Барои ин, сараввал пўсти афлесунро камтар молед, то фаҳмед, ки оё ин меваҷот рангшуда ё не. Агар афлесун ранг карда шуда бошад, кафи дастатон ранги норанҷиро мегирад. Афлесуни тару тоза, пояи сабз ва пўсти сахти ҳамвори бенуқсон дорад. Дар хотир доред, ки беҳтарин афлесунҳо, андозаи миёна ва 200-250 грамм вазн доранд.
Афлесуни нави «Валенсия» каме маззаи турш дошта, донааш бисёр аст. Аз ин навъи афлесун одатан шарбат тайёр мекунанд. Афлесуни навъи «Нэвел»-ро бошад, бисёртар барои тайёркунии хуришҳо ва ороиши хўрокҳо истифода мебаранд. Вай маззаи ширинтар дошта, аз пўсташ осон тоза мешавад.
Афлесун аз витаминҳо ва минералҳои гуногун бой аст. Махсусан ин меваҷот дорои витамини С мебошад, ки дар фасли зимистон бар организми инсон бениҳоят зарур аст. Аз рўйи тавсияи духтурон, барои солим будан ва табъи хуш доштан, бояд ҳар рўз як дона афлесунро истеъмол кард.
Нет комментариев