Рӯзи 22 феврали соли 2018 бахшида ба 25-солагии таъсисёбии Қувваҳои мусаллаҳи Ҷумҳурии Тоҷикистон дар Театри давлатии мазҳака ва мусиқии ба номи Камоли Хуҷандии маркази вилояти Суғд бо иштироки иҷрокунандаи вазифаи Раиси вилоят Раҷаббой Аҳмадзода ҷамъомади тантанавӣ баргузор гашт. Иҷрокунандаи вазифаи Раиси вилоят Раҷаббой Аҳмадзода зимни суханронии худ хизматчиёни ҳарбӣ, собиқадорони Қувваҳои мусаллаҳ ва кулли ҳозиринро бахшида ба 25-умин солгарди таъсисёбии Артиши миллӣ табрик намуда, саҳми онҳоро дар пойдории амну суботи ҷомеа ва ҳифзи дастовардҳои даврони соҳибистиқлолии мамлакат назаррас арзёбӣ намуд. Таъкид карда шуд, ки Қувваҳои мусаллаҳи кишвар дар давраи бисёр ҳассоси таърихӣ ташкил гардида, аз рӯзҳои нахустин баҳри иҷрои рисолати худ шурӯъ намудааст. Бо талошҳои пайвастаи Сарфармондеҳи Олии Қувваҳои мусаллаҳи Ҷумҳурии Тоҷикистон, Генерали Артиш муҳтарам Эмомалӣ Раҳмон Қувваҳои мусаллаҳ марҳила ба марҳила рушду такомул ёфта, ба нерӯи бузурги мудофиавӣ ва сипари боътимоди давлату миллат табдил ёфтааст. Дар идомаи суханронӣ роҳбари вилоят қайд намуд, ки имрӯзҳо дар тамоми қисмҳои низомӣ шароити зарурӣ фароҳам оварда шудааст. Раҷаббой Аҳмадзода Артиши миллиро мактаби бузурги тарбияи ватандӯстиву ватандорӣ ва матонату мардонагӣ унвон карда, изҳор дошт, ки хизматчиёни ҳарбии Қувваҳои мусаллаҳи Ҷумҳурии Тоҷикистон ҳамеша ба иҷрои рисолати муқаддаси худ, яъне ҳифзи Ватан-Модар ва дифоъ аз манфиатҳои давлату миллат омодаанд. Сипас, дар асоси Амри иҷрокунандаи вазифаи Раиси вилоят гурӯҳи калони хизматчиёни ҳарбӣ бо Сипоснома ва туҳфаҳои хотиравии Мақомоти иҷроияи ҳокимияти давлатии вилояти Суғд сарфароз гардонида шуданд. Дар охир барои иштирокдорон барномаи консертии аҳли фарҳанги вилоят пешниҳод карда шуд.
Манбаъ:сомонаи расмии МИҲД-и вилояти Суғд
Нет комментариев