Тавре қаблан хабар додем, шоми дирӯз аввалин бастаҳои ваксина бар зидди коронавирус- AstraZeneca ба Тоҷикистон ворид карда шуд.
Аввалин бастаҳо иборат аз 192 000 воя ваксина буда, тавассути парвози махсуси «Сомон-Эйр» аз Деҳлӣ ба Душанбе интиқол дода шуданд.
Дар Вазорати тандурустӣ ва ҳифзи иҷтимоии аҳолӣ зикр намуданд, ки бақияи ваксинаҳо ояндаи наздик марҳила ба марҳила ба Тоҷикистон интиқол дода мешавад.
Ваксинаи аврупоӣ бар зидди коронавирус дар чаҳорчӯби механизми COVAX дастрас гардид.
Тавре АМИТ «Ховар» қаблан иттилоъ дода буд, дар доираи механизми мазкур Тоҷикистон 732 ҳазор вояи ваксинаи истеҳсоли ширкати АstrаZeneca-ро дастрас мекунад ва дар марҳилаи аввал 20%-и аҳолӣ ба эмгузаронӣ фаро гирифта мешавад.
Дар марҳилаи аввал, пеш аз ҳама, бояд қишри осебпазири ҷомеа, ки ба он кормандони соҳаи тандурустӣ, пиронсолони аз 70-сола боло, онҳое, ки аз бемориҳои музмини ғайрисироятӣ азият мекашанд ва хизматчиёни ҳарбӣ фаро гирифта шаванд.
Дар марҳилаи дуввум дар Тоҷикистон ба нафарони аз 60-сола боло ва сипас аз 50-сола боло ваксина гузаронида мешавад, ки ин беш аз 1 миллиону 800 ҳазор нафарро ташкил медиҳад.
Нафарони то синни 18-сола ба ин рӯйхат алҳол шомил намешаванд.
42,5% қисми боқимондаи аҳолӣ бо дигар доруҳое, ки аз сарчашмаҳои гуногун ба кишвар ворид карда мешаванд — онҳо метавонанд истеҳсоли Чин ё Россия бошанд, ваксина карда мешаванд.
Ҳамин тавр, аллакай дар марҳилаи сеюм 3,9 миллион нафар ваксина карда мешаванд.
Дар маҷмӯъ, бояд ба 5,8 миллион нафар сокинони Тоҷикистон ваксина бар зидди коронавирус гузаронида шавад.
Ёдовар мешавем, ки ҳафтаи гузашта Ситоди ҷумҳуриявӣ оид ба пурзўр намудани чораҳои зиддиэпидемӣ барои пешгирии интиқол ва пайдоиши сирояти нави коронавирус (COVID-19) дар Ҷумҳурии Тоҷикистон қарор қабул намуд, ки тибқи он Вазорати тандурустӣ ва ҳифзи иҷтимоии аҳолӣ муваззаф шудааст, ҷиҳати таъмин намудани ҳифзи солимии гурўҳҳои осебпазири аҳолӣ барои гузаронидани ваксинатсияи аҳолӣ бар зидди сирояти нави коронавирус чорабиниҳои омодагӣ ба роҳ монда, банақшагирии аҳолиро аз рўи синну сол бо дарназардошти марҳалаҳои дуюм ва сеюми иммунизатсия анҷом диҳад ва ҳарчи зудтар лоиҳаи санади меъёрии ҳуқуқии дахлдорро оид ба гузаронидани иммунизатсия бар зидди сирояти нави коронавирус дар Ҷумҳурии Тоҷикистон таҳия намуда, барои тасдиқ ба Ҳукумати мамлакат пешниҳод намояд.
Бояд зикр кард, ки ваксинаи ширкати британиягию шведии AstraZeneca миёни доруҳо аз рӯи шумораи тасдиқ барои истифода аз ҷониби танзимкунандагон дар ҷаҳон ҷои аввалро гирифтааст. Ҳоло он дар 61 давлати ҷаҳон истифода мешавад. Ваксинаи русии “Sputnik V” дар ҷои дуюм ва ваксинае, ки ширкати амрикоии Pfizer истеҳсол кардааст, дар ҷои сеюм қарор гирифтаанд.
Нет комментариев