Дар асоси нақшаи муштараки Раёсати кор бо занон ва оилаи мақомоти иҷроияи ҳокимияти давлатии вилоят, Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд, шуъбаи маъмурию ҳуқуқии дастгоҳи Раиси вилоят якҷо бо ташкилотҳои ҷамъиятии “Чашмаи хаёт” ва “Фонди рушди ҷомеа” ҷиҳати таъмини иҷрои «Нақшаи миллии муқовимат ба савдои одамон дар Ҷумҳурии Тоҷикисон барои солҳои 2019-2021» 5 августи соли 2021 дар Меҳмонхонаи «Суғдиён»-и шаҳри Хуҷанд бахшида ба «Рӯзи умумиҷаҳонии муқовимат бо савдои одамон» мизи мудаввар баргузор гардид.
Мизи мудаввар бо иштироки субъектҳои муқовимат ба савдои одамон аз сохторҳо давлатӣ, ташкилотҳои ҷамъиятӣ ва рӯзноманигорон гузаронида шуд.
Дар мизи мудаввар, сармутахассиси Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд Диловар Муродов доир ба «Баланд бардоштани иттилоотнокӣ ва маърифати ҳуқуқии муҳоҷирон оид ба масъалаҳои савдои одамон ва пешгирии он», сармутахассиси Раёсати кор бо занон ва оилаи мақомоти иҷроияи ҳокимияти давлатии вилоят Гулнора Гадойбоева оид ба «Нақши Раёсати кор бо занон ва оила дар пешгирии ҳама гуна ҳолатҳои номатлуб дар байни занон ва духтарон» ва директори Ташкилоти ҷамъиятии «Фонди рушди ҷомеа» Бахтиёр Абдуҷабборов доир ба таъмини иҷрои «Нақшаи миллӣ оид ба муқовимат ба савдои одамон дар Ҷумҳурии Тоҷикистон барои солҳои 2019-2021» суханронӣ намуданд.
Ҳадаф аз баргузории ҳамоиш дарёфти роҳҳои нави муқовимат ба савдои одамон ва расонидани кӯмак ба қурбониёни савдои одамон мебошад.
Бояд қайд намуд, ки бо мақсади баланд бардоштани сатҳи огаҳии аҳолӣ, пешгирӣ ва рафъи хатарҳои савдои одамон ва ҷиноятҳои ба он алоқаманд, бахшида ба «Рӯзи умумиҷаҳонии муқовимат бо савдои одамон» дар қаламрави вилоят як қатор чорабиниҳои иттилотию тарғиботӣ, вохӯриҳо, мулоқотҳо ва аксияҳо гузаронида, ба сокинон варақаҳои таблиғотӣ тақсим карда шуд.
Манбаъ: Хадамоти матбуоти Раиси вилояти Суғд
Нет комментариев