Субҳи рӯзи 3 сентябр Президенти Ҷумҳурии Тоҷикистон Эмомалӣ Раҳмон дар гузашти низомӣ ба муносибати 70 — солагии анҷоми Ҷанги дуюми ҷаҳонӣ, ки дар маркази шаҳри Пекин доир гардид, иштирок кард. Дар макони асосии баргузории чорабинии идона — майдони Тянанмэн Президенти Ҷумҳурии Тоҷикистон Эмомалӣ Раҳмон ва сарони дигар кишварҳоро Раиси Ҷумҳурии Мардумии Чин Си Ҷинпин истиқбол гирифт. Дар ин чорабинӣ сарони беш аз 25 давлат ва роҳбарону намояндагони воломақом аз созмонҳои бонуфузи минтақавию байналмилалӣ иштирок доштанд. Пеш аз оғози чорабинӣ маросими аксбардорӣ доир шуд. Пас аз аксбардорӣ Раиси Ҷумҳурии Мардумии Чин Си Ҷинпин Президенти Ҷумҳурии Тоҷикистон Эмомалӣ Раҳмон ва сарони дигар давлатҳоро барои тамошои паради ҳарбӣ ба минбари ҳукуматӣ дар майдони Тянанмэн даъват намуд. Дар оғоз Раиси Ҷумҳурии Мардумии Чин Си Ҷинпин суханронӣ карда, ҳозирин ва тамоми мардуми Чинро бо анҷоми Ҷанги дуюми ҷаҳонӣ табрик намуд. Дар гузашти низомӣ ҷузъу томҳои 7 округи ҳарбӣ, флоти ҳарбии баҳрӣ, неруҳои ҳарбӣ — ҳавоӣ, политсияи мардумӣ ва аввалин маротиба собиқадорони артиши дуюми хушкигард, ки дар ҷанг иштирок кардаанд, ширкат варзиданд. Дар паради ҳарбӣ ҳамчунин нахустин маротиба ҷузъу томҳои ҳарбии Тоҷикистон, Россия, Муғулистон, Қазоқистон ва Қирғизистон иштирок карданд. Ҷумҳурии Тоҷикистонро дар ин чорабинии тантанавӣ як ҷузъи полки комендантии Вазорати мудофиаи Ҷумҳурии Тоҷикистон таҳти роҳбарии полковник Илҳом Махсумов намояндагӣ карда, бо қадамзании зебои мутантан аз назди минбари ифтихорӣ гузаштанд. Таърих гувоҳ аст, ки барои ба даст овардани ғалаба дар ҷанги дуюми ҷаҳонӣ ҷавонмардони тоҷик ҳам корнамоиҳои зиёд нишон додаанд. Бинобар ин бо нишони ҳамдилӣ низомиёни тоҷик дар қатори намояндагони Чин ва дигар кишварҳо дар паради ҳарбӣ фаъолона иштирок карданд. Дар ин бора аз хадамоти матбуотии Президенти Ҷ Т иттилоъ доданд.
Сафорати Ҷумҳурии Тоҷикистон дар Олмон дар радифи беш аз 50 сафоратхона ва 60 созмони ғайридавлатӣ дар чорабинии анъанавии рӯзи дарҳои кушоди Вазорати ҳамкориҳои иқтисодӣ ва рушди Олмон, гӯшаи иттилоотию маърифатӣ созмон дода, имкониятҳои иқтисодӣ ва сайёҳии кишварро ба маърази тамошо гузошт.Вазорати ҳамкориҳои иқтисодӣ ва рушди Олмон шарики боэътимоди кишвари мо дар пиёдасозии cиёсати рушди Олмон дар Тоҷикистон аст. Аз намоишгоҳи Тоҷикистон котибони давлатии парлумонии Вазорати рушди иқтисод ва савдо Ҳаннс Фухтел ва Томас Зилберҳорн боздид ба амал оварданд. Дар ин чорабинӣ, ки таҳти унвони «Таъмини босуботи маводҳои бофандагӣ» доир шуд, намояндагони кишварҳои гуногун иқтидори истеҳсолии худро муаррифӣ намуда, ҳавасмандиашонро барои тақвияти ҳамкорӣ бо Олмон изҳор доштанд.
Сафорати Тоҷикистон дар ин чорабинӣ бо истифода аз захираҳои дохилӣ ба иштирокчиён ва меҳмонон маводҳои таблиғотӣ, сабтҳои аудиовизуалиро пешниҳод намуд. Инчунин ҳунари сарояндагии овозхони тоҷик Фахридини Малик ва муаррифии фарҳанги таомҳои миллии тоҷикӣ аз ҷониби ҳозирин бо самимият пазируфта шуд. Мавриди зикр аст, ки Олмон ҳамчун узви Иттиҳоди Аврупо ӯҳдадор шудааст, ки 7 фоизи буҷаи худро барои ҳамкориҳо бо мақсади рушд равона намояд. Дар буҷаи давлатии ин кишвар, ки чанде қабл Ҳукумати Олмон онро қабул намуд, барои ҳамкориҳои минбаъда дар бахши рушд бо кишварҳои рӯ ба тараққӣ 7,5 миллиард евро пешбинӣ гардидааст. Дар ин бора агентии Ховар иттилоъ медиҳад.
Чанде пеш Раиси вилояти Суғд Абдураҳмон Қодирӣ роҳбари Созмони Амният ва Ҳамкории Аврупо дар Ҷумҳурии Тоҷикистон Маркус Мюллерро ба ҳузур пазируфт. Зимни мулоқот аз ҷониби меҳмонон таъкид шуд, ки Тоҷикистон бо кишварҳои Аврупо муносибати хуби иқтисодиву иҷтимоӣ дошта, ҳамкориҳои дуҷониба низ дар сатҳи зарурӣ қарор доранд. Раиси вилоят зимни сӯҳбат доир ба вазъи хоҷагии халқи вилоят ба меҳмонон маълумот дода, афзуд, ки дар натиҷаи ислоҳоти кишоварзӣ шиддати муҳоҷирати меҳнатӣ паст карда шуд. Бо қаноатмандӣ таъкид гардид, ки соҳиби замин гардидани саҳмдорон яке аз омилҳои асосии кам шудани муҳоҷират гардидааст. Абдураҳмон Қодирӣ илова намуд, ки бо мақсади бо ҷои кор таъмин намудани занону духтарон ҳоло дар вилоят иқдомҳои зарурӣ амалӣ мешаванд. Бо эҳёи меҳнати хонагӣ бонувони вилояти Суғд соҳиби ҷои кор ва даромад мешаванд, ки ин албатта ба некӯаҳволии онҳо мусоидат хоҳад кард. Роҳбари Созмони Амният ва Ҳамкории Аврупо дар Ҷумҳурии Тоҷикистон Маркус Мюллер дар навбати худ изҳор дошт, ки иқдомҳои амалишаванда барои бо ҷои кор таъмин намудани сокинон саривақтиву зарурианд ва бо чунин роҳҳо метавон барои бо ҷойи корӣ таъмин намудани сокинон ва баланд гардидани сатҳи зиндагии онҳо мусоидат намуд. Дар ин бора аз хадамоти матбуотии раиси вилоят иттилоъ доданд.
Пас аз чанд рӯз иди Истиқлолияти давлатии Ҷумҳурии Тоҷикистони азизамон дар сартосари кишвар мутантан ҷашн гирифта мешавад. Вобаста ба ин рӯзи хештаншиносиву худогоҳӣ дар қаламрави шаҳр як қатор корҳои омодагӣ ва ҳам ободонӣ рафта истодааст.
Чанде қабл Раиси шаҳр Раҷаббой Аҳмадзода бо комиссияи махсуси Мақомоти иҷроияи ҳокимияти давлатии шаҳр ҳолати кӯчаи ба номи Рифъат Ҳоҷиевро аз назар гузаронд. Раиси шаҳр аз чорроҳаи микроноҳияи 19-ум сар карда, то микроноҳияи 13-ум ҳолати ду қади роҳро доири ба анҷом расондани корҳои ободонӣ, кабудизоркунӣ, риояи сатҳи зебогӣ ороишӣ ва қонуни забони давлатиро санҷид. Зимни азназаргузаронӣ Раҷаббой Аҳмадзода ба масъулини соҳаҳои гуногун ва ба соҳибони мағозаҳо оид ба иҷроиши корҳои ободониву сабзкорӣ супоришҳои қатъӣ дод. Аз ҷумла, Раиси шаҳр ба роҳбарони воҳидҳои сохтори дахлдор таъкид намуд, ки ба ҳолати санитарии назди бинои нуқтаҳои савдо, истифодаи гулҳои ороишӣ вобаста ба мавсими сол, таъмири роҳравҳо, ба тартиб даровардани ноқилҳои барқӣ ва ғайра эътибори ҷиддӣ дода, камбудиҳои ҷойдоштаро дар мӯҳлатҳои кӯтоҳтарин бартараф намуда, майдончаҳои ду бари роҳро бо ҳамкории соҳибкорон сабзу гулзор намоянд. Раҷаббой Аҳмадзода масъулинро муваззаф намуд, ки ба шиору овезаҳои бари роҳу назди мағозаҳо аҳамияти ҷиддӣ дода, лавҳаҳои рекламавӣ ва тамоми матни хусусияти таблиғотӣ ва огоҳӣ дошта бояд пурра бо забони тоҷикӣ навишта шаванд. Раҷаббой Аҳмадзода ба роҳбарияти маҳаллаҳои «Сирдарё» ва «Суғдиён» супориш дод, ки ҳамроҳи аҳолӣ маъракаҳои шанбегӣ ташкил намуда, ҷӯйборҳо, роҳравҳо ва майдончаҳои наздиҳавлигиро тоза кунанд. Дар ин бора аз хадамоти матбуотии раиси шаҳр иттилоъ доданд.
Варзишгари маъруфи тоҷик Ҷаҳон Қурбонов дар мусобиқаи қаҳрамонии бокси Осиё, ки дар пойтахти Тайланд, шаҳри Бангкок ҷараён дорад, ба даври ниманиҳоӣ роҳ ёфт. Ба иттилои Мирзо Шамсиев, сармураббии дастаи мунтахаби бокси Тоҷикистон, Ҷаҳон Қурбонов дар рақобатҳо дар вазни то 91 килограмм баъди ду пирӯзӣ бар рақибонаш аз Корея ва Покистон ба нимфинал баромад. Дар даври ниманиҳоӣ, ки 4 сентябр баргузор мешавад, рақиби муштзани тоҷик аз Қазоқистон мебошад. Дар мусобиқаи қаҳрамонии Осиё дар Бангкок 188 варзишгар аз 28 кишвар ширкат дорад, ки ин дар таърихи сабқати қитъавӣ шумораи рекордист. Дар ин бора аз хадамоти матбуотии раиси вилоят иттилоъ доданд.
Нет комментариев