XXX

15 январи соли 2015 мулоқоти муовини вазири корҳои хориҷии Ҷумҳурии Тоҷикистон Низомиддин Зоҳидӣ бо кордори Сафорати Ҷумҳурии Корея  дар Ҷумҳурии Тоҷикистон Ён Ҷон Ку баргузор гашт. Дар ҷараёни мулоқот масоили рушди муносибатҳои дуҷониба ва ҳамкорӣ дар доираи созмонҳои байналмилалӣ ва минтақавӣ мавриди баррасӣ қарор гирифтанд. Дар вохӯрӣ ҳамчунин дар мавриди омодагии ҷонибҳо ба чорабиниҳои муҳими байналмилалӣ — Форуми ҳафтуми ҷаҳонӣ, ки моҳи апрел дар шаҳри Тегуи Корея баргузор мегардад ва Конфронси байналмилалии сатҳи баланд доир ба арзёбии дастовардҳои Даҳсолаи байналмилалии амал Об барои ҳаёт, ки онро дар моҳи июни соли ҷорӣ Душанбе мизбонӣ мекунад, табодули назар сурат гирифт.Дар ин бора агентии Ховар хабар медиҳад.

XXX

Ҷилди сеюми «Энсиклопедияи миллии тоҷик» бо теъдоди 5 ҳазор нусха нашр гардид.Дар кори омода намудани китоби мазкур беш аз 70 нафар олиму мутахассиси соҳаҳои гуногун заҳмат кашидааст. Ҷилди чоруми энсиклопедияи мазкур ва «Донишномаи фарҳанги мардум» низ омодаи чоп аст.Тибқи иттилои олими варзида, сармуҳаррири «Энсиклопедияи миллии тоҷик» Нурмаҳмад Амиршоҳӣ дар соли 2015 як силсила китобҳои ҷолиб, аз ҷумла «Таърихи Табарӣ» нашр хоҳанд шуд. Дар ин бора агентии Ховар хабар медиҳад.

XXX

13 январ дар Кохи матбуоти шаҳри Хуҷанд нишасти хабарии Раиси вилояти Суғд оид ба натиҷаҳои вазъи  иҷтимоию иқтисодии вилоят дар моҳҳои январ-декбари соли 2014 баргузор гардид, ки дар он 60 нафар намояндагони васоити ахбори омма иштирок намуданд. Нишасти матбуотӣ бо сухани ифтитоҳии мудири Шӯъбаи иттилоот ва таҳлили дастгоҳи Раиси вилоят Музаффар Юнусов оғоз ёфт ва сипас Раиси вилоят Абдураҳмон Қодирӣ оид ба натиҷаҳои вазъи иҷтимоию иқтисодии вилоят дар давраи ҳисоботӣ маълумот дод. Зикр гардид, ки мардуми вилоят чун тамоми сокинони мамлакатамон соли 2014 — ро, ки соли таҷлили ҷашни бузурги миллӣ – 20-солагии Конститутсияи Ҷумҳурии Тоҷикистон ва соли пурбаракат, хотирмон ва дастовардҳои шоиста буд, бо сарбаландӣ ҷамъбаст намуданд. Абдураҳмон Қодирӣ ҳамзамон аз амалишавии иқдомоти роҳабарияти вилоят дар соли сипаришуда, аз ҷумла ислоҳоти кишоварзӣ, эҳёи ҳунарҳои мардумӣ ва ободонии роҳҳо ёдовар шуда, изҳор дошт, ки дар асоси Қарори Раиси вилоят аз 9 декабри соли 2013 аз 2 хазору 991 адад хоҷагиҳои калонҳаҷм 2 хазору 968 адад мавриди азнавташкилдиҳӣ қарор дода шуда, дар заминаи онҳо 37 хазору 90 адад хоҷагиҳои деҳқонии нав таъсис дода шуд. Дар ин бора хабарнигорамон Мутрибахон Алихонзода иттилоъ медиҳад.

XXX

www.khovar.tj

Дастаи мунтахаби ҷавонони зери 21-солаи Тоҷикистон, ҷиҳати иштирок дар мусобиқаи байналмилалии «Ҷоми Иттиҳод-2015», ки аз 16 то 25 январ баргузор мегардад, ба Санкт-Петербурги Русия сафар кард. Ҳайати намояндагии даста аз 25 нафар иборат аст, ки аз онҳо 19 нафарашон бозигарон мебошанд. Бозии аввалии мунтахаби ҷавонони Тоҷикистон дар «Ҷоми Иттиҳод-2015» рӯзи шанбеи 17 январ бо мунтахаби ҷавонони Қазоқистон баргузор мешавад. Рӯзи дигараш, яъне 18 январ, онхо бо ҳамсолони худ аз Африқои ҷанубӣ рақобат мекунанд. Бозии охирини марҳилаи гурӯҳии худро, мунтахаби ҷавонони мо, рӯзи 20 январ бо мунтахаби ҷавонони Литва мегузаронад. Дар ин бора агентии Ховар хабар медиҳад.