Президенти Бонки Осиёии Рушд Такехико Накао бисту панҷуми октябр бо сафари корӣ ба Ҷумҳурии Тоҷикистон ташриф оварда, дар доираи ин сафари худ аз Кӯли Сарез ва Неругоҳи барқи обии «Норак» боздид ба амал овард. Зимни боздид аз Кули Сарез ва Нерўгоҳи барқи обии «Норак» Президенти Бонки Осиёии Рушд Такехико Накао, ки ҷиҳати иштирок дар татбиқи лоиҳаҳо ва ҷаласаи 16-уми Конференсияи вазирони Барномаи ҳамкории иқтисодии минтақавии Осиёи Марказӣ ба Ҷумҳурии Тоҷикистон ташриф овардааст, зикр намуд, ки ҶТ дар миқёси Осиёи Марказӣ аз захираҳои обӣ бойтарин давлат мебошад. Кули Сарез, ки яке аз бузургтарин манбаъи оби мусаффо дар ҷаҳон маҳсуб меёбад, бо табиати дилфиреб ва нотакрораш диққати коршиносони масоили ҷаҳонро ҷалб намудааст. Ҳангоми боздид аз Нерўгоҳи барқи обии «Норак» Такехико Накао изҳор дошт, ки сарватҳои ғании обӣ ва гидроэнергетикии Тоҷикистон, ки дар олам яке аз бузургтаринҳо ба шумор мераванд, дар ҳолати самаранок ба кор андохтанашон метавонанд барои ҳамаи кишварҳои минтақа манфиати зиёди иҷтимоиву иқтисодӣ оранд. Ҳамасола дар Тоҷикистон 64 миллиард метри мукааб об ташаккул меёбад, ки ин тақрибан 60 фоизи ҳаҷми оби дарёҳои минтақаро ташкил медиҳад.
Манбаъ: сомонаи расмии АМИТ «Ховар»
Нет комментариев