Дар Маркази таълимию истироҳатии Бонки миллии Тоҷикистон воқеъ дар шаҳри Гулистон Анҷумани дуюми минтақавии шартномабандӣ-2017 баргузор гардид.
Соли дуюм аст, ки бо иқдоми Мақомоти иҷроияи ҳокимияти давлатии вилояти Суғд чунин Анҷуман доир мегардад. Дар ин чорабинии ҳадафманд беш аз 150 хоҷагидору соҳибкорон, масъулини мақомоти гуногуни марбути соҳаҳои иқтисодиёти шаҳру навоҳии Ҷумҳурии Тоҷикистон, намояндагони давлатҳои Федератсияи Россия, Қирғизистон ва Белорус ширкат варзиданд.
Муовини Раиси вилоят Анвар Яъқубӣ ба кори Анҷуман ҳусни оғоз бахшида, изҳор дошт, ки ҳадафи баргузории ин чорабинӣ, пеш аз ҳама, фароҳам овардани шароиту имконият бобати тақвият бахшидани муносибатҳои корӣ ва тиҷоратӣ, самтҳои дурнамои коркарди маҳсулот ва маблағгузорӣ, муҳокимаи имконоту шароитҳо, бастани шартномаҳо оид ба фаъолияти содироту воридоти маҳсулот мебошад.
Мутахассисон ва меҳмонон доир ба номгӯи молу маҳсулот, хизматрасонӣ дар бозори иқтисодӣ ва пайдо намудани мавқеи худ дар тиҷорат изҳори ақида намуданд. Аз ҷумла, Дмитрий Прохоренко – намояндаи ҶС «Маркази содиротии Русия» дар мавзӯи «Равзанаи ягонаи дастгирии воридоти ғайриашёӣ», Юрий Шевсов бобати «Раванди бозори ҳамкории иқтисодии Авроосиё, муаммо ва дурнамо», (Белорус), Азимхон Тӯраев аз ширкати «Нексигол — навъовар» дар хусуси «Иноватсия дар ҷаҳони содироти маҳсулоти хоҷагии қишлоқ», сардори Раёсати кишоварзии вилоят Хайрулло Бобозода дар бораи иқтидори содиротии маҳсулоти меваю сабзавоти вилояти Суғд ва дигарон баромад намуданд.
Иштирокдорон баргузории ин тадбирро аз ҳар ҷиҳат судманд арзёбӣ намуда, қайд карданд, ки ин иқдом баҳри баланд бардоштани сифату афзоиши маҳсулоти кишоварзӣ ва нерӯи содиротии он мусоидат хоҳад кард. Дар доираи Анҷумани дуюми минтақавии шартномабандӣ-201» наздик 20 адад шартномаҳои ҳамкорӣ ба имзо расид.
Боиси тазаккур аст, ки меҳмонони анҷуман инчунин аз мавзеъҳои таърихиву фарҳангии вилоят, аз ҷумла «Қасри маданияти Арбоб»-и ноҳияи Бобоҷон Fафуров, Муассисаи давлатии «Маҷмааи фарҳангию таърихии «Қалъаи Хуҷанд» боздид ба амал оварданд.
Манбаъ: Хадамоти матбуоти Раиси вилояти Суғд
Нет комментариев