Бо нисбатан гарм шудани ҳаво дар шаҳри Хуҷанд корҳои мумфаршкунӣ ва таъмири роҳҳо оғоз шуданд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.
Раиси вилояти Суғд Раҷаббой Аҳмадзода дар хиёбони Исмоили Сомонӣ ба корҳои роҳсозӣ оғоз бахшида, барои таъмиру мумфаршкунии роҳҳои дохилӣ, тоза нигоҳ доштани кӯчаву хиёбонҳо ба роҳбарияти шаҳр ва масъулини Идораи хоҷагии роҳҳои автомобилгарди вилоят ва Идораи хоҷагии манзиливу коммуналӣ дастуру супориш дод.
Ба иттилои мутахассисон, дар минтақаҳои гуногуни шаҳр давоми чанд рӯзи оянда беш аз 20 ҳазор метри мураббаъ роҳ мумфарш мешавад.
Мумфаршкунӣ ва таъмири қисматҳои алоҳидаи роҳҳоро Ҷамъияти дорои масъулияти маҳдуди «Ваҳдат-2018» ба сомон мерасонад.
Бо дастгирии Мақомоти иҷроияи ҳокимияти давлатии вилояти Суғд инчунин шоҳроҳи Хуҷанд-Ғафуров ба масофаи беш аз даҳ километр (аз ду самти ҳаракат) мумфарш мешавад.
Манбаъ: АМИТ «Ховар»
Нет комментариев