Давоми 7 рӯзи маъракаи муҳими сиёсӣ — даъвати ҷавонон ба хизмати ҳарбӣ иҷрои нақша дар ҷумҳурӣ 56 фоизро ташкил дод. Дар ин бора сардори маркази матбуоти Вазорати мудофиаи мамлакат Фаридун Маҳмадализода ба хабарнигори АМИТ «Ховар» хабар дод.
Ба гуфтаи мавсуф, аз рӯзи оғози маъракаи даъватӣ то ин дам иҷрои маъракаи даъват ба хизмати ҳарбӣ дар вилояти Суғд 43 фоиз, вилояти Хатлон 45,1, шаҳру ноҳияҳои тобеи ҷумҳурӣ 77 фоиз ва шаҳри Душанбе 74,3 фоиз иҷро шудааст. Дар ҷумҳурӣ то ин муддат 16 шаҳру ноҳия маъракаи даъватро ба анҷом расонидаанд.
Ёдовар мешавем, ки шурӯъ аз 1 апрел дар доираи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ва тибқи талаботи Фармони Президенти Ҷумҳурии Тоҷикистон муҳтарам Эмомалӣ Раҳмон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1994-2003 Ҷумҳурии Тоҷикистон ба хизмати ҳарбӣ» дар тамоми шаҳру ноҳияҳои мамлакат маъракаи даъвату гусели шаҳрвандон ба хизмати ҳатмии ҳарбӣ муташаккилона оғоз ёфт.
Манбаъ: АМИТ «Ховар»
Нет комментариев