Дар ин шаб ситораи тарроҳон (моделерҳо)-и Осиёи Марказӣ нисбат ба дигар шабҳо дурахши ҷолибе доштанд. Зеро, бегоҳии 26-уми май дар доираи Фестивали анъанавии «Абрешим ва зираворӣ» дар макони зебову дилфиреби «Кӯкилдош»-и шаҳри бостонии Бухорои ҷумҳурии бародарии Ӯзбекистон намоиши назаррабои либосҳои миллӣ баргузор гардид.
Дар он намояндагони кишварҳои Осиёи Марказӣ — Ӯзбекистон, Тоҷикистон, Қазоқистон ва Қирғизистон иштироки фаъол доштанд. Чорабинии беназир таҳти унвони «Абрешими Ӯзбекистон аз нигоҳи дунё» дар сатҳи хеле хуби ташкилӣ ва хотирмону пуршукӯҳ доир гардид.
Бино ба гуфти ташкилкунандагон ҳадафи асосии «Намоиши либосҳо» қабл аз ҳама муаррифии матоъҳои аз ҷиҳати экологӣ тозаи абрешим, атласу адрас ва пахтагин, ҷалби таваҷҷӯҳи ҷаҳониён ба кишварҳои Осиёи Марказӣ, ки ватани истеҳсоли чунин матоъҳо мебошанд, рушди соҳаи саноати сабук, ташаккули истеҳсолоти маҳаллӣ ва исбот намудани он ки воқеан либосҳои аз чунин намуди матоъҳо дӯхташуда ба саломатии инсон безараранд ва баръакс ҳатто манфиатоваранд, маҳсуб мешавад.
Ҳамин тавр, бо баробари ҷамъ омадани садҳо нафар тамошобинон-шаҳрвандони Бухоро, меҳмонони Фестивали «Абрешим ва зираворӣ» аз кишварҳои хориҷи дуру наздик чорабинӣ оғоз шуд.
Пас аз намоиши либосҳои шоҳонаи зардӯзишуда, ки тани мард ва ду занро оро медоданд, ба саҳна бо тартиби муайян коллексияҳои тарроҳони кишварҳои Осиёи Марказӣ манзур ба дидани ҷамъомадагон гардид.
Чун матои атлас нишон аз баҳору зебоист, сароғоз маҳсули меҳнати дӯзандагони шаҳри Бухоро пешниҳоди бинандагон карда шуд. Либосҳои ба таври замонавӣ дӯхташуда ва истифода аз ороишот (дизайн)-и муосир, ки қариб сад дар сад аз матоъҳои аз ҷиҳати экологӣ тоза ва безарари абрешимин, атласу адрас ва пахтагин омода шудаанд, ба тани духтарону бонувон хеле шинаму музайян ва ба чашми тамошобинон хеле зебову дилрабо буданд. Исботи ин гуфтаҳо кафкӯбиҳои пурмавҷ ва баҳодиҳии ҷамъомадагон арзёбӣ гардид.
Ҳамин тавр, коллексияҳои наву замонавии тарроҳони ҷумҳуриҳои Қазоқистон, Қирғизистон таҳти унвонҳои «Баҳор», «Оҳанги Шарқ», ки либосҳои шинами корӣ, рӯзмарра, идона, тӯёна ва ҷашнӣ ё худ арӯсӣ буданд, ба намоиш гузошта шуданд.
Инак лаҳзаи ҳаяҷоновар ва хотирмон низ фаро расид. Навбат ба коллексияҳои тарроҳони Ҷумҳурии Тоҷикистон дода шуд ва ба саҳна таҳти мусиқии басо фораму рӯҳнавоз духтарону бонувони хушқаду қомат ва паричеҳраву хушлиқо ва хушсимо баромаданд. Ин навбат намояндагони Тоҷикистон бо роҳбарии Раиси Фонди байналмилалии ҳунарҳои мардумии «Ҳафт Пайкар», Раиси Ассотсиатсияи ҳунармандони Осиёи Марказӣ Мукаррама Қаюмова коллексияи либосҳои дӯхташударо бо номи «Салом» манзури тамошобинон намуданд. На танҳо аз ҷиҳати зебогии либосҳо, балки шумораи онҳо нисбат ба намояндагони кишварҳои дигар бештар ба назар расид (23 либоси занона ва 6 либоси кӯдакона).
Ҳол он ки дар коллексияҳои ҷумҳуриҳои дигар либоси кӯдакона мавҷуд набуд, ки ин ҳам яке аз ҷиҳатҳои фарқкунандаи тоҷикистониён ба ҳисоб мерафт.
Кафкӯбиҳои бинандагон шаҳодати он буд, ки дар ҳақиқат либосҳои бонувон ва кӯдакон барояшон писанд омаданд.
Дар интиҳои чорабинӣ аз ҷониби дастандаркорон, бахусус ҳокими шаҳри Бухоро Ихтиёр Фармонов ва сарпарастон барои ҳамаи иштирокчиёни намоиш диплому сипоснома ва тӯҳфаҳои хотиравӣ тақдим карда шуданд.
Фонди байналмилалии «Ҳафт Пайкар»
Нет комментариев