«ЭҶОД КУН, ҶУРЪАТ НАМО!..».

0
2 854 просмотров

«Эҷод кун, ҷуръат намо, ҳақиқатро муҳофиз бош!»-таҳти чунин шиор 41-умин  сессияи баҳории Академияи хурди илмҳои Ҷумҳурии Тоҷикистон дирӯз, 9 майи соли равон дар Мактаби байналмилалии Президентӣ ифтитоҳ гардид. Сессияи навбатии Академияи хурди илмҳои Ҷумҳурии Тоҷикистон  ба «Солҳои рушди деҳот, сайёҳӣ ва ҳунарҳои мардумӣ» бахшида шуд.

Тавре хабарнигори АМИТ «Ховар» иттилоъ медиҳад, президенти Академияи илмҳо, академик Фарҳод Раҳимӣ  ҳадафи чорабиниро дар ҷалб ва омода намудани хонандагони муассисаҳои таҳсилоти миёнаи умумӣ ба корҳои илмӣ арзёбӣ кард.

Зикр гардид, ки яке аз вазифаҳои муҳиме, ки дар баробари баланд бардоштани сатҳу сифат, фаъолияти пурсамари олимони Академияи илмҳо, муассисаҳои тадқиқотӣ ва мактабҳои олии ҷумҳурӣ дар самти таҳқиқот Пешвои миллат муҳтарам Эмомалӣ Раҳмон дар назди Академияи илмҳо ва тамоми аҳли илм гузоштаанд-ин тарбияи мутахассион ва кадрҳои илмӣ мебошад. Зеро имрӯз илм, бешубҳа, ба як рукни муҳими иҷтимоӣ,  манбаи арзишманд, неруи истеҳсолкунанда ва сарвати бебаҳои зиндагии башар табдил ёфтааст. Дар ин замина, ҳаёт ва пешрафти ҷаҳони муосир тақозо менамояд, ки ҳар як шахс дар ҷомеа бояд соҳиби донишу маърифат ва касбу ҳунар бошад.

Дар шароити имрӯзаи рушди босуръати илм ва техникаву технология ҳар як давлат неруи зеҳнии ҷомеаро ба кашфиёту ихтирооти нав ва тавсеаи соҳаҳои гуногуни истеҳсолӣ равона месозад. Чунин муносибат ба фаъолияти инноватсионии соҳаҳои илму маориф такони ҷиддӣ бахшида, дар навбати худ ба рушди иқтисодиёти миллӣ ва баланд шудани сатҳу сифати зиндагии мардум мусоидат менамояд. Рӯзгори имрӯза, робитаҳои сиёсиву иқтисодӣ ва иҷтимоиву фарҳангии замони муосир аз ҳар фард талаб мекунанд, ки барои рушди инноватсионӣ ва рақобатпазирии  мамлакати  худ бо донишҳои замонавӣ мусаллаҳ гардад. Зеро омӯзиш ва татбиқи донишҳои наву замонавӣ шарти муҳими таъмини рушди бемайлони ҷомеа маҳсуб мешавад.

Мақсади Академияи хурди илмҳои ҷумҳурӣ низ омода намудани мутахассисони моҳир, пурдон ва эҷодкор ба ҳисоб рафта, барои такмил додани фаъолияти илмии муассисаҳои илмию тадқиқотии Академияи илмҳо дар оянда мусоидат менамояд. Ин  имконият медиҳад, ки ба сафи Академияи хурди илмҳо неруи нав аз ҳисоби ҷавонони болаёқат ҷалб карда шавад.

Дар сессия муовини аввали Вазири маориф ва илми Ҷумҳурии Тоҷикистон Раҳматулло Мирбобоев, Раиси Федератсияи иттифоқҳои касабаи Тоҷикистон Қодири Қосим ва дигарон  ибрози андеша намуда, наврасонро барои андӯхтани илму маърифат ҳидоят карданд.

Таъкид гардид, ки дастовардҳои соҳаи маориф, тарбияи насли наврас дар рӯҳия худшиносиву худогоҳии миллӣ, донишомӯзӣ ва илмомӯзӣ дар сиёсати пешгирифтаи Пешвои миллат муҳтарам Эмомалӣ Раҳмон мавқеи хоса ва авлавият касб кардааст.

Имрӯз аз ҷониби Ҳукумати Ҷумҳурии Тоҷикистон барои тарбияи насли наврас тамоми шароит муҳайё гардидааст, танҳо наврасонро мебояд дониши муккамали замони муосирро аз худ карда, ҳамчун соҳибони фардои  Ватан  дар  рӯҳияи садоқатмандӣ ба сарзамини муқаддаси  аҷдодӣ  ва  эҳтиром  ба суннатҳои арзишманди  ниёгони хеш  ба камол  расанд.

Бино ба маълумоти масъулин, дар айни ҳол 1400 нафар узви Академияи хурди илмҳои Ҷумҳурии Тоҷикистон мебошад, ки дар сессияи навбатӣ  беш аз 1000 нафар хонандагони болаёқат ва беҳтаринҳо аз макотиби таҳсилоти умумии Вилояти Мухтори Кӯҳистони Бадахшон, вилоятҳои Суғду Хатлон, ноҳияҳои тобеи марказ ва шаҳри Душанбе иштирок доштанд.

Ҳайати ҳакамон дар бахшҳои алоҳида малакаву маҳорат, эҷоди асраҳои илмӣ-тадқиқотӣ ва навоварии хонандагонро мавриди санҷиш қарор дода, ғолибонро бо диплом, сипоснома ва туҳфаҳои хотиравӣ қадрдонӣ намуд.

Мавриди зикр аст, ки Академияи хурди илмҳои Ҷумҳурии Тоҷикистон таҳти сарпарастии Раёсати Академияи илмҳои ҶТ, Вазорати маориф ва илми ҶТ, Кумитаи кор бо ҷавонон ва варзиш, Федератсияи иттифоқҳои касабаи мустақили ҶТ фаъолият менамояд. Академияи хурди илмҳо-иттиҳодияи ихтиёрии эҷодии хонандагони синфҳои 7-11 буда, вазифадор аст, ки интихоби касб, ба эҷодиёти илмиву техникӣ ҷалб намудани хонандагон, рушди маърифат, малакаи кори илмиву тадқиқотӣ, ихтироот ва таҷрибаро дар вақтҳои берун аз дарс, таҳти сарварии олимони барҷастаи тоҷик, омӯзгорони муассисаҳои таҳсилоти олӣ, таълимгоҳҳо ва мутахассисон вусъат бахшад.

Манбаъ: АМИТ «Ховар»

Нет комментариев

Также рекомендуем

Сообщить об опечатке

Текст, который будет отправлен нашим редакторам: