Ба ифтихори 20-солагии Рӯзи Ваҳдати миллӣ ва 100-солагии Ҳунарпешаи халқии СССР Туҳфа Фозилова аз 18 то 24 апрели соли 2017 дар шаҳри Душанбе Фестивал-озмуни ҷумҳуриявии театрҳои касбӣ «Парасту — 2017» доир мегардад.
Тавре аз Вазорати фарҳанги Ҷумҳурии Тоҷикистон хабар доданд, барои иштирок ба Фестивал-озмун тамоми театрҳои касбии ҷумҳурӣ бо беҳтарин намоишномаҳое, ки тӯли солҳои 2015-2016 рӯи саҳна омадаанд, даъват карда мешаванд.
«Интихоби мавзӯи намоишномаҳо озод аст, вале афзалият ба асарҳои драматургони тоҷик дода мешавад, ки дар мавзӯи дастовардҳои замони Истиқлолият, ваҳдату ягонагӣ, сулҳу субот, созандагиву ободонӣ, муковимат бо коррупсия ва дигар зуҳуроти номатлуби ҷаҳони муосир эҷод гардидаанд»,- хабар доданд аз вазорат.
Бояд гуфт, ки Фестивал-озмун бо мақсади рушди драматургияи миллӣ, санъати театрии мамлакат, таҳияи асарҳои баландғояи ватанӣ, баланд бардоштани сатҳи маҳорати касбии коргардонҳо, ҳунармандон, рассомон, бастакорон, ҳисси ифтихори ватандӯстию ватанпарастӣ ва анъанаҳои хуби таърихию фарҳангӣ гузаронида мешавад.
 |
 |
Манбаъ: АМИТ «ХОВАР»
Нет комментариев