Лаклаки сиёҳ намуде, ки дар зери таҳдиди маҳвшавӣ қарор дорад. Дар водии дарёҳои Зарафшон ва Кофарниҳон паҳн гардидааст. Дар давраи кӯчи баҳорӣ ва тирамоҳӣ онро дар водии дарёҳои Панҷ, Вахш, Сир, инчунин води Аличур ва Искандаркўл дидан мумкин аст. Аввалҳои асри XX лаклаки сиёҳ қад-қади дарёи Панҷ ва водии дарёи Зарафшон лона мегузошт. Барои зимистонгузаронӣ ба Ҳиндустон ва Покистон кӯчиш мекунад. Қад-қади дарёҳои кӯҳӣ дар баландии 2000 метр аз сатҳи баҳр лона мегузорад. Саршумори умумии лаклаки сиёҳ дар Тоҷикистон 3-4 ҷуфтро ташкил медиҳад. Аввалин лаклакҳои сиёҳ охирҳои январ парида меоянд. Баҳорон кӯчи онҳо то миёнаи апрел давом мекунад. Тирамоҳ аз охирҳои сентябр то миёнаи октябр парида мераванд. Лаклакҳои сиёҳ дар тоқи шах шохчаҳоро тавассути гил ва чим ба якдигар устувор карда лона месозанд. Чор адад тухм гузошта, онҳоро 35-46 рўз пахш мекунанд. Чӯҷаҳо баъди 64-65 рўзи аз тухм баромаданашон лонаро тарк мекунанд. Моҳӣ, ҳашароти обӣ, хазанда ва қурбоққаро ғизо мегирад.
Нигоҳдорӣ дар шароити сунъӣ имконпазир аст. Сабаби асосии дар Тоҷикистон кам шудани лаклаки сиёҳ омили ноҳинҷор гардонидани ин паранда мебошад. Шикори лаклаки сиёҳ дар ҳама ҷо манъ аст. Ҷойҳои лонагузории онро ба таври қатъӣ муҳофизат бояд кард. Оид ба муҳофизати лаклаки сиёҳ тарғибот бурдан лозим аст.
Шодмон Ашӯров
Нет комментариев