Қарори Раиси шаҳри Хуҷанд Маъруф Муҳаммадзода «Дар бораи таъсис ва ҷудо намудани грантҳои Раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018» ба тасвиб расид.
Мутобиқи ин қарор дар соли 2018-ум 40 гранти Раиси шаҳр барои дастгирӣ ва рушди фаъолияти соҳибкории занони ҳунарманд ва эҷодкор таъсис дода шудаанд, аз ҷумла: 5 грант дар ҳаҷми 8000 (ҳашт ҳазор) сомонӣ; 10 грант дар ҳаҷми 5000 (панҷ ҳазор) сомонӣ ва 25 грант дар ҳаҷми 3000 ( се ҳазор) сомонӣ, ки маҷмуаън 165 ҳазор сомониро ташкил медиҳад. Мутобиқи ин қарор шуъбаи кор бо занон ва оила, бахшҳои сармоягузорӣ ва идораи амволи давлатӣ, ҷавонон ва варзиши мақомоти иҷроияи ҳокимияти давлатии шаҳр ва дигар сохторҳои марбута муваззаф гардидаанд, ки ҷиҳати дар сатҳи зарурӣ ба роҳ мондани чорабиниҳои ташкиливу ҳуқуқӣ, техникӣ, иттилоотӣ ва тарѓиботию ташвиқотии грантҳои Раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018 тадбирҳои зарурӣ андешанд.
Ҷоиз ба таъкид аст, ки ин иқдом ҷиҳати иҷрои Фармони Президенти Ҷумҳурии Тоҷикистон аз 3 декабри соли 1999, №5 «Дар бораи тадбирҳои баланд бардоштани мақоми зан дар ҷомеа» ва қарори Раиси вилояти Суѓд аз 10 апрели соли 2018, № 113 «Дар бораи таъсис ва ҷудо намудани грантҳои Раиси вилоят оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018», бо мақсади дастгирӣ ва рушди фаъолияти соҳибкории занони ҳунарманд ва эҷодкор, бо ҷойи кор таъмин намудани занону духтарон, дастгирии рушди ҳунарҳои дастӣ ва меҳнати хонагӣ (бофандагӣ, дўзандагӣ, армуѓонсозӣ, кулолгарӣ, чўбкорӣ, ресандагӣ, читгарӣ, рассомӣ ва дигар намудҳои ҳунарҳои мардумӣ) дар доираи «Соли 2018-соли рушди сайёҳӣ ва ҳунарҳои мардумӣ» амалӣ карда мешавад.
Ҷоиз ба зикр аст, ки маблағи гранти Раиси шаҳр барои занони ҳунарманд соли гузашта 65 (шасту панҷ) ҳазор сомониро ташкил медод ва имсол беш аз 100 (сад) ҳазор сомонӣ афзудааст.
Манбаъ: Дафтари матбуоти Раиси шаҳри Хуҷанд
Нет комментариев