Бӯй аз куҷо меояд? Моҷаро аз чи сар шуд?
Ду сол мешавад, ки пайдоиши бӯи ғализ ҳар субҳу шом сокинони маҳаллаҳои 3, 8, 13, 14 – 15, 18, 19 ва 20-и соҳили рости дарёи Сири шаҳри Хуҷанд ва ҳатто истиқоматкунандагони маҳаллаҳои Раззоқ ва Масҷиди Сурх, ки дар соҳили чапи дарёи Сир ҷойгиранд, нигарон кардааст. Бо гузашти ду сол ҳанӯз ҳам ин мушкилот бартараф нагардидааст. Ҳарчанд, ки доир ба ин масъала борҳо дар расонаҳо хабару гузоришҳо нашр шуда бошанд ҳам, вале ин масъала роҳои ҳаллашро наёфта, ҳамоно сокинон аз бӯи ғализ изҳори нигаронӣ мекунанд.
То ту ба додам мерасӣ…
Истиқоматкунандагон мегӯянд, бӯи бад асосан аз тарафаи маҳаллаи 3-юми шаҳри Хуҷанд меояд. Дар болои маҳаллаи мазкур дар деҳаи Чаманзори ҷамоати деҳоти Ёваи ноҳияи Бобофон Ғафуров корхонаҳои мурғпарварӣ ва инчунин иншооти тозакунии партовоби шаҳри Хуҷанд мавҷуд аст. Ҳарчанд, ки ҳанӯз моҳи июли соли 2020 доир ба ин мавзӯъ аз пайи шикояти мардум телевизиони “Азия” гузориш омода намуда бошад ҳам, вале то ҳол ягон беҳбудӣ ба назар намерасад.
Дар расм корхонаҳои парандапарварии ҷамоати деҳоти Ёваи ноҳияи Бобоҷон Ғафуров (расм аз харитаи Гугл)
Ба куҷо равам зи бӯят, чи даво кунам чи чора…
Чуноне ки равоншиносон таъкид мекунанд, бӯи бад ба ҳолатии равонии инсон таъсири манфӣ расонида, ҳамчун нишона ва аломат дар ҷисми инсон ба иштиҳо, бедорхобӣ, ғашму ғазаби марҳилавӣ, серташвишӣ, ҳарос, ғамгинии музмин, мондашавӣ, душвори ба муттамарказшавӣ, баландшавии парешонхотирӣ, маҳдудшавии тафаккур, сустшавии таҳаммулпазирӣ ва мушкилот бо хотира зоҳир мегардад. Ба надешаи мутахассисон бояд дар як рӯз камаш ду-се маротиба ҳавои хона тоза карда шавад. Бо сабаби вазидани бӯи ғализ на ҳама вақт шаҳрвандон имкон доранд, ки тирезаҳоро боз карда, ҳавои хонаро тоза намоянд. Барои пешгирӣ ва бартараф кардани ин гуна ҳолатҳо мутахассисон якчанд тавсияҳо медиҳанд. Тавре ки Гулнора Умарова мудири шӯъбаи гигиенаи комуналии Маркази назорати давлатии санитарию эпидемиологии шаҳри Хуҷанд мегӯяд, ягона роҳи халосӣ аз ин вазъият ин истифодаи ниқобҳои муҳофизатии тиббӣ мебошад.
“Аз ҷиҳати бактереологӣ бӯи ғализ ба инсон зарар надорад, лекин метавонад табиати одамро вайрон намояд. Барои пешигирӣ аз гуна вазъият шаҳрвадон метавонанд, ҳангоми гаштугузор дар кӯчаҳо аз ниқобҳои муҳофизатии тиббӣ истифода намоянд. Вақте ки сокинон дар ҷойи истиқоматии худ бӯи ғализро ҳис намекунанд метавонанд, дару тирезаҳоро боз намуда ҳаворо тоза намоянд. Инчунин дар ин вақт истифодаи хушбӯйҳо “освежитель” низ тавсия дода мешавад. Ба ғайр аз ин дар ин гуна ҳолатҳо сокинон аз кондитсионерҳо ва таҷҳизотҳои ҳавотозакунанда истифода бурда метавонанд. ”- афзуд манбаъ.
Канӣ кӣ зӯр? Рақобати ҷарима бо бӯй
Сардори Раёсати ҳифзи муҳити зисти вилояти Суғд гуфт, ки дар болои маҳаллаи 3-юми шаҳри Хуҷанд, ки заминҳои он ба ноҳияи Бобоҷон Ғафуров таалуқ дорад, беш аз 10 коргоҳҳои парандапарварӣ мавҷуд аст. Аз пайи шикояти мардум мо то ду маротибагӣ ҳар яке аз онҳоро барои саривақт тоза накардани ахлоти коргоҳҳои мурғпарварӣ ва безарагардонии он аз 6 то 12 ҳазор сомонӣ ҷарима кардем.
Чорагарони ночор, раисҳо рафтанд, вале бӯй нарафт
Бо гузашти ду сол аз пайдоиши бӯи ғализ ва сару садоҳо дар ин масъала сарчашмаи он то ҳанӯз маълум нагардида, мисли муаммои сарбаста боқӣ мондааст. Дар ҳоле ки доир ба ин масъала борҳо рӯзноманигорон аз собиқ раисони шаҳри Хуҷанд Маъруф Муҳаммадзода ва ноҳияи Б. Ғафуров Зариф Назирӣ пурсон шуда буданд, вале раисҳо рафтанду бӯй нарафт.
Аз супориш то иҷроиш ё тавсияи ниҳоӣ.
Ахиран, дар нишасти матбуотии раиси вилоят ин масъала бори дигар аз ҷониби рӯзноманигорон ба миён гузошта шуд. Раҷаббой Аҳмадзода, Раиси вилояти Суғд дар посух ба саволи рӯзноманигорон роҳбарияти Маркази назорати давлатии санитарию эпидемиологии вилоят ва Раёсати ҳифзи муҳити зисти вилоятро вазифадор кард, ки ин масъаларо ҷиддӣ пайгирӣ карда, аз натиҷааш ба ӯ ва намояндагони ВАО ҳисобот диҳанд. Бо гузашти наздик 1 моҳ аз ин супориш то ҳол дар ин бора ягон хабаре нашр нашудааст. Аз ин хотир то ҳал шудани мушкилоти мазкур ба хотири ҳимояи худ аз бӯи ғализ ҳамагӣ 1 роҳ мемонад: аз ниқобҳо истифода намуда, аз рӯи тавсияи мутахассисон амал намудан ба манфиати кор аст. Худро ҳам аз бӯи ғализ ва ҳам аз коронавирус эҳтиёт мекунед!
Афзал Босолиев
Нет комментариев