Аз 1 то 7 июли соли равон даври асосии имтиҳони марказонидаи дохилшавӣ, имтиҳонҳои эҷодӣ ва маҳорати махсус ба муассисаҳои таълимии таҳсилоти миёна ва олии касбии мамлакат баргузор мегардад.
Тавре котиби маркази матбуоти Маркази миллии тестии назди Президенти Ҷумҳурии Тоҷикистон Замира Абдусаломзода ба хабарнигори АМИТ «Ховар» иброз дошт, дар баробари баргузор гардидани даври асосии имтиҳонҳо барои довталабон ба муассисаҳои таълимии таҳсилоти миёна ва олии касбӣ, имтиҳонҳои эҷодӣ ва маҳорати махсус низ дар донишгоҳу донишкадаҳо доир мегардад. Имтиҳонҳои эҷодӣ ва маҳорати махсус аз ҷониби масъулони донишгоҳу донишкадаҳо қабул ва баҳогузорӣ гардида, балҳои бадастовардаи ҳар як довталаб аз имтиҳонҳои эҷодӣ ва маҳорати махсус ба Маркази миллии тестӣ фиристода шуда, бо балҳои имтиҳонҳои асосӣ зам мегардад.
Декани факултети энергетиа, котиби масъули комисияи қабули имтиҳонҳои дохилшавии Донишгоҳи техникии Тоҷикистон ба номи М. Осимӣ Ҷамшед Раҳимов ба хабарнигори АМИТ «Ховар» иттилоъ дод, ки дар донишгоҳи мазкур имтиҳонҳои эҷодӣ ва маҳорати махсус аз 1 то 8 июли соли равон доир мегарданд.
Ба гуфтаи ҳамсуҳбати мо, аз довлатаб барои иштирок дар имтиҳонҳои эҷодӣ ва маҳорати махсус шиноснома, даъватномаи ММТ ва расид (квитанция) маблағи он 30 сомонӣ, ки инро Хадамоти зиддиинҳосории назди Хукумати Ҷумҳурии Тоҷикистон муқаррар намудааст) талаб карда мешавад. Дар Донишгоҳи техникии Тоҷикистон ба номи М. Осимӣ аз рӯи ду ихтисос меъморӣ ва дизайнӣ муҳити меъморӣ имтиҳонҳои эҷодӣ ва маҳорати махсус доир мегардад. Дар имтиҳонҳои ҳайати ҳакамон масъулони асосии донишгоҳ ва устод иштирок менамоянд.
Мавсуф зикр намуд, ки довталабоне, ки дар даври иловагии бақайдгирии номнавис гардиданд ё дар даври асосии аз имтиҳонҳои эҷодӣ ва маҳорати махсус иштирок карда натавонистаанд, рӯзҳои 9 ва 10 июл дар даври иловагӣ иштирок карда метавонад.
Ба гуфтаи котиби маркази матбуоти Маркази миллии тестии назди Президенти Ҷумҳурии Тоҷикистон, барои таъмини шаффофият ва назорати раванди имтиҳонҳо дар ҳар маркази имтиҳонӣ комиссияи ҷамъиятӣ фаъолият мекунад, ки ҳайати онро мақомоти иҷроияи маҳаллии ҳокимияти давлатии шаҳр ё ноҳияе, ки дар ҳудуди он маркази имтиҳонӣ амал мекунад, муайян ва тасдиқ кардааст.
Инчунин дар шароити паҳншавии бемории COVID-19 як қатор тадбирҳои иловагӣ ба нақша гирифта шудаанд. Аз ҷумла, ҳар як маркази имтиҳонӣ бо мавод ва воситаҳои зарурӣ тибқи талаботи санитарию гигиенӣ ва эпидемиологӣ таъмин мегардад. Дар ҳар як маркази имтиҳонӣ иловатан як корманди техникӣ барои анҷом додани корҳои безараргардонӣ дезинфексия ҷалб мегардад. Корҳои тамизгардонӣ зиддиуфунӣ, дезинфексия як рӯз пеш аз оғози имтиҳонҳо шурӯъ гардида, дар ин рӯз поксозии ҳамаи синфхонаҳои имтиҳонӣ ва ҳуҷраҳои дигар ба куллӣ анҷом дода мешавад. Ҳамчунин дар ҳар як маркази имтиҳонӣ бунгоҳи тиббӣ ташкил гардида, бо кормандони тиб ва маводди зарурӣ барои ёрии аввалини тиббӣ таъмин карда шудааст. Пеш аз воридшавии довталабону шахсони дигар ба маркази имтиҳонӣ ҳарорати бадани ҳар яки онҳо санҷида мешавад.
Ёдовар мешавем, ки довталабоне, ки дар даври иловагӣ бақайдгирӣ аз 10 то 30 июн ҳуҷҷатҳои худро месупоранд, имтиҳонҳои дохилшавиро баъд аз ҷамъбастӣ даври асосӣ мегузаранд.
Манбаъ: АМИТ «Ховар»
Нет комментариев